1Vuꞌun ti Pabloune. Ta yoꞌnton stuc laj yicꞌun ti Diose, yoꞌ jech liꞌoch ta jcholcꞌop yuꞌun ti Jesucristoe. Jmoj schiꞌuc ti quermanotic Sóstenese ta jtsꞌibaboxuc talel ti jcarta liꞌe, ti voꞌoxuc jchꞌunolajeloxuc yuꞌun ti Diose, ti liꞌ nacaloxuc ta jteclum Corintoe. Yuꞌunoxuc xa ti Diose ta sventa ti junoxuc xa schiꞌuc ti Jcoltavanej Jesuse. Dios laj yicꞌoxuc yoꞌ jech ta xacomic ta yuꞌun coꞌol schiꞌuc ti yantic ti buchꞌutic ta scꞌanbeic vocol ti Cajvaltic Jesucristoe, ti jaꞌ yajvalic ec jech chac cꞌu chaꞌal ti jaꞌ Cajvaltique.
3Ichꞌic sbendición ti Jtotic Diose schiꞌuc ti Cajvaltic Jesucristoe. Acꞌo yacꞌboxuc jun avoꞌntonic.
4Tey onoꞌox ta xcalbe vocol ti Dios ta atojolique, ti jech yacꞌojboxuc sbendición ti Dios ta sventa ti Jcoltavanej Jesuse.
5Ti jech junoxuc xa schiꞌuc ti Cristoe, ti Diose laj yacꞌboxuc ti ep ta tos ti schꞌul-cꞌulejale, ti xanaꞌic yalbel ti scꞌoplale, ti xavaꞌibeic ti smelole.
6Jech o xal scꞌoplal ti Cristo ti laj calboxuque, vinajem ta melel ti icꞌot ta avoꞌntonique.
7Ti jech taje, laj xa ataic scotol ti cꞌusi ta xacꞌ ti Diose. Jaꞌ xa noꞌox ta xamalaic cꞌusi ora ta xchaꞌtal ti Cajvaltic Jesucristoe.
8Ti Diose ta xacꞌboxuc yip avoꞌntonic ti cꞌu sjalil liꞌ oyoxuque, yoꞌ jech muꞌyuc amulic cꞌalal ta xtal ti Cajvaltic Jesucristoe.
9Ti cꞌusi yaloj ti Diose ta xcꞌot ta pasel yuꞌun. Yuꞌun stuc laj xa yicꞌoxuc yoꞌ jech ta xacꞌotic jech chac cꞌu chaꞌal ti Snichꞌone, jaꞌ ti Jesucristo ti Cajvaltic cuꞌuntique.
10Quermanotac, ta jcꞌanboxuc vocol ta sventa ti Cajvaltic Jesucristoe ti jmojuc avoꞌntonique. Altic ti chꞌacaloxuque. Jaꞌ lec ti junuc avoꞌntonic cuxianique. Coꞌoluc ti cꞌusi ta xanopique, ti cꞌusi ta xavaꞌiique.
11Ti jech ta xcalboxuc avaꞌiic taje, Quermanotac, yuꞌun ti buchꞌutic oy ta sna ti Cloee laj yalbun caꞌi ti itꞌix ta xavaꞌi abaique.
12Yuꞌun ta xcaꞌi ti jech ta xavalbe abaique: “Yuꞌunun ti Pabloe. Yuꞌunun ti Apolose. Yuꞌunun ti Pedroe. Yuꞌunun ti Cristoe”, ti xachiique.
13Ti jech taje, ¿mi yuꞌun oy jayvoꞌ ti Cristo avalojique? ¿Mi yuꞌun jaꞌ laj yichꞌ jipanel ta cruz ti Pablo ta sventa ti acolelique? ¿Mi yuꞌun jaꞌ ta sventa Pablo ti laj avichꞌic voꞌe?
14Coliyalbun ti Diose ti muꞌyuc buchꞌu junucal ti laj cacꞌbe yichꞌ ti voꞌe. Jaꞌ noꞌox laj cacꞌbe yichꞌ voꞌ ti Crispoe, ti Gayoe.
15Jech o xal un, muꞌyuc buchꞌu junucal avuꞌunic ti xuꞌ ta xal ti laj cacꞌ avichꞌic ti voꞌe.
16Oy to yan ti buchꞌu laj cacꞌbe yichꞌic ti voꞌe. Jaꞌ laj cacꞌbe yichꞌic voꞌ ti cꞌu yepal oy ta sna ti Estéfanase. Pero mu jnaꞌ mi oy to buchꞌu laj cacꞌbe yichꞌ voꞌ yan.
17Yuꞌun maꞌuc cabtel laj yacꞌbun ti Cristo ta yaqꞌuel ti ichꞌ voꞌe. Jaꞌ noꞌox cabtel laj yacꞌbun ta yalel ti lequil achꞌ cꞌop yuꞌune. Pero mu yuꞌunuc jun xa yutsil ti que ti cꞌalal laj jchanubtasoxuque. Yuꞌun jaꞌ noꞌox ta jcꞌan ti acꞌo cꞌotuc ta avoꞌntonic ti icham ta cruz ti Cristo ta scoj ti jmultique.
