1¡Wii goo, naa xa nke leettsoo Xutaa Diox leeʼaa, tsa mroleʼaa zhiinn Diox! ¡Ne wlipaa nakaay! Kona lee re men yezlyu ree nlebeet zha lee, tak nlebeet zha Diox.
2Re goo wetsʼn ne btan na kuu kwathoz nke leettsoon, naka lee zhiinn Diox; ne terka loo naa xomod gakaa tsya. Per neʼaa leettsa yaad Jesucrist, tsa gakaa taxal Jesucrist, tak tsya wiiʼaa Jesucrist taxal na Jesucrist.
3Ne reta zha kuu ngebet yaad Jesucrist, thibka nambi ndo zha lo Diox, leeka taxal nambi nak Jesucrist.
4Reta zha kuu ndaa falt ntsow zha kuu went, tak reta falt nak kuu went.
5Ne wen neʼaa, lee Jesucrist myaad lo yezlyu ree par mtuyy reta faltaa, ne neeka thib falt mndaat Jesucrist.
6Reta zha kuu thibka nak kon Jesucrist, ndaat raa zha falt. Per lee re zha kuu ndaa falt, ter wii zha Jesucrist ne neeka nlebeet zha Jesucrist.
7Nin lo re goo zha kuu nak taxal zhiinn na, taat goo diiz kedi neeka thib zha goo; tak lee zha kuu ntsow kuu wen, nali nak zha taxal nali nak Jesucrist,
8per lee zha kuu ndaa falt, zhiinn Maxuuy nak zhaʼa, tak lee Maxuuy nak kuu mndaa falt desde ndala. Kona lee Xgann Diox myaad par luux reta kuu ntsow Maxuuy.
9Reta zha kuu nak zhiinn Diox, ntsowt raa zha kuu went, tak napa zha Mbi Nayon chaan Diox leen leettsoo zha; kona ndoblot raa taa zha falt, tak zhiinn Diox nak zha.
10Ne tenzhee mod neʼaa naa cho nak zhiinn Diox ne cho nak zhiinn Maxuuy: Reta zha kuu ntsow kuu went, ne re zha kuu nket leettsoo wets, nagt zhaʼa zhiinn Diox.
11Ne diiz ree nak kuu mbin goo desde ndala: Ndoblo ke leettsooʼaa thibaa ne tedibaa.
12Ndoblot gakaa taxal Caín kuu ngok zhiinn Maxuuy ne mbeth wetse. ¿Ne chebee mbeth Caín wets Caín? Mbeth zha wets zha, tak went kuu mtsow zha, ne lee wets zha mtsow kuu wen.
13Re goo wetsʼn ne btan na, yat leettsoo goo os lee re zha yezlyu ree yii ne goo.
14Mbriida lee lo yalguth ne napa lee yalnaban kuu ndaa Diox, ne wen neʼaa koree, tak nke leettsooʼaa re wetsaa. Per lee zha kuu nket leettsoo wets, zha nguth nak zhaʼa.
15Reta zha kuu nayii ne wets, re zhaʼa nak taxal zha kuu nzhuth men, ne neʼa goo lee re zha kuu nzhuth men napt zha yalnaban kuu thitanax.
16Ne Jesús mloo loʼaa naa xomod nak yalnkelaaz, leettsa mndaa Jesús yalnaban chaan Jesús por lee. Ne leeka tata ndoblo taaʼaa yalnaban chaanaa, par tsowaa ayud thibaa ne tedibaa.
17Os lee thib goo nap chaan, ne ne goo lee wets goo ndeche thib kwaa, ne nlatta leettsoo goo ne goo wets goo, ¿xomod loo goo lee yalnkelaaz chaan Diox nzo leettsoo goo tsa?
18Re goo kuu nak taxal zhiinn na, lee yalnkelaaz, ndoblot gake beeta kon diiz kuu ndroo rooʼaa; sinke wlipaa ndoblo looy lo re kuu ntsowaa.
19Ne tenzhee mod neʼaa leeʼaa nabanaa, taxal nzhab lo xkiiz Diox kuu nak kuu wli, ne wen neʼaa lee Diox nkenap leettsooʼaa;
20ne os lee leettsooʼaa nkekiʼaa, ndoblo telaazaa masraa naro Diox nake leettsooʼaa, ne lee Diox ne reta kwaa.
21Kona nin lo re goo wetsʼn ne btan kuu kwathoz nke leettsoon, os lee leettsooʼaa nkekitaa, kon dib ndroo leettsooʼaa neʼaa tekayaa Diox reʼaa;
22ne tetaa Diox reta kuu naabaa lo Diox, tak nzhonaa diiz kuu nabee Diox ne ntsowaa re kuu wen kuu nlaaz Diox.
23Ne koree nak diiz kuu nabee Diox loʼaa: Ndoblo yelaazaa Jesucrist Xgann Diox ne ndoblo ke leettsooʼaa thibaa ne tedibaa, taxal mnabee Jesucrist loʼaa.
24Ne lee zha kuu nzhon diiz kuu nabee Diox, thibka nak zhaʼa kon Diox ne lee Diox naban leettsoo zhaʼa. Ne tenzhee mod neʼaa lee Diox naban leettsooʼaa, tak mndaa Diox Mbi Nayon chaan Diox loʼaa.
