2 Corintios 13

1

2

3

4

5

6

7

8

9

10

11

12

13

¹Ṉa'a gac šoṉe ṉi'a yedeṉa'a le'e. Cate' gagwcho xya c̱he note'teze beṉe', guata'bia' nape' doḻa' še yotiḻen can' chesena c̱hope o šoṉe beṉe' cheso'e diža' can' goquen'.

²Goša' le'e šlac gwzoa' len le'e caten' bedeṉa'a le'e da' gwchope, bi yeyaše'da' beṉe' ca' goson da' xiṉjen' še bi yesyetiṉjde', na' goṉa' castigw c̱he yogo' nochle chon da' xiṉjen'. Na' da' yoble žia' ca' ṉa'a šlac zoa' zito' len le'e.

³Chaclaže'le gona' to da' gwlo'en chṉe Criston' len neda'. Da'nan' goṉa' castigw c̱he nole chon da' xiṉjen'. Na' Criston' gwlo'e yeḻa' guac xen c̱he' cont saca'zi'le c̱he da' xiṉj da' nonḻe.

⁴Na' ḻa'czḻa' Criston' ben cuine' ca beṉe' bibi chac gon cate' gosote'ne' ḻe'e yag cruzen', zoe' ṉa'a da' nape' yeḻa' guac xen c̱he Diosen'. Na' ḻecze neto' nacto' txen len Criston' ben cuinto' ca beṉe' bibi chac gon, perw gwlo'eto' le'e zoa yeḻa' guac c̱he Diosen' len neto'.

⁵Ḻe gonyaṉe' xbab c̱helen' še da' ḻi chejnilaže'le Jesucriston'. Nach gacbe'ele zoe' len le'e še da' ḻi chejnilaže'lene'.

⁶Na' zoa' lez ḻecze gacbe'ele zoe' len neto' na' nacto' postlw c̱he'.

⁷Choḻ güižto'ne' c̱hele chṉabto' bich bi da' mal gonḻe, gague cont gacbe'ele zoa Jesucriston' len neto', san cont soale gonḻe da' güen. Ḻe toze ca nonen še chesacbe'e beṉe' zoe' len neto' o še bi chesacbe'ede'.

⁸Na' bibi castigw goṉto' le'e še chzenagle diža' ḻi c̱he Jesucriston', con gaclento' le'e, še ca'.

⁹Yebeto' gonto' ca beṉe' bibi yeḻa' chnabia' nape', con še le'e ba chnabia'le chonḻe can' cheyaḻa' gonḻe. Na' zoaczto' choḻ güižto' Diosen' chṉabto' gaclene' le'e gonḻe doxen can' cheyaḻa' gonḻen'.

¹⁰Ba bzoja' da' quinga za' yedeṉa'a le'e cont yetiṉjele xtoḻa'len' na' bi yažjen gona' znia len le'e. Diosen' gwseḻe' neda' naca' postlw c̱he' na' beṉe' neda' yeḻa' chnabia' cont gaclena' le'e, gague cont gwžiaya'a le'e.

¹¹Beṉe' migw c̱hia', chṉaba' gacšca güen c̱hele. Ḻe cuec yic̱hjle gonyaṉe'le yogo' da' chaclaže' Diosen' gonḻe. Ḻe gon c̱hac̱h laže'le len bi da' chac c̱hele. Ḻe gac toze len ḻjež le'e chejnilaže'le Criston', na' ḻe soa binḻo tole yetole. Diosen' chacde' chio' na' chone' cont chzoa chbezcho binḻo len xbab da' yo'o ḻo' yic̱hjlažda'ochon', nachen' chṉaba' soašcacze' len le'e.

¹²Ḻe gwnopa' na' ḻježle gwguap ḻježle tiox cate' chežagle txen, cont gacbia' chaque ḻježle tole yetole.

¹³Yogo' beṉe' ca' chesejnilaže' Criston' do nga chosoguape' le'e tiox.

¹⁴Na' chṉaba' X̱ancho Jesucriston' gaclenšcacze' le'e. Na' Diosen' gonšque' gacbe'echle chacde' le'e, na' gonšca Spiritw c̱he Diosen' cont xbab c̱hele gaquen toze len xbab c̱hen. Da' na'zen' chzoja'.