18Ti ta xijcol ti jech icham ta cruz ti Cristoe, loꞌil noꞌox ta xaꞌiic ti buchꞌutic ta xbatic ta chꞌayele. Pero ti voꞌotic ti jchꞌunojtic ti jech ta xijcolotique, jaꞌ smucꞌul stsatsal ti Dios ta xcaꞌitique.
19Yuꞌun jech ta xal ti tsꞌibabil ta scꞌop Diose: Vuꞌun ta jchꞌaybe sbijilic ti buchꞌutic bijique. Ti jech xtojobic ta xalique, ta jmacbe ta be, xi.
20¿Cꞌusi bal o ti oy sbijilique? ¿Cꞌusi bal o ti jchanubtasvanejetique? ¿Cꞌusi bal o ti jaꞌ noꞌox ta sloꞌiltaic scꞌoplal ti cꞌusi oy ta sba banomile? Ti Diose laj sjoybin ta bol cristiano ti bijic liꞌ ta sba banomile.
21Ti Dios ti snaꞌoj ti cꞌusi ta spase, yiloj onoꞌox ti mu sta scoltaelic ta sbijil noꞌox stuquic ti cristianoetique. Jech o xal ti Diose laj xa snop stuc ti ta sta scolelic ti buchꞌutic ta xchꞌunic ti lequil achꞌ cꞌop yuꞌune, acꞌo mi loꞌil cꞌop noꞌox ta xaꞌiic ti yane.
22Yuꞌun ti jꞌisraeletique jaꞌ noꞌox ta scꞌan ta sqꞌuelic yaꞌiic smucꞌul stsatsal ti Diose, yoꞌ jech ta xchꞌunic ti Cristo yalojique. Yan ti jyanlumetique jaꞌ noꞌox ta saꞌic batel ti sbijilic liꞌ ta sba banomile.
23Yan ti vuꞌuncutique jaꞌ noꞌox ta xcalcutic batel scꞌoplal ti Cristo ti jipil ta cruz ichame. Ti jꞌisraeletique, qꞌuexlal sba ta xaꞌiic ti jech ta xꞌalbatique. Ti jyanlumetique, bol loꞌil noꞌox ta xaꞌiic ti jech ta xꞌalbatique.
24Pero ti buchꞌutic icꞌbilic yuꞌun ti Diose, acꞌo mi jꞌisraeletic, acꞌo mi jyanlumetic, pero ta xaꞌiic ti jaꞌ sbijil, smucꞌul stsatsal Dios ti jech icham ta cruz ti Cristoe.
25Manchuc mi bol loꞌil noꞌox ta xaꞌiic ti cristianoetic ti jech laj snop ti Diose, pero jaꞌ jelavem sbijil. Jaꞌ mu sta sbijil ti cristianoetique. Acꞌo mi muꞌyuc smucꞌul stsatsal ti Dios laj yilique, pero jelavem smucꞌul stsatsal. Jaꞌ mu sta ti cꞌusi xuꞌ yuꞌunic ti cristianoetique.
26Quermanotac, naꞌic me ti icꞌbiloxuc yuꞌun ti Diose, acꞌo mi oy jlomoxuc jutuc ti abijilic ti liꞌ ta sba banomile. Jun chiboxuc noꞌox ti avichꞌojic tsots abtelique. Jun chiboxuc noꞌox ti ichꞌbiloxuc ta muqꞌue.
27Jech laj spas ti Dios ti laj stꞌujoxuc ti jecheꞌ cristianooxuque, yoꞌ jech qꞌuexlal ta xcꞌotic ti buchꞌu oy sbijilic ta xalique. Manchuc mi muꞌyuc cꞌusi baloxuc o ta xil ti cristianoetique, pero laj stꞌujoxuc ti Diose, yoꞌ jech qꞌuexlal ta xcꞌotic ti buchꞌutic xuꞌ yuꞌun ta xalique.
28Ti buchꞌutic muꞌyuc stu ta xꞌilatique, ti bajbilic yuꞌun ti yane, jaꞌ tꞌujbilic yuꞌun ti Diose, yoꞌ acꞌo vinajuc ti muꞌyuc stu ti buchꞌu jtunel ta xalique.
29Jech icꞌot ta pasel, yoꞌ muꞌyuc buchꞌu xuꞌ ta stoy sba ta stojol ti Diose.
30Pero ti Diose laj spasoxuc ta jun schiꞌuc ti Cristo Jesuse. Jaꞌ icꞌot ta jbijiltic ti Cristoe. Ta sventa ti Cristoe laj jtatic ti lec xijꞌilatotic yuꞌun ti Diose. Lecubtasbilotic, lijcolotic yuꞌun.
31Jech o xal un: “Mi oy buchꞌu ta xaꞌi sba ti lec oy ta jꞌechꞌele, jaꞌ lec, acꞌo yacꞌ ta ichꞌel ta mucꞌ ti Cajvaltique”, xi ta xal ti scꞌop Diose.
