1परमप्रभु यावे आ दाक्शो पा ख्रीस्त येसु आ सोइश्शो ब्रेत्चा पुंइसीशो, गो पावल नङ। इं लोक्ब सोस्थेनेस नु गोमी कोरिन्थ सहरम बाक्ब परमप्रभु यावे आ मुर दुम्शा देल्ब इन कली एको चिठी ब्रेक्शा सोइक्ताक्स्कु।
2गे कोरिन्थ सहर ङा ख्रीस्त येसुमी योव़चा पुंइसाक्नी। मोपतीके योव़शोपुकी दे ब्रेत्चा पुंइसीनीनी। गेपुकी ला ममाइ, ते ते इं प्रभु येसु ख्रीस्त आ नेंमी खुम्सीनीमी, मेक मेक ङा मुरपुकी यो इन खोदेंशो पा योव़शा, योव़शोपुकी दे ब्रेत्चा पुंइसीनीम। येसु ख्रीस्त आंइ प्रभु, इं प्रभु, थमा सुइक्ब नेल्ल आन प्रभु बाक्ब। मिनु आ नेंमी गो नेल्ल का दुम्तय। १कोरिन्थी ६:११; प्रेरित ९:१६; प्रेरित १८:१-१७
3इं आफ परमप्रभु यावे नु प्रभु येसु ख्रीस्तमी इन कली शिशी पा इन थुं नाइश्शा बाक्चा गेम्सेक्ल।
4गो इन पर्बम परमप्रभु यावे कली “गे रिम्शो पाइब ननी” दे ठेयब सेल्नुङ, मारदे हना इन कली शिशी पा येसु ख्रीस्तमी तुइक्पाइक्तु।
5मिनु तुइक्तीक नु रुप्तीक थुं शुश गेशा, अरु आन कली शेंब नु रुप्पाइक्ब सेल्तु।
6मिनु इन पतीके मुरपुकीमी ख्रीस्त आ सक्ति ताइनीम। तीतस २:१३; २पत्रुस ३:१३-१४
7गेपुकी परमप्रभु यावे आ सोक्तीमी पपाइश्शो गेय नेल्ल पचा ताइतीनी। मारेइ मारेइम गाप्शा बाक्नीनी। इं प्रभु येसु ख्रीस्तमी तपांइसेक्ल, दे रिम्शा बाक्नीनी।
8इं प्रभु येसु ख्रीस्त जाक्म नाक्ती आ ङोंइती ठीक दुम्शा, इन कली सक्ति पाइश्शो गेय पना पन थिप्ब, दे तुइक्ताक्ङ। मारदे हना इन कली नेल्ल क्येङा नोले सम्म थमा सुइक्चा मप्रोंइथु रिम्शा बाक्तीक सक्ति गेब। फिलिप्पी १:६; १थिस्सलोनिकी ३:१३
9परमप्रभु यावेमी इन कली आ तौ इं प्रभु येसु ख्रीस्त नु गेना हना यो काथा बाक्चा कली योव़तु। मिनु आ देंशो लोव़ नेल्ल खाप्ब। १थिस्सलोनिकी ५:२४
10आं लोक्बपुकी, इं प्रभु येसु ख्रीस्त आ नेंमी, इन कली अर्ती गेनन्नी। लोव़ का, शोव़ का नु थुं का दुम्शा बाक्चा मप्रोनीन। १कोरिन्थी ११:१८; रोमी १५:५; फिलिप्पी २:२
11“कोरिन्थीपुकी जिशा बाक्नीम” दे इन पर्बम ख्लोए आ खिं ङा मुरपुकीमी तुइक्पाइक्तीमी।
12इन जिशो मार बाक्ब देंशा हना, का निक्शीमी “पावल आ नोले खोइक्ब नकी” का निक्शीमी “आपोल्लोस आ नोले खोइक्ब नकी” का निक्शीमी “केफास आ नोले खोइक्ब नकी” नु का निक्शीमी “ख्रीस्त आ नोले खोइक्ब नकी” देंतीनी। १कोरिन्थी ३:४; प्रेरित १८:२४-२७; यूहन्ना १:४२
13मार ख्रीस्त देंशो शुश बाक्नीमी ङा? पावलमी इन पाप क्याम्चा कली शीमी केप्शा कांटी थोक्शा क्याइश्शा साइक्चा पुंइसे ङा? पावल आ नेंमी ब्वाक्कुम ख्रुम्शा ग्रुंइचा पुंइसीनी ङा?
