Text copied!
CopyCompare
A Nitana Vure - 2 Korin

2 Korin 13

Help us?
Click on verse(s) to share them!
1Iau a vano a made turane mua balaka rua pali. Ngane bara lakene tabu. I manga a ngava ni here na hinere i ta maea, “A viri ge ala rua, o ge ala tolu to go matai a viri i rata a naro hale, to go taki tala na murina na nivapelekado.”
2Hosi, na tahuna a made turane mua, a vakalongo mua pali. Ngane a made basi, a vakalongo tabu mua. Na tahuna ga lakene, i uka ma ga dodoa tara viri. Bara vakamadihi e huriki ri rata a rabu hale,
3a vuhuna mu ngaru hateka iau ga vakasiri mua ne Kristo i ngavapolo nau na maka ngava a taki mua vona. E Kristo i uka ma i kori kiroko mua. I kori dagi mua.
4Na tahuna e Kristo ni paditata na kai tavalavala, e huriki ri luhoi ta ia i uka nitora. Pali a nitora dagi na Vure i vakamahuri mule ia. I mavonga, iau a uka nitora, pali iau a mahuri na nitora dagi na Vure, i kori iau ga tuhori mua.
5Mu luhoi kado a nimadene mua, mu luhoi tora muholi, o i uka? Bara mu luhoi tora muholi, e Isu Kristo bara i made pololilo ne mua. O ge uka, i uka ma i made pololilo ne mua.
6Iau a lohoka vona, na tahuna mu luhoi kado a maki lobo a taki, a maki lobo a rata, bara mu matakilaka vona iau a apostolo muholi ne Kristo.
7A vasileki na Vure, nahea mu gu rata a naro hale. A vasileki mavonga, i uka ma ne vona e huriki ri gi matai iau a apostolo muholi. A vasileki mavonga, mu gu ramai a naro kamumu. I uka maki vona e huriki ri gi luhoi ta iau a nitamina apostolo.
8I uka ma ga rata tara maki ge vakahale a ngava muholi na Vure. Ga rata kunana a maki ge ramai a ngava muholi na Vure.
9Iau a vivi kunana na tahuna iau a uka nitora, pali mua mu kinigao. A vasileki hateka mu gu bele moro na niluhoi tora.
10I mavonga a here lakene mua na tahuna a made basi ne mua. A ngaru na tahuna a luve ne mua, i uka ma ga ta puhaki mai mua na nitora e Bakovi Dagi i habia nau. A nitora iea i habia nau, i uka ma ga ratapile mua. I habia nau ga tuhori mua.
11Mua o huriki a turagu, a ngava nau i lobo. Mu vivi. Mu hamule mai a naro kamumu. Mu valuke. Mu pesi taku, na niluhoi ge taku. Mu made palupu na nivalemu. Na tahuna mu rata a naro nga, a Vure na naro na nivangaru, na naro na nivalemu, bara i made turane mua.
12Mu vangaru, mu vatuba a lima.
13E huriki a tara na Vure koea o Masedonia ri talo mua.
14E Isu Kristo a Bakovi Dagi ge rata a naro kamumu ne mua. A Vure ge vaka­siri a ningaru dagi vona ne mua. A Hanuna Vure ge made turane mua lobo.