1Ma suna á gwa gɛ̃̀n aakↄ̃den dí. Òdi yã pínki yãpura ma sèedade gbɛ̃nↄn pla ke gbɛ̃nↄn aakↄ̃ lɛ́i.
2Ma gĩnakɛ ma lɛ́ dà gbɛ̃ kũ ò durunna kɛ̀nↄa yã kũ gbɛ̃ kparanↄ dↄ ma suna á kĩnaa gɛ̃̀n pladeo, tera ma ɛra matɛn lɛ́ daḿma dↄ bee kũ má kú kãáoro, tó ma ɛra ma su dↄ, mani ń gbɛ̃ ke tóro yoo!
3Átɛn sèeda wɛtɛ kũ Kirisi tɛn yã o ma gãin yá? Tↄ̀! Adi kɛ Kirisi gbãna sarinlo, à gbãna á tɛ́.
4Bee kũ à gà lía gbãnasarikɛ gũn, à kun tera kũ Luda gbãnaomɛ. Lɛmɛ kunna a gũn ó kú kũ gbãnasarikɛo lɛ se, ama ónigↄ̃ kú kãao á tɛ́ kũ Luda gbãnao.
5À á zĩda tàasi ká à gwa, tó á kú Yesu Kirisi náanikɛnaa gũn. À kɛkɛ à á zĩda gwa. Á dↄ̃ kũ Kirisi kú á gũnloo? Tó lɛnlo, a funamɛ.
6Má dↄ̃ kũ áni e ódi fuaro.
7Ótɛn wɛ́ kɛ Ludaa de àsun yã vãni ke kɛro. Adi kɛ de gbɛ̃nↄ ó zĩ sáabu kpá yãinlo, de à a mana kɛ yãimɛ, bee tó òtɛni ó gwa gbɛ̃ funanↄ ũ.
8Óni fↄ̃ ò bo yãpura kpɛro, sé ò zɛ́o.
9Tó ó gbãna vĩro, akũsↄ̃ á gbãna, ó pↄ dìgↄ̃ nnamɛ. Odì adua kɛárɛ de à kɛkɛ à bo mana.
10Ma yã birenↄ kɛ̃̀árɛ kũ má kú kãáoro, de tó ma su, màsun kɛárɛ pãsĩ kũ doka kũ Dikiri kpàmaoro. À kpàma á zĩnipɛtɛna yãimɛ, adi kɛ á lɛtɛna yãinlo.
11Tↄ̀, ma gbɛ̃nↄ, à pↄnna kɛ. À yã kɛkɛ à bo mana. À ma lɛ́damma ma. À lɛ́dokↄ̃nↄ kɛ àgↄ̃ nna kũ kↄ̃o, Luda yenyĩde aafiade gↄ̃ kú kãáo.
12À fↄ kpákↄ̃a kũ Luda gbɛ̃nↄ lɛ́pɛmmanaao. Luda gbɛ̃nↄ fↄ kpàáwa ń pínki.
13Dikiri Yesu Kirisi gbɛ̃kɛ kɛárɛ, Luda gↄ̃ yeái, kↄ̃gbɛ̃kɛna gↄ̃ kú á tɛ́ kũ Luda Ninio á pínki.
