1 CORINTIOS 1

1

2

3

4

5

6

7

8

9

10

11

12

13

14

15

16

¹Dios bḻiže' neda', Pablo, kan žénekzele' Ḻe', nich gaka' wbás che Jesús, Benne' Criston'. Lježžo Sóstenes žónḻene' neda' tẕen.

²Žapa' ḻe'e “Padiox̱” ẕí'na'do' ka', ẕdoble che Dios ḻo yež Corinto, na' nakle che Ḻeze' dan' nakle toze ḻen Jesús, Benne' Criston'. Dios na'kze bḻiže' ḻe'e nich gakle che Ḻeze' tẕen ḻen yógo'te benne' ka' nníta'gake' gáte'teze, na' ẕcháḻjḻengake' Dios, ẕkóngekle' žin la X̱anžo Jesús, Benne' Criston', X̱ángake', na' ḻezka' X̱anžo.

³Žáta'yoela' X̱ažo Dios ḻen X̱anžo Jesús, Benne' Criston', gon chawe'e ḻe'e, na' wká'n žie' yichj ḻáẕdo'le.

⁴Žápeteza' Dios: “Žóx̱keno'” kan nak chele ḻe'e, dan' zoa da' chawe' da' bennze' chele dan' nakle toze ḻen Jesús, Benne' Criston'.

⁵Dan' nakle toze ḻen Benne' Criston', Dios ba bénnḻi'e chele da' zej naken chie'. Žákḻene' ḻe'e ḻo yógo'te da' ẕnnale, na' žone' ga žejní'iḻe'elele.

⁶Ki naken dan' dot ḻáže'le wẕí' ḻo na'le da' ẕchaḻjto' kan nak che Benne' Criston'.

⁷Che ḻen, bi be žiážjelele che da' žonn Dios Be' La'y chežo, kate' ne ẕbezle ža na' yeḻá' ḻaw X̱anžo Jesús, Benne' Criston'.

⁸Ḻekze' gon choche' ḻe'e nich gak sóelele yógo'te kate' žinže ža ze ḻawte ža na', nich bi gak no benne' bi da' nnie' chele ža na' yeḻá' ḻaw X̱anžo Jesús, Benne' Criston'.

⁹Dios žone' kan ẕnne', na' Ḻekze' bḻiže' ḻe'e nich gakle toze ḻen Ẕi'ne', X̱anžo Jesús, Benne' Criston'.

¹⁰Ni'a che X̱anžo Jesús, Benne' Criston', žáta'yoela' ḻe'e, ẕí'na'do' ka', nich gonle toze x̱tíža'le yógo'tele. Bi žoj chóplele, san le gak toze kan ẕza' ḻáže'le, na' kan žonle ḻe'e.

¹¹Ki žapa' ḻe'e, ẕí'na'do' ka', dan' benne' ka' nníta'gake' liž Kloé bzéngekle' neda' kan žonle, na' wnnágake' ẕdiḻ díža'le.

¹²Ẕnnia' da' ni: zej nža' da' ẕnnale to tole. Báḻele ẕnnale žónḻenle Pablo tẕen. Yebáḻele ẕnnale žónḻenle Apolo tẕen. Yebáḻele ẕnnale žónḻenle Sefas tẕen, na' yebáḻele ẕnnale žónḻenle Benne' Criston' tẕen.

¹³¿Bžoj chople Benne' Criston'? ¿Wdá' neda', Pablo, ḻe'e yag kroze ḻo wlazle ḻe'e? ¿Bezoale ḻe'e nis nich gakle toze ḻen neda'?

¹⁴Žapa' Dios: “Žóx̱keno'” dan' bi bezóa' nis nitóžele ḻe'e, san chopze Crispo ḻen Gayo.

¹⁵Che ḻen bi gak nnale bezoale nis nich gakle toze ḻen neda'.

¹⁶Ḻezka' bezóa' nis Estéfanas ḻen benne' ka' nníta'gake' liže'. Bi žejsá' ḻaža'a cha' bezóa' nis no benne' yoble ga na'.

¹⁷Benne' Criston' bseḻe'e neda', kege nich yezóa' benách ka' nis, san nich wzenla' benách ka' diža' chawe' chie'. Ẕchaḻjan', san kege ḻen yeḻa' žejní'il chekza', nich bi wka'na' ka'ze yeḻa' wak che da' ben Benne' Criston' katen' gote' ḻe'e yag kroze.

