KURINṮH̱UUS ’DE/ 1

1

2

3

4

5

6

7

8

9

10

11

12

13

14

15

16

¹ABuulus, a’di jin yuḵkunu ki bwa ma Arumgimis mo mmota a’di jin karu ki she/ goma Ḵrisṯẖos jin ta’da Yesus mo dhala kam bana ka Sustanis mo be.

²A’di ’kwarkunu goma ḵaniisa ma Arumgimis jin di’d e Paŋ Kurinṯẖuus mo, e uni gwansan kun dhukunu ki she/ mo eya Ḵrisṯẖos jin ta’da Yesus mo, uni gun yuḵkunu mo mmodhu ki she/ ki dhelel dhelel mo imonṯal ’de/ nyaḵka ris uni gwansan kun ’kokin mo e mo ’baar mo kun yuḵki gway gi Tap̱am bana jin ta’da Yesus Ḵrisṯẖos mo, a’di jin ta Tap̱am buni mo dhali Tap̱am bana mo be.

³A’the e um mo dhali moŋḵu’th is ’peni Arumgimis jin ta’da Babam bana mo dhali Tap̱a Yesus Ḵrisṯẖos mo be.

⁴Aha/ ’bora Arumgimis bwa i is isa yempa/ mo gom um mo haali/ goma ’the ma Arumgimis jin c̱ikunu um eya Ḵrisṯẖos jin ta’da Yesus mo be,

⁵haali/ eya ris to ’baar mo tani um saka’thkunu e a’di mo ka ris gwo kun ṯoru mo dhali ka risa nyiṯẖ jin nyiṯẖu to mo.

⁶Isi kani gwo jin ṯoru goma Ḵrisṯẖos mo tani ṯelkunu sho’k e bwam um mo be.

⁷Wakan um yisa hari toŋ kamu/ e to gi shi/in jin c̱inu ki me’d mo yisa, me’d jin c̱orkina um gom mo jin minu piyu/ Tap̱a Yesus Ḵrisṯẖos bana mo be.

⁸A’di jin midi ṯel um sho’k mo ntagi ’pemen mo mmomina umi dar gi mii ’ba/ mo ka tee gi Tap̱a Yesus Ḵrisṯẖos bana mo be.

⁹Arumgimis ta a’di jin ta isiŋ gana/ mo. Ki a’di mo tani um yuḵkunu mmonyaḵ to mii ki Ya/m piti mo, a’di jin ta’da Yesus Ḵrisṯẖos Tap̱am bana mo be.

¹⁰Aha/ yip̱a ’kup̱ ’kup̱ ki um mo, iwaḵ mo, ki gway gi Tap̱am bana jin ta’da Yesus Ḵrisṯẖos mo tani ki umi ’baar mo mini gam gwo me’d ki mo jin mina um i’taki ’ko ka ḵwam bwa mo tani midi ’taki diki di e bwaman um mo. Hili um mini gam ’twa/ ’kup̱ mo e bwan ṯal ’de/ mo dhali eya yisanya ’de/ mo be.

¹¹Haali/ gwo ṯorkunu aha/ mo ki ’kwani ma Ḵuluwi ki mowal di’d e bwam um mo, um kun tana waḵ pem mo.

¹²’Pemen gwom pem jin oka/ mo a’dihe/ be, ki um ka ’deṯe/ ’deṯe/ o gwo mo ki: Aha/ tana ji ma Buulus mo, dhali, Aha/ tana ji ma Abulluus mo, dhali, Aha/ tana ji ma Sap̱a mo, dhali, Aha/ tana ji ma Ḵrisṯẖos mo.

¹³Ḵrisṯẖos ḵwa/u bwa mowa? ABuulus, a’di ’koshkunu ki cwany’ciṯẖan dhul mo gom um mowa? Walla um ’kokunu mmomii ki yi’de/ ki gway ma Buulus mo ’taa?

¹⁴Aha/ ’borkina Arumgimis pem bwa i is mo ki aha/ dinaki mii jin ṯal ’deŋ kamu/ ’peni um ki yi’de/ mo, hili isi ciki/ jasa Kirispus dhala Gayus mo be,

¹⁵isi kan ki jan ṯal ’deŋ kamu/ midi ’taki diki o ki um miinu ki yi’de/ ki gway pem mo be.

¹⁶(Aha/ miikina amii ki yi’de/ si’da/ mo gom ’kwani ma Isṯip̱anuus mo be. Sa kan mo tani aha/ dinaki mish ki aha/ miikina jin ṯal ’deŋ kamu/ ki yi’de/ mo si’da/.)

