San Lucas 16:16-23

¹⁶Na' gozna' Jesúsen': ―Gwzolaon cani'te bžinten cate' bla' Juanṉa' bedetix̱jue'ede' xtiža' Diosen', ley dan' bzoj da' Moisés len dan' bosozoj yezica'chle beṉe' gosoe' xtiža' Diosen' bzejni'in chio' c̱he Diosen'. Na' ṉa'a gwzolaon len Juanṉa', ṉe' nita'cze beṉe' cheseyix̱jue'ede' Diosen' ṉabi'e yic̱hjlaždao' beṉe' yosozenague' c̱he'. Na' beṉe' zan cheseyiljue' nacle yesone' cont ṉabia' Diosen' yic̱hjlažda'ogaque'.

¹⁷’Ḻa'czḻa' še yežlion' len da' ca' zjažia ḻe'e yaban' yesede c̱hegaquen, ca nac Xtiža' Diosen' dan' nyojen, ṉe late' daon' cbi te c̱hen.

¹⁸’Note'teze beṉe' chele'e len no'ol c̱he' na' cheque'e no'ole yoble chone' da' xiṉj, tozcze ca naquen šaca' gata'lene' no'ol c̱he beṉe' yoble. Na' note'teze beṉe' yošagna'lene' to no'ole beṉe' bela'a len beṉe' c̱he', ḻecze tozcze ca da' xiṉj gone' len dan' chon beṉe' chata'lene' no'ol c̱he beṉe' yoble.

¹⁹Nach gozna' Jesúsen': ―Gwzoa to beṉe' gwṉi'a na' xdanchgua goc xaḻane'na', na' ḻeca gwdagwšagüe' yogo' ža.

²⁰Na' to beṉe' yaše' le' Lázaro, yogo' ža jasedix̱jue' ḻe' cho'a puert zaguan c̱he beṉe' gwṉi'ana' cont gwṉabe' yosonežjue'ne' con gaca' da' chesezande'. Na' Lázaron' ḻeca gwžia yežo' doxen cuerp c̱hen'.

²¹Na' catec gwdone' goclaže' gagüe' bla'a dao' yeḻa' guagw da' beselažo' cho'a mes c̱he beṉe' gwṉi'an'. Na' beco' ca' ja'acba' jaseḻe'eba' yežo' dan' gwžia cuerp c̱he'na'.

²²Na' got beṉe' proben' nach angl beṉe' že' gan' zoa Diosen' besyezi' besyeque'e ḻe' yaban' gan' zoe' ṉa'a len da' x̱ozxta'ocho Abraham. Na' ḻecze got beṉe' gwṉi'ana' na' bosocuaše'ne'

²³na' beyeje' ḻo yi' gabiḻ. Na' šlac chžaglagüe' na' gwḻis lagüen' na' ble'ede' zito'le nita' da' Abraham len Lázaron' yabana'.