Levi 16:20-34

²⁰“Muri ne Aron ge kavitagu loboa a Tabeke Nitaba Hateka, a Kape na Vaponga, a dede na nihabi ni gutu-vuro, ge bole lakea na matana kape a meme mahuri.

²¹Muri ge ru langa varago na gina meme mahuri a limana, ge taki tala a maka vilo hale, a maka tagenga, a naro hale lobo ne huriki a Israel. Na naro iea kunana, i ru langa na gina meme a maka naro hale ne ria. Muri ge habia na bakovi ni vulaki pali, ge turaria lakea na tabeke i ngeki a meme, ge taparakia vonga.

²²Ra meme iea ge kaloho a naro hale lobo ne huriki a Israel. A viri i turaria, ge taparakia na tabeke i ngeki.

²³“Muri na leho iea ge lobo, e Aron ge dili na Kape na Vaponga, ge kali tala vonga a maka nirodo i rodo na tahuna i dili na Tabeke Nitaba Hateka, ge taparaki vonga.

²⁴Ge vano ge hilolo na naru pololilo na nure i pesi halui a kape. Muri ge dili tabu na kape, ge rodo ge bagetu na maka bagetua na prister dagi. Na tahuna i pagitala ge rata a nihabi gutu-vuro ge rua, i tara ne vona, i tara ne huriki, ne vona ni kavitagu ia, ni kavitagu e huriki.

²⁵Ge gutu langa na dede a vina sipsip, a bulmakau nevona a nihabi na naro hale ne huriki.

²⁶“Ra bakovi i taparakia a meme i lakea ne Asasel, ge kali tala a maka varakia vona, ge hilolo, ge dili tabu na mada.

²⁷Ri gi bole tala na mada a bulmakau, a meme, ra muga ni bole lakea na Tabeke Nitaba Hateka a darane rua ne vona a nihabi na naro hale. Ni gi gutu a kuline rua, a bobone rua, a tahene rua, ri gi vuro lobo liu.

²⁸Ra bakovi i gutu-vuro a sipsip, a bulmakau nga, ge vano ge vahilolo a nirodo vona, ge hilolo ia, muri ge dili tabu na mada.”

²⁹E BAKOVI DAGI i ta tabu, “Mu ramai vakaroroa a vinara iea. Na ravuluna parava, na poloruana keva, mua a Israel turane huriki a mosi ri made ne mua, mu peremu na kinani, naha ni raulo, naha ni leho, mu malo kunana.

³⁰A vuhuna na parava iea kunana a prister ge rata a nihabi ne vona ni kavitagu mua, bara mu matapado na matane BAKOVI DAGI.

³¹Ra parava dagi iea, a Parava Nimalo. Mu malele ha na maki nivivi, mu malo kunana. Ra vinara iea mu ramai vakaroroa.

³²E rei a prister ni gamai ge bole a murine tamana, ge ia a prister dagi, ia kunana ge ratea a leho ge kavitagu e huriki, ge rodoa a nirodo keakea na prister.

³³Muri ge rata a nihabi ni kavitagu, ge matapado a Tabeke Nitaba Hateka, a Kape na Vaponga, a dede, e huriki a prister, e huriki a Israel lobo.

³⁴“Ra vinara iea mu ramai vakaroroa. A vinara iea ni kavitagu a naro hale, ni gi rata balaka taku na maka pida lobo, ne vona a naro hale ne huriki a Israel.” E Moses i rata lobo a maki e BAKOVI DAGI i vakuku ia vona ge rata.