Esayi 1:5-28

⁵Ɛ wama a mɔn xa ɛ bɔnbɔ minɛn ma, ɛ to luma murutɛ a ma? Ɛ xunna birin bata findi furen na, ɛ bɔɲɛn birin sɔxɔlɛxi.

⁶Keli ɛ sanna ma han ɛ xunna, sese mi kɛndɛ. Maxɔlɔdene nun bɔnbɔ fɔxɔne nun fure dɛɛne ɛ fatin birin ma, muxe mi naxanye dandanma, muxe mi e maxidima, muxe mi turen tima e dɛ.

⁷Ɛ yamanan luxi nɛn alo tonbon ɲaxina, ɛ taane bata gan. Xɔɲɛne ɛ yamanan sansine kalama ɛ yɛɛ xɔri. Ɛ bɔxɔn bata halagi, a lu alo yaxune na dangu a yi.

⁸Siyon taan nan keden pe luxi alo bubun manpa bili nakɔni alo gagen kɔkunba xɛɛni alo yaxune na taan nabilin a yɛngɛ xinla ma.

⁹Xa Alatala Sɛnbɛn Birin Kanna mi yi muxe lu a nii ra en konni nun, en yi luma nɛn nun alo Sodoma taana, en liga alo Gomora taana.

¹⁰Ɛ Alatalaa falan namɛ, Sodoma mangane! Ɛ tuli mati en ma Alaa sariyan na, Gomora kaane!

¹¹Alatala naxa, “Ɛ saraxa wuyaxine tɔnɔn mundun n ma? Ɛ bata yɛxɛɛne gan n xa saraxan na e nun xuruse raturaxine turena, han n yi wasa na feene ra. Turane nun yɛxɛɛ diine nun kɔtɔne wunla mi fa n kɛnɛnxi sɔnɔn!

¹²Ɛ na fa n yɛtagi, nde a falaxi ɛ xa fa n batu banxin tanden mabodon gbansan?

¹³Ɛ ba fɛ kiseene ra n xɔn, naxanye tɔnɔ mi na, ɛ wusulanna tutin haramuxin na a ra n yɛɛ ra yi. Ɛ kike nɛnɛn sanle rabama e nun Matabu Lɔxɔne, ɛ malanne tima. Ɛ hakɛn naxanye ligama malanne yi, ne bata n yili.

¹⁴Ɛ kike nɛnɛ sanle nun ɛ malanne bata n niin tɔrɔ. Goronna nan e ra n xun ma, n bata xadan e bun.

¹⁵Ɛ na ɛ yiine yite n maxandideni, n mi n yɛɛn tima ɛ ra. Hali ɛ n maxandi han, n mi n tuli matiyɛ ɛ ra. Wunla ɛ yiin birin na.

¹⁶Ɛ maxa, ɛ yɛtɛ rasariɲan, ɛ yi ɛ kɛwali ɲaxine ba n yɛtagi, ɛ ba fe ɲaxine ligɛ.

¹⁷Ɛ xaran fe faɲin ligan ma, ɛ tinxinna fen, ɛ ɲaxankata tiine ti kira faɲin xɔn. Ɛ yi kiridine xun mayɛngɛ kitin bolon, ɛ kaɲa gilɛne xun mafala kitini.”

¹⁸Alatala naxa, “Ɛ fa, en fa feene fɛsɛfɛsɛ en bode xɔn. Hali ɛ yulubine luxi alo wunla, e fixama nɛn alo balabalan kɛsɛna. Hali e to gbeeli iki, e mɔn sariɲanma nɛn alo dugi fixɛna.

¹⁹Xa ɛ xuru, ɛ n ma falan namɛ, ɛ nɔɛ yamanan bogise faɲine donɲɛ nɛn.

²⁰Koni xa ɛ tondi, xa ɛ lu murutɛ n xili ma silanfanna nan ɛ faxama,” Alatala dɛ xuiin nan na ra.

²¹Taa tinxinxin findixi taa yalunxin na di? Kiti kɛndɛn yi Yerusalɛn yiren birin yi a fɔlɔni nun. Tinxin muxune nan yi dɔxi na. Koni iki, faxa tiine nan na yi.

²²Yerusalɛn kaane, ɛ gbetin bata findi wuren gbiin na, igen bata basan ɛ dɔlɔ faɲin na.

²³Muxu murutɛxine nan ɛ kuntigine ra e nun muɲadene bata malan. Dimi yi seene rafan e ma mayifuni e yi e gi kiseene fɔxɔ ra. E mi kiridine xun mayɛngɛ kitin bolonma. Kaɲa gilɛne kitine bɔtɛ mi e xa.

²⁴Nanara, Marigina Alatala Sɛnbɛn Birin Kanna, Isirayilaa Ala Sɛnbɛmana falan ni ito ra, a naxa, “Gbalona ɛ xa! N nan n yɛtɛ sɔtɔma nɛn n yɛngɛfane ra. N nan n gbeen ɲɔxɔma nɛn n yaxune ra.

²⁵Yerusalɛn kaane, n kelima nɛn ɛ xili ma. N na ɛ rasariɲanma nɛn alo wuren gbiin na ba tɛɛn na, a maxa safunna ra. N yi ɛ fe ɲaxine birin ba ɛ yi alo yɔxɔn bama wureni kii naxan yi.

²⁶N mɔn kitisa faɲine fima ɛ ma nɛn alo a fɔlɔni, ɛ kawandi muxune yi lu alo a singene. Na xanbi ra, a fa falama ɛ ma nɛn nayi, a taa tinxinxina, lannaya yirena.”

²⁷Siyon taan xunbama nɛn kiti kɛndɛn xɔn. A muxun naxanye na fa Ala ma, ne xunbama nɛn tinxinyaan xɔn.

²⁸Koni murutɛdene nun yulubitɔne halagima nɛn e bode xɔn. Naxanye na e mɛ Alatala ra, ne fe bata dan.