1 KINANƆ 20:31-39

³¹Akũ a ìbanↄ pìnɛ: O mà Isarailanↄ kínanↄn gbɛ̃kɛ vĩ. Ò uta kasanↄ dↄ ó pi, ò bà dↄ ó wakalɛ, ò bo ò gɛ́ ò a le. Òdigↄ̃ dↄ̃ro ke ani n tó kũ wɛ̃̀ndiio.

³²Akũ ò uta kasanↄ dↄ̀ ń pi, ò bàa dↄ̀ ń wakalɛ, ò gɛ̀ɛ ò Isarailanↄ kína lè ò pì: N zↄ̀bleri Bɛnadada pì ǹ a tó kũ wɛ̃̀ndiio. Akũ Isarailanↄ kína pì: Ase à kpɛ́ kun yá? Ma gbɛ̃mɛ.

³³Yã pìi kɛ̀ gbɛ̃ pìnↄnɛ àlesi mana ũ, akũ ò yã pìi dã̀ ò kũ̀ ò pì: Ee, Bɛnadada bi n gbɛ̃mɛ. Akũ kína pì: À gɛ́ à a sɛ́ à su kãao. Kũ Bɛnadada sù, akũ Ahabu pìnɛ à gɛ̃ kãao a sↄ̃gon.

³⁴Akũ Bɛnadada pìnɛ: Wɛ̃tɛ kũ ma de sì n deanↄ mani ɛra mà kpámma, ĩnigↄ̃ laga yía Damasuku lákũ ma de kɛ̀ nà Samaria. Akũ Ahabu pì: Ò lɛ́dokↄ̃nↄ kɛ abire musu, má n gbarɛ. Akũ à lɛ́dokↄ̃nↄ kɛ̀ kãao à a gbàrɛ.

³⁵Dikiri pì annabi gã̀ gbɛ̃kenɛ à o a gbɛ̃dakenɛ à a lɛ́. Kũ annabii pìi ònɛ, akũ à gì.

³⁶Akũ à pìnɛ: Zaakũ ńdi Dikiri yã maro, tó o kɛ̃kↄ̃a gↄ̃̀nↄ, músu ni n dɛmɛ. Kũ ò kɛ̃̀kↄ̃a, akũ músu a è à dɛ̀.

³⁷Annabii pì gbɛ̃ke lè dↄ, akũ à pìnɛ à a lɛ́. Akũ à a lɛ̀ à kĩ̀nna.

³⁸Akũ annabii pì biza kù a wɛ́a à a zĩda lìtɛ, akũ à gɛ̀ɛ àtɛn kína dã zɛ́ lɛ́a.

³⁹Kũ kína tɛn gɛ̃tɛ, akũ annabii pì lɛ́ zùi à pì: Makũ n zↄ̀bleri, kũ ma gɛ zĩ̀lan, akũ gbɛ̃ke sù ma kĩnaa kũ gↄ̃gbɛ̃ keo, à pì màgↄ̃ a dãkpã. Tó ma tò à pìtima, ma wɛ̃̀ndi lɛ́n gwe, kesↄ̃ mani fĩna bo kũ andurufuuo kiloo bupla sↄↄrosari.