Aisea 1:5-28

⁵Na vea ke kaqu ta seke nono la tu si gamu? Na vea ke va karikari nono la tu? Sa doduruna sa batumia si ele bakora, meke sa doduruna sa bulomia si ele ta sigiti.

⁶Podalae pa ola nenemia meke kamo pa batumia si tale bakoradi beto mo. Na bakora hite meke na tubu meke bakora nomadi si koa; lopu tava viadi babe ta hade babe tava magogoso pa oela.

⁷Sa mia popoa si ele ta huara va kaleana sari mia vasileana si ta sulu pa nika; sari mia pepeso si vagi pani rina tie pa votiki popoa sipu korapa doṉo toto mia mo, meke doduru likakalae si ta huara palae koa rini.

⁸E Zerusalema leleana mo telena si turu hola, guana keke ipi pa inuma vaeni, na ipikale pa inuma deri, guana keke vasileana nomana sapu vari likohae nia na kana.

⁹Be lopu va toa hola i e Zihova Tadi na Qeto Minate si ka visavisa tie pa butubutu Izireli, si kote ele ta huara gua tu Sodomu meke Qomora si gita,

¹⁰Mi avosia sa zinama te Zihova, gamu na tie tuturaṉa pa Sodomu; va taliṉa la koari na tinarae tanisa Tamasa, gamu na tinoni pa Qomora!

¹¹Zama guahe se Zihova, “Sari soku ṉavulu vinukivukihi tamugamu, si nasa si arini koa Rau? Ele pada mo sari mia vinukivukihi va uququ, sari vinukivukihi sipi kokoreo na deana kurukuru nobokodi; Arau lopu qetu ni sari na vinukuvukihi ehara bulumakao, lami, na qoti.

¹²Totoso mae si gamu pa kenuqu pude vahesi Au, esei garunu gamu pude taveti saripu gua arini, pude va enei pa korapa Qua Zelepade sari kurukuru?

¹³Beto, mamu lopu paleke mae ni sari na vinariponi loke laedi! Sari mia vina uququ oto huda si humaṉa hikare hola Au. Meke sari mia Inevaṉa Sidara Vaqura, Sabati, meke sari na mia vinarigara koari na rane arilaedi, si koroqu ni Rau sari mia vinarigara kaleanadi arini.

¹⁴Kana hola i Arau sari mia Inevaṉa Sidara Vaqura meke sari na rane hopedi. Guana keke pinaleke mamatana si arini koa Rau; ele mabo ni Rau.

¹⁵Totoso repaha sage ni gamu sari limamia pa vinaravara, si va paere i Rau sari mataqu koa gamu; be vea varavara va soku gua si gamu, ba lopu kote va avoso si Rau. Ura sari limamia si tale eharadi.

¹⁶La huve, mi va via puleni gamu. Paleke taloa ni pa kenuqu sari mia tinavete kaleadi! Mamu beto, lopu tavete va kaleana pule.

¹⁷Podalae tumae nia pude tavetavete va leana! Hata ia sa vinilasa toṉotona, mamu tokani saripu ta ṉoṉovala. Mi lavelave ni sarini pu eapa meke toketoke ni sari na hiniva tadi na naboko.

¹⁸Kamahire mae, mada vari vivinei nia sa binalabala. Vea ziṉara gua sari mia sinea, ba kote tava via guana sinou. Vea ziṉara sisigiti gua si arini, ba kaqu tava keoro guana vulu.

¹⁹Be kekere si gamu meke va tabe Au, si kaqu hena i gamu sari ginani leadi koasa pepeso;

²⁰ba be koromia pude va tabe Au gamu, si kaqu tava mate si gamu koasa vedara tanisa mia kana,”

²¹Dotu, sa vasileana nomana sapu ta ronuna si ta evaṉae na maqota! Tatasana si na popoa omunia na vinilasa toṉotona; tie toṉotodi mo si koa vasina, ba kamahire si na tie va mate tie mo si koa.

²²Zerusalema, mua siliva si evaṉae remoremo mo, sa mua vaeni ṉiṉirana si henia na kolo.

²³Sari mua koimata si na tie va guguedi la koe Zihova, na baere tadi na tie hikohiko; doduru arini si vagi golomo poata koari tie kaleadi, meke hoke tepa vinariponi, ba korodia lavelave ni sari koburu pu eapa, meke lopu hiva va avosi rini pa vinaripitui sari ginugua tadi na naboko.

²⁴Gua ke, zama se Zihova, sa Tamasa tadi na Qeto Minate pa Maṉauru, sa Tamasa Ṉiṉirana tadi pa Izireli, “Ego, kaqu hobequ si Rau koari na Qua kana, meke kaqu noso sari tinasuna evaṉi ri na tie va gugue mae koa Rau.

²⁵Sa Limaqu si kaqu va taliri atu nia Rau koa gamu; kaqu va via pani Rau sari na remoremo, kaqu va via gamu Rau guana va via siliva pa nika.

²⁶Kaqu veko pule i Rau sari mia koimata gugua pukerane, mia tie totoli gilaedi gua tatasana. Mudina asa si kote ta pozae na vasileana toṉotona sa Zerusalema, na vasileana ta ronuna.”

²⁷Zaione si kote ta harupu pa vinilasa toṉotona; arini pu kekere pule si kaqu siṉo va gorevura pa tinoṉoto.

²⁸Ba arini pu korodia va tabea si Asa meke tavete va kaleana si kaqu tava huara inete; meke arini pu kilua se Zihova si kaqu tava mate.