¹⁷Haala Ḵrisṯẖos diki hash aha/ mo mmomiiya mii jin miinu ki yi’de/ mo, hili mmoc̱i gwom ’borga/ mo, yisa ki yuḵ jin midi ter ’kwani e mo isi ciki/ ki cwany’ciṯẖan dhul ma Ḵrisṯẖos minu kar ki jim p̱uu mo ki dar gi mom’bi’th mo.

¹⁸Haali/ gwo gi cwany’ciṯẖan dhul mo tani a’di ta gwom p̱us gom uni gwansan kun ’kon ki jiny ’ce’d sho’k mo, hili gom ana kun ’kokunu mo mmota is ki me’d mo tani a’di ta mom’bi’th ma Arumgimis mo be.

¹⁹Haali/ a’di ’kwarkunu mo ki: Aha/ mina ’ce’d yuḵ gi ’kwani kun yuḵayuḵ sho’k mo, dhali mo jin korkunu e gi ’kwani gwansan kun kora e ki kor mo tani aha/ mina tor uni sho’k ka pupush mo be.

²⁰Mane wathi/ jin yuḵayuḵ mo? Mane wathi/ jin ta’da man’kwar to mo? Mane amandoṯ gwo gom yil gwansan mo? Din ma Arumgimis ki kar yuḵ gi mony’cesh yansan ki p̱us mowa?

²¹Haali/ me’d jin tana yuḵ ji ma Arumgimis mo tani ’kwaniny’cesh ’koki nyiṯẖa Arumgimis ki yuḵ yan ’te/ mo tani a’di ’borki’da Arumgimis bwa mo mmota uni gwansan is ki me’d mo kun gamki gwo is mo eya p̱ali/ gi gwo jin c̱ikina ana uni mo be.

²²Haali/ ’Kwani Yahuuda/ doṯki gwo ki jin ’theḵ gom jamas mii mo dhali ’Kwaniŋ Griḵi simmki moyuḵ e mo.

²³Hili ana c̱ikina gwo goma Ḵrisṯẖos jin ’koshkunu jwa mo ki cwany’ciṯẖan dhul mo, a’di jin golki ’Kwani Yahuuda/ mo dhali warki’d ki gwo ma p̱ali/ gom ’kwani kun ’koki ta ’Kwani Yahuuda/ mo be.

²⁴Hili gom uni gwansan kun yuḵkunu uni gun ta ’Kwani Yahuuda/ mo dhali ’Kwaniŋ Griḵi si’da/ mo tani aḴrisṯẖos ta mom’bi’th ma Arumgimis mo dhali moyuḵ ma Arumgimis mo be.

²⁵Haali/ gwom p̱us ma Arumgimis mo tani a’di yuḵki’d ’teki yuḵ mo mmobol ’kwani e mo dhali moŋ’ka’d is ma Arumgimis mo tani a’di ’bi’thki’d ’teki ’bi’th mo mmobol ’kwani e mo be.

²⁶Hili isi gwo goma yuḵ bum mo, iwaḵ mo. Aris um ka ris mo yisa yuḵayuḵ mo me’d jin tana mo ma yuḵ gi mony’cesh yan mo. Dhali um tana ris mo yisa kun ta gi moshirr mo. Dhali um tana ris mo yisa kun dhodhu e mo jin tanu ’penkap̱an mo.

²⁷Hili Arumgimis ki kwany to yan jin ta p̱us mo e mony’cesh mo mmo’the ’kwani kun yuḵayuḵ is mo. Dhali Arumgimis ki kwany to yansan jin ’ka’da is e mony’cesh yan mo mmo’the uni kun ’bitha is is mo be.

²⁸Dhali Arumgimis ki kwany to yansan jin hatha c̱a’b ’ko’d mo dhali to yansan jin waḵu e mony’cesh mo, isi kan mo to kun ’koki ’ko mo si’da/ mo tani jin mina a’di dhu to kun ’kokin si’da/ mo me’d to kun p̱uukin mo be.

²⁹Wakan wathim pa en’thiŋ kamu/ midi kar ’ba/ ki ca mo e buŋ’kus ma Arumgimis yisa.

³⁰A’di ta ’kus gi mondiki/em pini eya Ḵrisṯẖos jin ta’da Yesus mo, a’di jin kar ma Arumgimis mmota yuḵ bana mo dhali mmota mo ma ḵar/em bana mo dhali mmota mo jin dhunuwa dhu ki she/ ki dhelel dhelel gom ana mo dhali mmota mo jin wanu ana ’ba/ mo.

³¹Wakan me’d gwo jin ’kwarkunu mo ki: Dhalki a’di jin kar ’ba/ ki ca mo tani kar ’ba/ ki ca e Tap̱a mo.