1मेको परमप्रभु यावे आ स्वर्ग ङा गेय पाइब निक्शी सोदोम सहरम नाक्नाक्दो जाक्दीस्सा बाक्त। मेना लोत सहर आ गारो ङा ठेयब लाप्चो आ नेक्था निश्शा बाक्मेनु, ग्रुम्से बाक्त। मिनु लोतमी मेको आस कली तशा बोक्शा, खुम्की पा बाम्माक्त। उत्पत्ती १८:२२
2मिनु लोतमी “आं प्रभु निक्शी, नेनीसे, मुलाक्दो आं खिंम बाक्कीसे। इस खोइल चिक्सीसे। सुनी बोक्शा, इस लां लने चाप्नीसी” देंमाक्त। मेको निक्शीमी “ममाइ, गो मेरे लाङगाम इप्नस्कु” देंसा बाक्त।
3मिनु लोतमी शुश लोव़ पवा नोले आ खिंमी बास बाक्सा बाक्त। लोतमी मेको आस कली ब्रोव़ब्रोव़शो क्येशा, बोरब ओख्ती मसुप्शो शोब्ले सेला बाक्त। मिनु जाम्से बाक्त।
4मिनु इप्चा क्येङा ङोंइती सोदोम सहर ङा वोंइश मुरपुकी खिं आ एर ओंथ खुम्सीशा बाक्मा बाक्त। खाल्पा, ठिटा सहर ङा वोंइश मुर नेल्ल खुम्सीशा बाक्मा बाक्त।
5मेकोपुकीमी लोत कली “नाक्नाक्दो इ खिंम जाक्शो वोंइश मुर ते बाक्सा। आंइ दाक्शो पचा कली लाङगाम सोइक्तो” देंमा बाक्त। लेवी १८:२२-२५; न्यायाधीस १९:२२-२४; रोमी १:२७
6मिनु लोत लाप्चो रे लाङगा ग्रूशा, आ नोले लाप्चो चोक्शा वोदा बाक्त।
7मिनु मेकोमी “आं लोक्बपुकी, मोपा मरिम्शो मपने।
8नेनीन, आं के कन्ने तमी निक्शी बाक्नीसी। मेको इन कली लाङगा सोइक्नुङ। मार मार पचा दाक्नीनी, मेको निक्शी नु पने। आं खिंमी जाक्शो वोंइश मुर आस कली मारेइ मपने। मारदे हना बास बाक्चा कली आं खिंम जाक्ताक्से” देंमाक्त।
9मेकोपुकीमी चहिं “गे लावो। गे ला एको सहरमी अर्को रागी ङा मुर बाक्नेवे, आंइ कली हुकुम पचा माल्नेवे? लो, मेको निक्शी आस क्येङा इ कली श्येत गेनीकी” देंमा बाक्त। लोत कली शुश लोव़ पशा, लाप्चो रोक्चा माल्मे बाक्त। २ पत्रुस २:७-८
10तन्न आगा ङा वोंइश मुर निक्शीमी आस गुइ लाङगा ग्रुंइशा, लोत कली ग्याइश्शा आगा कीशा, लाप्चो चोक्गसे बाक्त।
11मिनु मेको निक्शीमी लाङगाम बाक्शो मुर आन कली मिक्च मताइब सेल्से बाक्त। मिनु मेकोपुकीमी लाप्चो मथित्थु, माल्चा प्रोन्मे बाक्त। २राजा ६:१८
12मिनु मेको निक्शीमी लोत कली “गे इ के सु सु बाक्नीमी? चांइवा, तमी तौ नु सहरम इ मुर सु सु बाक्नीमी? एको सहर रे ग्रुंइदो।
13मारदे हना गो एको सहर कली क्याम्नस्कु। परमप्रभु यावे आ ङोंइती एको आन ग्रांग्रा दिचा ङा गेय आ पर्बम शुश रेयके बाक्ब। परमप्रभु यावेमी आंस कली एको सहर क्याम्चा, दे सोइश्शो बाक्ब” देंसा बाक्त। उत्पत्ती १८:२०
14मिनु लोतमी आ तमी आस कली ग्युंबे पचशो वोंइश आल आस कली ग्रुम्शा “बोक्कीस, सहर रे लसे। मारदे हना परमप्रभु यावेमी सहर क्याम्ब” दे माइक्सी बाक्त। मेको निक्शीमी चहिं “रित्चा ङा लोव़ बाक्त” दे मिम्तसे बाक्त। गन्ती १६:२१
15मिनु भाले ग्रीमेनु, परमप्रभु यावे आ स्वर्ग ङा गेय पाइब निक्शीमी लोत कली “बोक्को, इ मीश नु इ तमी निक्शी आस कली लाइश्शा, एको सहर रे प्रोक्कीन। मप्रोक्तीनी हना, एको सहर ङा मुर खोदेंशो पा क्याम्चा पुंइसीनीनी” देंसा बाक्त।
16मिनु लोत कली ओंखां बोक्शो तशा, मेको कली आ तमी निक्शी नु आ मीशे आन कली गुइ रे कीशा, सहर रे ग्रुंइदसे बाक्त। मोपा परमप्रभु यावेमी लोत नु आ खिं ङा मुर आन कली दाक्शा प्रोंइमी बाक्त।
