1Ó dↄ̃ kũ tó ó sↄ̀ kũ ó kun kpɛ́ ũ andunia dí gũn yàka, Luda ni kpɛ́ kũ odi bo kũ ↄoro kpáwá a bɛa ari gↄrↄ sĩnda pínki.
2Tera sↄ̃ odì nda sↄ̀ↄ pìi gũn, ó ye ò ludambɛ pↄ́ pì da,
3zaakũ tó o bo sↄ̀n, ónigↄ̃ kun mɛ̀ɛ sariro.
4Gↄrↄ kũ ó kú sↄ̀ díkĩna gũn, odì nda lákũ ó aso sɛna bà. Adi kɛ ó ye ò bo a gũnnlo, ó ye ò ludambɛ pↄ́ damɛ, de wɛ̃̀ndi ó sↄ̀ kũ ani ga pì mↄ́.
5Abire yãin Luda ó soru kɛi, akũ à a Nini kpàwá pↄ́ kũ óni le zɛnkpɛkɛ ũ.
6Abire yãi ó swɛ̃̀ɛ dìgↄ̃ gbãna. Ó dↄ̃ gↄrↄ kũ ó kú mɛ̀ díkĩna gũn, ó kú Dikiri kĩnaaro.
7Zaakũ ludanaanikɛnaan ó kúo, adi kɛ wɛ́sinaalɛ yãnlo.
8Ó swɛ̃̀ɛ dìgↄ̃ gbãna. Bona sↄ̀ↄ pìn gɛna Dikiri kĩnaan ó yei.
9Kunna mɛ̀ɛ gũnn yá, bona a gũnn yá, odìgↄ̃ wɛtɛ ó yã káagu.
10Zaakũ Kirisi nigↄ̃ vutɛna a tìntinnwa, ó pínki óni bo ò zɛ a arɛ, ani fĩna bo ó baadinɛ a kunna mɛ̀ɛ gũn yãkɛnaa, a mana ke a vãni.
11Lákũ ótɛn vĩna kɛ Dikirinɛ lɛ nà, odì wɛtɛ gbɛ̃nↄ yã pì zɛ́ e. Luda ó dↄ̃ sãnsãn, akũsↄ̃ ó ye à ó dↄ̃ á swɛ̃̀n lɛ dↄ.
12Ótɛni ó zĩda sáabu kpáárɛ dↄnlo, ótɛni á gba zɛ́ à ĩa dã ó yã musumɛ, de à le à yã we gbɛ̃ kũ àdi ĩa dã kũ mɛ̀ yão, adi kɛ swɛ̃̀ yãnloa.
13Tó átɛn da ó mìi lìtɛ, Luda yãimɛ. Tó ó kú ó dↄ̀rↄↄa, á yãimɛ.
14Zaakũ Kirisi yenyĩ mɛ́ àtɛn tɛ́ káógu. O è tó gbɛ̃ mɛ̀n do gà gbɛ̃ sĩnda pínki yãi, ò gà ń pínkin gwe.
15À gà gbɛ̃ sĩnda pínki yãi, de gbɛ̃ kũ ò gↄ̃̀nↄ súngↄ̃ kun ń zĩda pↄ́ ũ doro, séde gbɛ̃ kũ à gà ń yãi à vù pↄ́.
16Abire yãi odì gbɛ̃ke gwa lákũ andunia gbɛ̃nↄ dì gwa nà tera doro. Bee kũ ó Kirisi dↄ̃ lákũ andunia gbɛ̃nↄ a dↄ̃ nà yã, ó a dↄ̃ lɛ tera doro.
17Zaakũ tó gbɛ̃ kú Kirisi gũn, à gↄ̃̀ gbɛ̃ dufu ũ. A kunna zĩ gɛ̃̀tɛ, kunna dufu mɛ́ à gↄ̃̀nɛ.
18Abire bò Luda kĩnaamɛ pínki. À ó kɛ́ kãao nna Kirisi gãi, akũ à gbɛ̃nↄ kɛna nna kãao zĩ dàwɛrɛ.
19Kirisi gũn Luda andunia kɛ̀ kãao nna gbɛ̃nↄ taarinↄ yã danaa sari, akũ à gbɛ̃nↄ kɛna kãao nna pì yã nàwɛrɛ ó ↄĩ.
20Abire yãi Kirisi gɛ̃nɛnↄn ó ũ. Luda tɛn gbɛ̃nↄ sísi ó gãi. O kútɛ kɛ̀árɛ Kirisi gbɛ̀n, à kɛ nna kũ Ludao.
21Luda tò durunnasaride gↄ̃̀ durunna kútɛkɛbↄ ũ ó yãi, de kunna a gũn Luda tó yã bo kũoo nna.
