ሃዋሬታ ኦሶ 26:23-32

²³ኢስቲካ ዮቲዳይሲ ‘ፆሲ ኪቲዳዴይ ሜቶ ቤያና። ሃይቆፔ ዴንዶን ኮይሮ ጊዲዲ ኣሲ ኣታና ፖዖ ኢስራዔሌ ዴሬሲኔ ኣይዛቤታስ ቆንጫና’ ጊዛይሳ” ጊዴስ።

²⁴ጳዉሎሲ ሄሳ ዮቲሺን ፊስፆሲ “ጳዉሎሳ! ሃዒ ኔ ጎዮንታ ኣጋካ፤ ኔ ዳሮ ታማሪዳይሲ ኔና ጎሺዴስ” ጊ ዋሲዴስ።

²⁵ጳዉሎሲ ጊዲኮ ኢዛስ “ቦንቾ ፊስፆሳ! ታ ኔስ ቱማ ኤራዳ ዮታይስ ኣቲን ጎያቤይኬ።

²⁶ታ ኢዛ ሲንꬃን ቆንጬራ ዮቲዳ ካዎይ ሃይሳ ዮዖዛ ኤሬስ፤ ሃይሲካ ቆታራ ኦꬄቶንታይሳ ጊዲዳ ጊሽ ካዎይ ኤራናይሳ ታ ኣማኔታይስ።

²⁷ካዎ ኣጊርጳ! ናቤታ ኣማናሳ ጊዲኪ? ኔ ኣማኒዛይሳ ታ ኤራይስ” ጊ ዛሪዴስ።

²⁸ኣጊርጳይካ ጳዉሎሳ “ሄኮ ኔ ታና ሃኖ ጉꬃ ዎዴ ጊዶን ኣማንꬃና ኮያሳ” ጊዴስ።

²⁹ጳዉሎሲካ ኢዛስ ዛሪዲ “ጉꬃ ዎዴን ጊዲንካ ዎይኮ ዳሮ ዎዴን ኔ ፃላ ጊዶንታ ዲሺን ሃች ታ ዮቲዳይሳ ሲዪዳይ ዉሪ ሃኖ ታ ቃሼቴꬃያ ኣታ ዉሪካ ታ ማላ ጊዳና ማላ ታ ፆሳ ዎሳይስ” ጊዴስ።

³⁰ሄሳፌ ጉዬ ካዎይ፥ ዴሬ ኣይሲዛይሲ፥ ባርኒቄይኔ ኢስታራ ኡቲዳ ኣሳይካ ዉሪ ዴንዲዴስ።

³¹ኢስቲ ሄፔ ኬዚ ቢሼ ባ ጊዶን “ሃይሲ ኣዴዚ ሃይቆስ ዎይኮ ቃሾስ ጋꬂዛ ሚሼ ኣይኮካ ኦꬂቤና” ጊዳ።

³²ኣጊርጳይካ ፊስፆሳ “ሃይሲ ኣዴዚ ዮዖዛ ቄሳሬስ ሺቆ ጎንታኮ ኣይኮ ዎሶይ ባይንዳ ሜላ ዬዴታናኮ ሺን” ጊዴስ።