1Diyesi kaḡe pakanemo ḡalibona valivaliuna kaka ya moito saḡa maibena kai sa oi kamaḡe. Bi nabina ya dugadugana, bi nabinemo kaka ya vota.
2Bada Aluwina kaka noponemo ya miya bi nuwauyauya, sibe bi anapu ya vite te ya ḡailisi bi ena lava didimanemo yai badaedi. Bada ena ḡowana ya sibe bi ya vivile,
3bi manuwavisuna ya voteyeteye. Mote dobu ena wai kitamo ee ena wai beyavaiyamo, ima laukadidimana Bi mote giu kaikaiyovudi imai aninedi.
4Tana giukauwemo waiyamoyamonidi ya etaledi, bi malumaluwabidi dobumo aubaidi ya giu bi ya kadidimanidi te ya sivu kauwedi. Kalinanemo dobu ya gusu, bi yawasinemo gebo tauvoiyedi sa peki.
5Bi didimana tagilolona yai tagiloloye bi waipatutu dabayalonemo i talagagau maibena tana.
6Wulf bi sipu nuwaubamo kaka sa miya ḡemota, lepedi bi gouti lauewalidi vaitedi kaka sa guliyovo bi sa kena ḡemota. Kau lauewalidi bi laiyon sa kani ḡemota, bi gomana ḡaubona ḡamoḡamodi ya kita watedi.
7Kau bi beya sa kani ḡemota bi kota natunatudi, sa kena ḡemota. Ḡawaḡawa pokidi laiyon ya kanidi mai kau lauewalina ya kanikanidina.
8Gomana ḡaubona mwata gebogebona ena bwada diyanemo yai beyakulu bi lisinemo mote bai ima tubuḡa.
9Ena oya Waiyawamo mote bai wainuwa nainailina ima kagebogeboda. Bi dobuna matabuna Bada sibena yai wanavu, mai gauba nisa ya waiwanavuna.
10Laḡan ya natonatona kaka Diyesi kaḡe pakanemo ḡalibona valivaliuna ya moito saḡa te mba yawasana matailina. Dobu matabudi sa nato ena ani miyamo bi isana sa ka saḡesaḡe.