¹⁸Žékgekle benne' ka', benne' zej nchoḻ yichj ḻáẕdo'gake', da' ẕchaḻjžo kan nak che Jesús, kan gote' ḻe'e yag kroze, naken to da' dáche'ze, san žo'o, dan' ba belažo, žákbe'elžo dan' ẕchaḻjžon napen yeḻa' wak che Dios nich yeslán benách ka'.

¹⁹Ki naken dan' nyejw ḻe'e yiche la'y da' ẕnnan: Wḻoe'ela' ḻaw nak dáche'ze yeḻa' žejní'il chegak benne' ka' zej nnezle' da' ẕenḻe'e. Wzóa' cheḻa'ale yeḻa' žejní'il chegak benne' ka' žejní'igekle' da' ẕenḻe'e.

²⁰¿Biẕkze yebéḻenle no benne' žejni'ile' da' ẕenḻe'e? ¿Biẕkze yebéḻenle no benne' nsédḻi'e? ¿Biẕkze yebéḻenle no benne' žákḻi'e ẕchaḻje'? Dios ba bḻoe'ele' ḻaw nak yeḻa' žejní'il chegak benách ka', benne' nníta'gake' yežlyó nga, to da' dáche'ze.

²¹Dios, ḻo yeḻa' žejní'il chie', bi bi'e latje benne' ka' nníta'gake' yežlyó nga gónbia'gake' Ḻe' ni'a che yeḻa' žejní'il chégakkze'. Dios wyáz ḻaže'e beslé' benne' ka' žejḻé'gake' chie' Ḻe' ni'a che dan' ẕchaḻjžon, ḻa'kze žékgekle benách ka' naken to da' dáche'ze.

²²Žénegekle benne' judío ka' ḻé'egekle' yeḻa' wak ka' da' zej nak bian', na' benne' zi'to' ka' žénegekle' yéngekle' da' wzejni'ilen ḻégake'.

²³Žo'o ẕchaḻjžo che Benne' Criston', kan gote' ḻe'e yag kroze. Da' li, dan' ẕchaḻjžon kan got Benne' Criston', žonen ga ẕchíx̱gekle benne' judío ka', na' yezika' benách ka' žékgekle' naken to da' dáche'ze.

²⁴Benne' ka' bḻiž Dios ḻégake', ḻa'kze zej nake' benne' judío ka', o benne' zi'to' ka', žákbe'egekle' napkze da' ben Benne' Criston' ḻe'e yag kroze dot yeḻa' wak che Dios, na' dot yeḻa' žejní'il chie'.

²⁵Žékgekle benne' ka' nníta'gake' yežlyó nga da' ben Dios nak bian' nake' benne' bi nnezle, san dan' bene' nápežen yeḻa' žejní'il ka da' zej nape benách ka'. Žékgekle' da' ben Dios nak bian' bi nake' waḻe, san dan' bene' nápežen yeḻa' wak ka da' zej nape benách ka'.

²⁶Na'a, ẕí'na'do' ka', le chejsá' ḻaže' kan gokle ḻe'e katen' bḻiž Dios ḻe'e. Bi gokle zanle benne' ka' žejní'igekle' ḻo yeḻa' benachze chégake', na' bi gokle zanle benne' wnná bia' ka', na' kege zanle gokle benne' blo ka'.

²⁷Benne' ka' nníta'gake' yežlyó nga žékgekle' benne' ka' wžekze Dios zej nake' benne' bi nnezle ka'. Ki ben Dios nich gone' ga yedoé'egekle benne' yežlyó ka', benne' žejní'igekle'. Ḻezka' wžé Dios benne' ka' bi zej nake' waḻe yežlyó nga nich gone' ga yedoé'egekle benne' waḻe ka'.

²⁸Ḻezka', benne' ka' nníta'gake' yežlyó nga žékgekle' benne' ka' wžekze Dios zej nake' ka'ze, na' bi be záka'gake', na' bi zej nake' waḻe. Ki ben Dios nich gone' ga ga'ngak ka'ze da' ka' ẕka'n ẕengak benne' ka' nníta'gake' yežlyó nga.

²⁹Che ḻen, bi gak nitó benne' wká'n ẕen kwine' ḻaw Dios.

³⁰Dios na'kze bene' ga nakžo toze ḻen Jesús, Benne' Criston', na' bene' ga napžo yeḻa' žejní'il chie'. Dan' nak Benne' Criston' toze ḻen žo'o, ba beyakžo chawe', na' nakžo che Dios na'kze, na' belažo.

³¹Nak chežo kan nyejw ḻe'e yiche la'y, da' ẕnnan: “Cha' zoa no benne' žénele' bi da' wká'n ẕene', žaḻa' wká'n ẕene' X̱anžo Dios.”