20मिनु हारूनमी चोव़खो कोठा, ग्रुम्तीक ताम्बु नु चढ़ेतीके आ पर्बम पाप क्याम्तीक गेय पवा नोले, मेको सेस बोका चाक्चा माल्ब।
21मिनु नोले हारूनम आ गुइ निम्फा मेको सेस बोका आ पिया तार वोइक्चा माल्ब। मिनु इस्राएली आन मरिम्शो पशो नेल्ल नु आन पशो पाप नेल्ल शोव़शा, मोपा नेल्ल पाप बोका आ पियाम वोइक्चा माल्ब। मिनु नोले मुर काम मेको बोका कली गोरशो रागीम चोक्चा माल्ब।
22मोपा मेको बोकाम मेको आन मरिम्शो पशो कुरशा, सुइ मबाक्शो गोरशो रागीम लाइक्चा माल्ब। मेको मुरुम मेको बोका कली गोरशो रागीम प्रोंइचा माल्ब।
23मेको नोले हारून ग्रुम्तीक ताम्बुम ओव़शा, मेको आ ङोंइती चोव़खो कोठा ओव़शा, फेक्शो सुती वा प्रुइश्शा, मेक उइ वोइक्चा माल्ब।
24मिनु मेकोमी चोव़खो बाक्तीके लशा, चिक्सीचा माल्ब। मिनु आ वा फेक्शा लेत्चा माल्ब। मिनु आंम आ पर्बम नु मुर आन पर्बम चोशा चढ़ेतीक चढ़ेशा, आंम कली नु मुर आन कली पाप क्याम्तीक गेय पचा माल्ब।
25मिनु मेकोमी पाप आ पर्बम चढ़ेशो आ बोंसो चढ़ेतीकेमी चोचा माल्ब।
26मिनु प्रोंइचा पुंइसीब बोका कली चोव़थ लाइब मुर आ वा मुरशा, चिक्सीचा माल्ब। मिनु मेको नोले मुर आन बाक्तीक जाक्ने चाप्ब।
27मिनु पाप आ पर्बम चढ़ेशो ब्यफ नु बोका आस हुशेमी मेको चोव़खो कोठा कली पाप क्याम्तीक गेय पशा नोले मेको मुर आन बाक्तीक रे ग्रुंइशा, मेको आस कुशुल, श्ये नु गोबर नेल्ल चोचा माल्ब। लेवी ४:१२; लेवी ६:२३; हिब्रू १३:११
28मिनु मेको चोइबमी आ वा मुरशा, चिक्सीचा माल्ब। मिनु मेको नोले मुर आन बाक्तीके लेन्ने चाप्ब।
29एको नेल्ले इन कली गेना हना यो पतीके बाक्ब। ७ महिना ङा १० नाक्ती परमप्रभु यावे आ नेक्था जाक्चा माल्नीनी। मेको नाक्ती गे, इस्राएली नु अर्को रागी ङा मुर नेल्लेमी काइ गेय मपने। लेवी २३:२७-३२; गन्ती २९:७
30मारदे हना मेको नाक्ती इन पर्बम पाप क्याम्तीक गेय पाइनीम। मिनु परमप्रभु यावे आ ङोंइती इन पाप क्याम्शो बाक्ब।
31एको इन ठेयब नाइक्तीक नाक्ती बाक्ब। मोपतीके काइ गेय मपने। एको गेना हना यो कली पतीक बाक्ब।
32तेल लुक्शो नु आ आफ आ पा ङा चढ़ेब दुम्चा कली सु योव़सीशो बाक्मे, मेकोमी पाप क्याम्तीक गेय पचा माल्ब। मिनु मेकोमी मेको गेय कली ला वोइश्शो सुती के फेक्तीके फेक्चा माल्ब। प्रस्थान २८:४१-४२
33मेकोमी चोव़खो कोठा कली, ग्रुम्तीक ताम्बु नु चढ़ेतीक कली पाप क्याम्तीक गेय पचा माल्ब। मिनु मेकोमी चढ़ेबपुकी नु मुर नेल्ल आन पर्बम पाप क्याम्तीक गेय पचा माल्ब।
34मिनु बर्सम खेयप का इस्राएली नेल्ल आन कली पाप क्याम्तीक गेय पचा माल्ब। मेको इन कली गेना हना यो पतीक बाक्त। बर्सम खेयप का इस्राएली नेल्ल आन पाप आ पर्बम माफ पुंइचा माल्ब’ दे हारून कली देनो” देंत। मिनु परमप्रभु यावेमी मोसा कली दोदेंशो पा अरेवा, मोदेंशो पा पाप्तु। प्रस्थान ३०:१०; हिब्रू १०:३
लेवी 16
लेवी 16:20-34