Lifitikos 16:20-34

²⁰Are Aaron a wes me föri ewe asoren limelim fän iten ewe leni mi unusen pin, ewe imw mangaku ia aramas ra churi Kot ie, me ewe rongen asor, epwe uwato ewe kuuch mi manau.

²¹Mürin, Aaron epwe anomu pöün me ruofoch won möküren ewe kuuch mi manau o pwärätä won än chon Israel föföringau meinisin, ar pupungau me ar tipis meinisin. Iwe, epwe anomu ekewe tipis won möküren ewe kuuch o tinala lon fanüapö ren eman mwän mi fil fän iten ewe angang.

²²Iwe, ewe kuuch epwe uweela ar föföringau meinisin ngeni eu leniapö. Nge ätewe mi emwenala ewe kuuch epwe chök likitala lon leniapö.

²³Mürin, Aaron epwe tolong lon ewe imwenfel seni mangaku o pwilitawu ekewe üf mi pwech a üföüf lupwen an tolong lon ewe leni mi unusen pin. Iwe, epwe likitiir ikenan.

²⁴Epwe tütü lon eu leni mi pin o üföüfolong üfan kewe. Mürin, epwe towu o eäni an asoren kek me än ekewe aramas asoren kek, pwe epwe föri asoren amusamusen tipis fän itan pwal fän iten ekewe aramas.

²⁵Iwe, kirisin ewe mönün asoren tipis epwe keni me won ewe rongen asor.

²⁶Nge ätewe mi afeilai ewe kuuch ren Asasel epwe sopuni üfan o tütü. Mürin epwe tongeni tolong lon ewe leni ia ra nonom ie.

²⁷Iwe, repwe uwala lükün ewe ia ra nonom ie ekewe mönün asoren tipis, iei ewe ätemwänin kow me ewe kuuch, mine char ewe Aaron a fen uwala lon ewe leni mi unusen pin pwe asoren amusamusen tipis. Iwe, silir me fituker pwal tarer repwe kek.

²⁸Nge ätewe mi wisen keniir epwe sopuni üfan o tütü, mürin epwe tongeni tolong lon ewe leni ia ra nonom ie.

²⁹Iwe, ei epwe eu allük ngenikemi oupwe apwönüetä fansoun meinisin. Lon aengolun ränin ewe afisuen maram oupwe echikefel, ousap pwal föri och angang, sap ämi are ekewe chon ekis mi nom remi.

³⁰Pun lon ewe rän epwe fis asoren amusamusen tipis fän itemi pwe oupwe limöch. Mürin oupwe limöch fän mesen ewe Samol mi Lapalap seni ämi tipis meinisin.

³¹Iwe, ei ränin sapat epwe eu ränin asösö remi, nge ämi oupwe echikefel. Iei eu allük oupwe apwönüetä fansoun meinisin.

³²Nge ewe souasor mi kepit o apinipin ngeni wisen souasor lon lenien saman epwe föri asoren amusamusen tipis, nge epwe üföüf ekewe üf mi pwechewech o pin.

³³Iwe, epwe föri asoren limelim fän iten ewe leni mi unusen pin, fän iten ewe imw mangaku ia aramas ra churi Kot ie, pwal fän iten ewe rongen asor. Epwe pwal föri asoren amusamusen tipis fän iten ekewe souasor me ekewe aramas meinisin.

³⁴Ei epwe eu allük oupwe apwönüetä fansoun meinisin, pwe epwe fis asoren amusamusen tipis fän eu lon eu ier fän äsengesin aramasen Israel pokiten ar tipis kana.” Iwe, Moses a föri usun mine ewe Samol mi Lapalap a allük ngeni.