14गो परमप्रभु कली “गे रिम्शो पाइब ननी” देंनुङ। मारदे हना गो क्रिस्पस नु गायस ङा लाक्शा सुइ कली ब्वाक्कुम ख्रुम्शा मग्रुंइदुमी। प्रेरित १८:८; रोमी १६:२३
15मुर आन कली ब्वाक्कुम ख्रुम्शा ग्रुंइतीक गेय पशो नङ हना, मेकोपुकीमी “पावल आ नेंमी ब्वाक्कुम ख्रुम्शा ग्रुंइचा पुंइसाक्क” देंम वा।
16स्तीफानस आ खिं ङा मुर आन कली ब्वाक्कुम ख्रुम्शा ग्रुंइताक्ङमी। मेको ङा लाक्शा, सुइ आन कली ब्वाक्कुम ख्रुम्शा ग्रुंइदुमी कों मग्रुंइदुमी, मारेइ मतुइक्नुङ। १कोरिन्थी १६:१५
17ख्रीस्तमी मुर आन कली ब्वाक्कुम ख्रुम्शा ग्रुंइतीक गेय पथ मसोइक्ती। आ लोव़ नेंपाइक्चा कली सोइक्ताक्यी। लोव़मी फू चुइश्शो खोदेंशो पा ममाइ। गो फू चुइश्शो लोव़ पाता हना, ख्रीस्त बेक्शो सक्ति क्याम्सीशा लाइब।
18“ख्रीस्त पाप क्याम्चा कली साइक्चा पुंइसाक्व” देंशो लोव़ नेंशा, नरक लाइबपुकीमी “मूर्ख लोव़ बाक्ब” देंनीम। गो पाप रे ब्रोंइशोपुकीमी चहिं “एको लोव़म परमप्रभु यावे आ सक्ति बाक्ब” दे तुइक्नय। २कोरिन्थी ४:३; रोमी १:१६
19मिनु “जोक्ब आन कली आन जोक्शो क्याम्शा, तुइक्ब आन कली आन तुइश्शो साम्शा गेनुङमी” दे ब्रेक्शो बाक्ब। यसैया २९:१४
20जोक्ब तुइक्ब सु सु नमी? पढेस जोक्ब सु सु नमी? सिनाक्त मुलाक्त शुश लोव़ पा ग्राब सु नमी? लो, मिम्तीने। एको रागी ङा जोक्ब तुइक्ब लोव़ कली परमप्रभु यावेमी फश लोव़ मसेला ङा? मत्ती ११:२५; रोमी १:२२
21परमप्रभु यावेमी मुर आन जोक्तीक तुइक्तीक रे आंम कली मतुइक्पांइसे। परमप्रभु यावेम आ दाक्शो पा, आंइ मूर्ख लोव़ नेंपाइक्ब। मिनु मेको लोव़म थमा सुइक्ब आन कली पाप रे ब्रोंइचा गेब।
22यहूदीपुकी चिन्ड नु छक लाक्चा ङा गेय कोव़कोव़ दाक्नीम। ग्रीकपुकीमी मुर आन जोक्तीक तुइक्तीक लोव़ माल्शा, नेंथ गाक्नीम। मत्ती १२:३८; यूहन्ना ४:४८; प्रेरित १७:१८-२१
23मेको आन दाक्शो, आन माल्शा गाक्शो नेल्ल तुइश्शा यो गोमी चहिं “ख्रीस्त पाप क्याम्चा कली साइक्चा पुंइसाक्व” दे आन कली नेंपाइक्नीकी। मोदेंशो नेंपाइक्कानु, ख्रीस्त लांमी वोइश्शो फुल्लु खोदेंशो दुम्शा, यहूदी आन कली दाइल पाइक्ब। मिनु राम्सीनीम। अर्को रागी ङा मुरपुकीमी “मूर्ख लोव़ बाक्माक्त” दे काइ नेंचा मदाक्नीम। प्रेरित १७:३२; गलाती ५:११; १कोरिन्थी २:१४
24परमप्रभु यावेमी योव़शो यहूदी नु ग्रीकपुकीमी चहिं मार देंनीम देंशा हना “परमप्रभु यावे आ सक्ति नु जोक्तीक तुइक्तीक नेल्ल ख्रीस्त नु थिंसीब” देंनीम। कलस्सी २:३
25परमप्रभु यावे आ मूर्ख लोव़ मुर आन जोक्तीक तुइक्तीक क्येङा ठेयब जोक्तीक तुइक्तीक लोव़ बाक्ब। परमप्रभु यावे आ आइक्च सक्ति यो मुर आन ठेयब सक्ति क्येङा ठेयब बाक्ब।
26आं लोक्बपुकी, परमप्रभु यावेमी इन कली मारदे योव़ङा? इन पढेशो तशा देय, इन जोक्शो तुइश्शो तशा? गे शुश सक्ति पाइश्शो यो मननी। ठेयब खिं ङा मुर यो मबाक्नी। लो, मेको मिम्तीन। यूहन्ना ७:४८; याकूब २:१-५
27तन्न परमप्रभु यावेमी जोक्ब तुइक्ब आन कली मुने तोक्चा कली मजोक्ब मतुइक्ब मूर्ख आन कली योव़तीमी। परमप्रभु यावेमी अधिकार सक्ति पाइश्शो आन कली मुने तोक्चा कली अधिकार सक्ति मपाइश्शो आन कली योव़तीमी।
28परमप्रभु यावेमी रागी ङा महिक्सीशो आइक्च आन कली योव़तु। मारदे हना हिक्सीशो नु ठेयब आन कली मुने तोक्चा कली मो पाप्तु।
29मोपतीके सुइ मुर परमप्रभु यावे आ ङोंइती ठेयब दुम्ने मचाप्नीम। रोमी ३:२७; एफिसी २:९
30मेकोमी येसु ख्रीस्त आ नेंमी इन कली ब्रोंइचा गेब। मेको इन जोक्तीक तुइक्तीक, इन ठीक पतीके, परमप्रभु यावे आ मुर दुम्तीके नु पाप रे प्रोंइतीके बाक्ब। येरमीया २३:५-६; २कोरिन्थी ५:२१; यूहन्ना १७:३९; मत्ती २०:२८
31मोपतीके “प्रभु आ पतीके इं नें बोरपाइय्य” दे साइ नेसी देंशो लोव़ मिम्शा, परमप्रभु कली ठेयब सेल्य। येरमीया ९:२२-२३; २कोरिन्थी १०:१७