1इं आफोमी इं कली शुश दाक्शा “परमप्रभु यावे आ तमी तौ” दे नें वोइश्शो बाक्त। मिनु गोपुकी आ तमी तौ दुम्तय। मोपतीके रागी ङा मुरपुकीमी इं कली मतुइक्नीम। मारदे मतुइक्नीम देंशा हना, मेकोपुकीमी येसु ख्रीस्त कली यो मतुइक्नीम। यूहन्ना १:१२; यूहन्ना १६:३
2आं दाक्शो लोक्बपुकी, मुल गोपुकी परमप्रभु यावे आ आल दुम्तय। नोले गो दोदेंशो दुम्नया, मारेइ मतुइक्नय। मिनु येसु ख्रीस्त ग्रूमेनु, गोपुकी मेको खोदेंशो दुम्नय। दोपा मेको खोदेंशो दुम्नय देंशा हना, गोपुकी मेको कली दोदेंशो बाक्मे, दे तशा, मेको खोदेंशो दुम्नय। रोमी ८:१७; फिलिप्पी ३:२१; कलस्सी ३:४
3मिनु सु मेको आ मग्रूम सम्म रिम्शा बाक्बा, मेको येसु ख्रीस्त पाप रे ङोन बाक्शो खोदेंशो पा, मेको यो पाप रे ङोन बाक्ब।
4मिनु सुम मरिम्शो पाइबा, मेकोमी परमप्रभु यावे आ अरेशो लोव़ मटीब। मरिम्शो मार बाक्ब देंशा हना, परमप्रभु यावे आ अरेशो लोव़ मटिचा मरिम्शो बाक्ब।
5मरिम्शो क्याम्चा कली येसु ख्रीस्त जाक्त, दे तुइक्नीनी। मिनु मेकोमी काइ मरिम्शो मपवा। यसैया ५३:४-६; यूहन्ना १:२९; १ पत्रुस २:२४; यसैया ५३:९; यूहन्ना ८:४६
6सु चहिं मेको नु थुं का ङा दुम्शा बाक्बा, मेकोमी मरिम्शो मपाइब। सुम चहिं मरिम्शो पना पन बाक्बा, मेको येसु ख्रीस्त नु थुं का ङा मदुम्थु, मेको कली मतुइक्ब। रोमी ६:११,१४
7आं आइक्च आलपुकी, दूली लोव़ शेंब आन लोव़ मनेनीन। सुम ठीक गेय पाइबा, मेको मुर यो येसु ख्रीस्त खोदेंशो पा ठीक पाइब बाक्ब। १यूहन्ना २:२९
8सु चहिं मरिम्शो पना पन बाक्बा, मेको मुर सैतान रे जाक्शो बाक्ब। मारदे हना सैतान ङोंइती रे मरिम्शो पना पन बाक्शो बाक्ब। मोपतीके परमप्रभु यावे आ तौ सैतान आ गेय थुम्चा कली रागीमी जाक्त। यूहन्ना ८:४४
9परमप्रभु यावे आ आलपुकीमी पाप मपाइनीम। मारदे पाप मपाइनीम देंशा हना, परमप्रभु आ थुं मेको आन थुंमी बाक्ब। मोपतीके परमप्रभु आ आलपुकीम पाप मपाइनीम। १यूहन्ना ५:१८
10मिनु तेको मुर परमप्रभु यावे आ आल बाक्नीमी नु तेको मुर सैतान आ आल बाक्नीमी, दे तुंइसीब। दोपा तुंइसीब देंशा हना, सु सु ठीक गेय मपाइनीमी नु आ लोक्ब आन कली मदाक्नीमी, मेको परमप्रभु यावे आ आल मनमी। मेको सैतान आ आल बाक्नीम। यूहन्ना ५:१८
11मिनु इन ङोंइती रे नेंशो लोव़ मार बाक्त देंशा हना, गोपुकी दाक्मुचा माल्नय। यूहन्ना १३:३४
