16साइ ङोंइती रे परमप्रभु यावे आ अरेशो लोव़ नु आ लोव़ पाइब आन ब्रेक्शो यूहन्ना आ पाला सम्म शेंताक्म। यूहन्ना जाक्म रे परमप्रभु यावे आ राज्य ङा लोव़ नेंपाइक्नीम। मिनु शुश मुरुमी मेको लोव़ नेंशा, थमा सुइश्शा, परमप्रभु यावे आ राज्यम ओव़चा बोल पाइनीम। मत्ती ११:१२-१३
17परमप्रभु यावेमी ब्रेक्पाइश्शो लोव़ का यो मग्याम्ब। मेको ग्याम्चा क्येङा सरीङ नु रागी ग्याम्ब। मत्ती ५:१८; मत्ती १९:९
18सुमी आ मीश कली प्रोंइशा, अर्को मीश चाक्बा, मेकोमी मीश वोंइश आस नाता ख्रोइश्शा, हेंथे पाइब। सुमी आ वोंइश नु ब्राशा गाक्शो मीश चाक्बा, मेकोमी यो वोंइश मीश आस नाता ख्रोइश्शा, हेंथे पाइब।
19शुश शोंप पाइश्शो मुर का बाक्माक्त। मेको रिम्शो रिम्शो फेक्शा, ब्रोव़ब्रोव़शो जशा बाक्बाक्माक्त।
20आ खिं ङा लाङगाम चहिं जचा मतथु, श्येत जशो लाजरस माइश्शो मुर का गोल्शा बाक्बाक्माक्त। मेको रोइ पा आ रां नेल्ल गार ग्रूशा राक्शो बाक्माक्त।
21मेको शोंप पाइश्शो मुरुम आ जशो रे खपीम दोक्शो जचा ताइनुङा कों, दे आस पा कोव़शा बाक्बाक्माक्त। आ गार कुचुमपुकीमी तुक्बाक्मा बाक्त।
22मिनु लाजरस शुश श्येत जशा बेक्माक्त। मिनु परमप्रभु यावे आ स्वर्ग ङा गेय पाइबमी अब्राहाम आ थुकुमी वोदमे बाक्त। मेको नोले शोंप पाइश्शो मुर यो बेक्शा थिम्चा पुंइसे बाक्त।
23मेको शोंप पाइश्शो मुर बेक्शो मुर आन बाक्तीक जाक्दीम्माक्त। मिनु शुश श्येत जशा, ङोन रे कोव़ङानु, लाजरस कली अब्राहाम आ थुकुम बाक्शो तवा बाक्त।