2 Korinto 13

1

2

3

4

5

6

7

8

9

10

11

12

13

¹Na, aw metoman a lomikò kidoen kenyo, yan se iketelo te peglegeb ko kidoen kenyo. Ipelumun ko se otaw eg-inang te salà, meneng toloen ko pa se punù te Timanem te eked pelumuni se otaw singed aw doen dowa otaw aw kenà telo meg-indan te benal doen salà din.

²Kedengan te ikedowa ko peglegeb doton kenyo, minikagi a te ipelumun ko se menge otaw mig-inang te medaet. Yan se inikagi ko diyà te menge otaw mig-inang te medaet aw menge otaw wedà peg-inang te medaet. Todà ko den heman sikiyo ikegihan te iyogan ko pineokit te pegsolat ko seini, aw domateng a kidoen, ontò ko sikiyo ipelumun,

³so ipetaga-taga ko kenyo te benal si Cristo se migsogò kanak te pegpelumun ko kenyo. Kenà sikandin melomay iling te otaw, meneng doen tolos din te megpelumun kenyo.

⁴Wedà kulu si Cristo inlansang diyà te kros, meneng neantay sikandin lekat te nematay so doen tolos te Timanem kidoen kandin. Iling a kenyan, so pengkey melomay se lawa ko, meneng kitaen niyo kwani te binegayan a te Timanem te eneg amon megpelumun kenyo.

⁵Ontò niyo eneng-enengi. Sikiyo se keilangan meg-ahà te kenyo pegkeotawun aw lulub kaw ki Cristo. Mèpiya aw lobosen niyo se pegpemenal ki Cristo. Eneng-enengi niyo ini te kenà metòlid se otaw diyà te Timanem singed aw eg-ogpà si Jesu Cristo diyà kandin.

⁶Pengkey eden se aneng-aneng niyo, meneng ibeg ko ketegahan niyo te metòlid a diyà te Timanem, aw insogò a i Cristo.

⁷Megtawal-tawal a diyà te Timanem tepad kenyo amon metòlid se inangen niyo. Kenà ibeg ko ipekità kenyo te metòlid se eg-inangen ko, meneng ibeg ko inangen niyo se metòlid, pengkey wedad otaw metaga-taga te insogò a i Cristo megpelumun kenyo.

⁸Eked kepakay aw inangen ko se kenà tepad te impunù te Timanem. Se tod ko, ketegahan te kedita te otaw se kebenalan tepad ki Cristo.

⁹Yan pengkey wedad otaw ipelumun ko doton so migselsel den dan, meneng meluba a aw magsen kaw meg-inang te metòlid. Gayed ko ipegtawal-tawal diyà te Timanem te ontò melobos se pegpemenal niyo.

¹⁰Insolat ko tapay ini kenyo te wedà a pa pesalo kidoen, amon wedad segdahen ko aw domateng a doton, so tapay kaw timolò. Benal insogò a te Pengolo kenà amon kebàtan kaw, meneng amon ketebangan kaw.

¹¹Na, menge kedowa ko, keluba kaw den. Imendayi niyo se peg-ogpà niyo. Toloi niyo se impunù ko kenyo. Pegsebad kaw te pegpemenal aw pedowan niyo. Domaan kaw te Timanem eglekatan te kedakel aw kelinaw te pedowan.

¹²Pegpeliyagay kaw se kedita niyo egpemenal, so yan se pengilala te egpedekelay kidon te pedowan.

¹³Eg-ikagi se kedita day menge sakop te Timanem eg-ogpà dini te eg-aneng-aneng kay kenyo.

¹⁴Ibeg ko tebangan se kedita niyo te Pengolo tadon si Jesu Cristo, aw kedekelan kaw te Timanem te pedowan, aw megsebad kaw tandà te Espiritu Santo eg-ogpà diyà kenyo.