Aisea 11:2-12

²Iwe, Ngünün ewe Samol mi Lapalap epwe nonom won, ewe Ngün epwe ngeni tipachem me mirit, ekieköch me tufich. Epwe pwal silei letipen ewe Samol mi Lapalap o niueiti i.

³Iwe, epwe pwapwa ngeni an epwe aleasochisi ewe Samol mi Lapalap fän niuokus. Iwe, esap eäni apwüng ren künan mesan, esap pwal apwüngala och ren rongeen selingan.

⁴Nge epwe apwüngü chon wöüngau fän pwüng, epwe pwal peni chon tipetekison won fanüfan, nge esap lifilifil. Iwe, epwe afeiengaua fanüfan ren an kapas usun sa afeiengaua eman ren efoch wok, epwe pwal niela chon föföringau ren enienin ngasangasan.

⁵Epwe nemeni nöün aramas fän pwüng me allükülük.

⁶Eman wolif me eman apanen sip repwe chiechifengen, eman man itan lepart me eman apanen kuuch repwe nonomfengen, eman apanen kow me eman laion me eman man mi öümanau repwe kinamwefengen, nge eman semirit epwe emweniir.

⁷Iwe, eman kow me eman pear repwe mongöfengen, apaner repwe nonomfengen, nge eman laion epwe mongö fetilipwas usun eman kow.

⁸Eman mönükol epwe urumwot arun pwangen serepenit mi poison, nge eman semirit epwe sökalong pöün lon pwangen noput, nge resap feiengau rer.

⁹Esap wor eman epwe afeiengaua eman ika ataela och won chukun Kot mi pin, pun än chon fanüfan silei ewe Samol mi Lapalap epwe alolol usun chök alololun matau.

¹⁰Lon ena fansoun epwe fis pwe ewe king mi fö seni mwirimwirin Tafit epwe ütä usun chök efoch asisil fän iten chon ekewe mwü meinisin. Iwe, repwe chufengen lon telinimwan mi ling o asamolu.

¹¹Lon ena fansoun ewe Samol epwe aitiela pöün fän aruuan pwe epwe aliwinato nöün aramas mi chüen manau seni Asiria, Isip, Patros, Itiopia, Elam, Papilon me Hamat, pwal seni lon ekewe fanü mi nom aroset me ekewe fanü mi nom lematau, pwe repwe liwiniti lenier.

¹²Iwe, epwe aüetä efoch asisil ngeni chon ekewe mwü o pwäri ngeniir pwe a achufengenisefäli ekewe chon Israel me chon Juta mi toropasfeil o aliwinisefäliir seni lepwokukun fanüfan me rüanü.