12काइन खोदेंशो दुम्चा मदुम्ब। काइनमी सैतान आ मुर दुम्शा, आ लोक्ब कली सदा बाक्त। काइनमी आ लोक्ब कली मारदे सदा बाक्त देंशा हना, आ थुं ङा गेय मरिम्शो बाक्माक्त। आ लोक्ब आ गेय चहिं परमप्रभु यावे आ ङोंइती ठीक बाक्माक्त। उत्पत्ती ४:८
13आं लोक्बपुकी, रागी ङा मुरपुकीमी इन कली मदाक्थु श्येत गेमेनु, छक मलाक्कीन। मत्ती ५:११; यूहन्ना १५:१८-१९
14गोपुकी बेक्तीक राज्य रे पा, ब्रोंइतीक राज्यमी बाक्नय। दोपा तुइक्नय देंशा हना, थमा सुइक्ब लोक्ब आन कली दाक्नय। सुम चहिं मदाक्बा, मेको बेक्तीक राज्यमी बाक्ब। यूहन्ना ५:२४
15सुम थमा सुइक्ब लोक्ब आन कली मदाक्बा, मेको मुर साइक्ब बाक्ब। मिनु सुम थमा सुइक्ब लोक्ब आन कली साइक्बा, मेको गेना हना यो ब्रोंइशा बाक्चा मताइब, दे तुइक्नीनी। मत्ती ५:२१-२२
16मिनु लोक्ब आन कली दाक्चा, दोपा तुंइसीब देंशा हना, येसु ख्रीस्त इं कली दाक्शा, साइक्चा पुंइसाक्व। मिनु गोपुकीमी यो लोक्ब आन कली दाक्चा माल्नय। थमा सुइक्ब लोक्ब आन कली मबेक्या सम्म वारच पचा माल्नय। यूहन्ना १५:१३
17सुमी शुश शोंप थिशा यो, लोक्ब आन कली श्येत जशो तशा “गो मारेइ मगेनुङ” दे मिम्बा, मेको मुर आ थुं रे परमप्रभु यावे आ गेशो दाक्तीक सक्ति यो जाम्शा लाइब। ब्यवस्था १५:७; १यूहन्ना ४:२०
18आं आइक्च आलपुकी, गोपुकी दाक्मुय। मिनु “इ कली दाक्नुङ” दे लोव़ पशा ममाइ, तन्न पतीकेमी दाक्मुचा माल्नय। याकूब २:१५-१६
19गोपुकी थमा पा दाक्शा, गेय पाइतय हना, इं थुंमी “थमा लां खोइक्ब नय” दे थमा पा तुइक्नय।
20मिनु इं थुंमी इं कली दोस गेप्तु हना, इं थुं क्येङा परमप्रभु यावे ठेयब बाक्ब। मिनु मेकोमी नेल्ल तुइक्ब। लूका १५:२०-२२
21आं दाक्शो लोक्बपुकी, इं थुंमी इं कली दोस मगेप्तु हना, गोपुकी महिंथु, परमप्रभु यावे आ ङोंइती जाक्दीत्नय।
22मिनु गो महिंथु पुंइतय हना, इं पुंइशो गेब। मारदे हना गोपुकी आ अरेशो लोव़ पशा, आ दाक्शो पाइनय। मर्कूस ११:२४
23मिनु आ अरेशो लोव़ मार बाक्ब देंशा हना, परमप्रभु यावे आ सोइश्शो येसु ख्रीस्त कली थमा सुइक्चा नु इं दातेमी दाक्मुचा इं कली अरेशो लोव़ बाक्ब। यूहन्ना ६:२९; यूहन्ना १५:१७
24सुमी आ अरेशो लोव़ पाइबा, येसु नु थुं का ङा बाक्ब। मिनु येसु यो मेको मुर नु थुं का ङा बाक्ब। परमप्रभु यावे नु गोपुकी थुं का ङा दुम्तय, दे दोपा तुइक्नय देंशा हना, मेकोमी गेशो सोक्तीमी शेंशो रे तुइक्नय। १यूहन्ना ४:१३; रोमी ८:९
