Ioanes I 3

1

2

3

4

5

¹KILANG song en limpok lapalap, me Sam kotiki dong kitail er, pwe kitail en adane kila seri en Kot, ari, iei kitail. I me sappa sasa kin kitail, pwe re kin sasa i.

²Kompok kan, kitail ari seri en Kot, ap saikenta sansal, da me kitail pan wiala. Ari so, kitail asa, ni a pwarado, kitail pan duäla i, pwe kitail pan kilang i ni udan mom a.

³O amen amen, me kaporopor due met, a en kamakelekele pein i duen i me makelekel.

⁴Amen amen me kin wia dip, pil kin palian kapung, pwe iei dip palian kapung.

⁵O komail asa, i me a pwarado, pwen lapwada dip akan. A dip sota kin mi re a.

⁶Meamen, me pot re a, sota kin wia dip; meamen wia dip, sota kilang i o sota dedeki.

⁷Sama ko, kalaka, pwe amen de kasapunga komail. Me kin wia pung, nan i me pung amen, due i me pung.

⁸Me kin wia dip, i nain tewil, pwe tewil me wia dip sang ni tapi o. I me Sapwilim en Kot kotin pwarado, pwen kawela wiawia en tewil.

⁹Meamen me ipwi sang Kot, sota kin wia dip, pwe war a mi re a, o a so kak wia dip, pwe a ipwi sang ren Kot.

¹⁰I me seri en Kot o seri en tewil sansale kida, me so wia me pung, i me so sang ren Kot, o me so pok ong ri a.

¹¹Pwe iet padak, me komail ronger sang ni tapi o, kitail en pokepoke pena.

¹²Kaidin due Kain, me udan me sued amen, ap kamela ri a. Ari, menda a kamela i? Aki a wiawia me sued, a en ri a me pung.

¹³Ri ai ko, der puriamuiki, ma men sappa kin tata kin komail.

¹⁴Kitail asa, me kitail daulier mela, ap ko ong maur, pwe kitail kin pok ong ri atail akan. Ari, me so limpok, pan mimieta nan mela.

¹⁵Meamen, me kin tata ki ri a, nan i me kamela men. A komail asa, maur soutuk sota kin mi ren me kamela men.

¹⁶I me kitail diar kida limpok. A kotiki wei maur pweki kitail; kitail ari pwaipwandeki maur atail ong ri atail akan.

¹⁷Meamen me muei met ap kilang ri a dupokala, ap sota sauasa i, iaduen limpok en Kot pan kak mi re a?

¹⁸Sama ko, kitail der pok pena ni lokaia ta o lo, a ni wiawia o melel pot.

¹⁹I me kitail pan asaki, me kitail kisan melel, o kainsenemauiela mongiong atail re a,

²⁰Pwe ma mongiong atail kadeikada kitail, nan Kot me lapa sang mongiong atail o lelapokki meakan karos.

²¹Kompok kan, ma mongiong atail so kadeikada kitail, nan kitail aima ong Kot.

²²O meakot kitail poeki re a, kitail pan tungole sang i, pwe kitail nekinekid a kusoned akan, o wiada meakan, me a kin pole kila.

²³Ietet a kusoned: Kitail en poson mar en sapwilim a Ol Iesus Kristus, o poke pena, duen a kotiki ong kitail kusoned o.

²⁴A me kin nekinekid a kusoned akan, pan pot re a, o i pan kotikot re a; o iet me kitail asaki, a kotikot re atail: Ngen o, me a kupurai dong kitail er.