17सहर रे ग्रुंइशा, परमप्रभु यावे आ स्वर्ग ङा गेय पाइब कामी “ब्रोंइचा दाक्नीनी हना, नोले मकोव़थु प्रोक्कीन। दिंमम मबाक्कीन। पहाड गे प्रोक्कीन। मो मपाइतीनी हना, गे सहर ङा मुर नु क्याम्चा पुंइसीनीनी” देंमाक्त। मत्ती २४:१६
18मिनु लोतमी “आं प्रभु, गो मचबु।
19नेनीन, गो इन शिशी ताता। गो आंइ कली दाक्शा, बेक्चा रे प्रोंइतीनी। गो पहाड प्रोक्ने मचबु। पहाडमी अर्को श्येतमी आं कली साइक्बा, कों।
20नेनीन, हयु उइ ङा सहर प्रोक्चा कली आं नेक्था बाक्ब। आइक्च यो बाक्ब। मेकेर प्रोक्चा गेयीनी। मेको सहर आइक्च बाक्ब। मेकेर ब्रोंइने चाप्नुङ” देंमाक्त।
21मिनु मेकोमी “लो, गो इ पुंइशो गेनुङ। इ देंशो सहर मक्याम्नुङ।
22रीब पा प्रोक्कीन। गे मजाक्दीन्नी सम्म मारेइ पने मचाप्नुङ” देंमाक्त। मेको सहर कली सोआर नें वोदा बाक्त। आइक्च कली सोआर देंसीब।
23मिनु लोत सोआर सहर ओव़ची ना रागीमी नां दाप्ने थुम्शो बाक्माक्त।
24मिनु नोले परमप्रभु यावेमी सोदोम नु गोमोररा सहर आस तारी सरीङ रे गन्धक नु मी रेउ यिशो खोदेंशो पा यिपदा बाक्त। ब्यवस्था २९:२२; भजन संग्रह ११:६; यसैया १:९-१०; यसैया १३:१९; आमोस ४:११; लूका १७:२९; २पत्रुस २:६; प्रकाश १४:१०
25मिनु परमप्रभु यावेमी मेको सहर निक्शी, दिंम नेल्ल, सहर ङा मुर नेल्ल नु रूम मार मार वाशो बाक्मे, मेको नेल्ल क्याम्दा बाक्त।
26लोत नु आ मुर प्रोक्मानु, लोत आ मीशेमी नोले बिर लेश्शा कोव़ङा बाक्त। मिनु मेको हिक्सी के थाम दुम्माक्त।
27मिनु अब्राहाम नाक्त का ङोंइती परमप्रभु यावे आ ङोंइती राप्शा बाक्तीकेम लमाक्त।
28मिनु सोदोम नु गोमोररा सहर ङा दिंम ङा रू नेल्ल कोव़ङा बाक्त। मिनु मेको सहर निक्शी नु रू नेल्ल रे ठेयब चुप्लु ङा मी खोदेंशो पा कुन ग्रूशो तवा बाक्त।
29मोपा परमप्रभुमी मेको दिंम, सहर निक्शी क्याम्दा बाक्त। मेना परमप्रभुमी अब्राहाम आ पुंइशो लोव़ मिम्शा, लोत कली मेको सहर रे ग्रुंइशा प्रोना बाक्त। नोले मेकोमी मेको सहर नेल्ल खतम पोक्गा बाक्त।
30मिनु लोत नु आ तमी निक्शी सोआर रे लशा, पहाड मेर लमा बाक्त। मारदे हना सोआर सहरम बाक्चा हिंमा बाक्त। मेको नु आ तमी निक्शी पहाड ङा पुक्खीम बाक्शो बाक्मा बाक्त।
31मिनु लोत आ ङोंइती जरमेशो तमीमी “इस आफ खाल्पा दुम्त। नेल्ल रागीमी इस कली वोंइश मुर मबाक्म।
32लो, इस आफ कली अङगुर शांबुमी दुक्पाइश्शा, इस आफ नु बाक्स। मोपा इस आफ कली चच युइ दुम्नीम” दे आ लोक्ब कली देंमाक्त। लेवी १८:७
33मेको नाक्दो आस आफ कली अङगुर शांबुम दुक्पदसे बाक्त। मिनु आ ठेयब तमी आ आफ नु इम्माक्त। लोतमी आ तमी आं नु इप्शो, बोक्शो मारेइ मतुइक्ता बाक्त।
34मिनु आ दीसा ठेयब तमीमी आ लोक्ब कली “नेनो, गो सिनाक्दो आफ नु बाक्ती। गो लेंशा आफ कली अङगुर शांबुमी दुक्पाइक्स। मुलाक्दो गे इपो। मोपा इस आफ रे चच युइ दुम्नीम” देंमाक्त।
35मिनु मेको निक्शीमी आस आफ कली मेको नाक्दो यो दुक्पदसे बाक्त। मिनु कान्छी आ आफ नु इप्थ लमाक्त। मिनु लोतमी आ तमी आं नु इप्शो, बोक्शो मारेइ मतुइक्ता बाक्त।
36मिनु लोत आ तमी निक्शीमी आस आफ के कोव़ज कुरसे बाक्त।
37मिनु ठेयब तमीम तौ का थिमाक्त। मेको आ नें मोआब वोदा बाक्त। मेको मोआबी आन किकी पिपी बाक्माक्त। ब्यवस्था २:९
38कान्छीमी यो तौ का थिमाक्त। मेको आ नें बेन-अम्मी वोदा बाक्त। मेको अम्मोनी आन किकी पिपी बाक्माक्त। ब्यवस्था २:१९; ब्यवस्था २३:४
