1मिनु अब्राहामम अर्को मीश चाक्गा बाक्त। मेको आ नें केतुराह बाक्माक्त।
2मिनु मेकोमी अब्राहाम रे जिम्रान, योकशान, मेदान, मिदयान, इश्बाक नु शुआह थिमाक्त।
3मिनु योकशानमी शेबा नु देदान थिम्सी बाक्त। देदान आ तौपुकी अश्शुरीम, लेतुशीम नु ले-उम्मीम बाक्मा बाक्त।
4मिनु मिदयान आ तौ एफाह, एफेर, हनोक, अबीदा नु एल्दाह बाक्मा बाक्त। मेको नेल्ल केतुराह आ चच युइ बाक्मा बाक्त।
5मिनु अब्राहामम आ मार मार नेल्ल इसहाक कली गेवा बाक्त।
6अब्राहाममी आ मबेक्थुन अर्को मीश आन तौ आन कली मार मार कोसेली गेमी बाक्त। मिनु आ तौ इसहाक रे फ्राशा, पूर्ब ङा रागीम बाक्मल, दे पूर्ब गे सोइक्तीमी बाक्त।
7मिनु अब्राहाम नेल्ल पा सहे का ७५ बर्स ब्रोंइमाक्त। उत्पत्ती १२:४
8मिनु नोले शुश बर्स ङा खाल्पा दुम्शा बेक्शा, आ किकी पिपी नु लमाक्त। उत्पत्ती १५:१५
9मिनु इसहाक नु इश्माएल आ तौ निक्शीमी आ बेक्शो रां माक-पेला माइश्शो रू ङा पुक्खीमी लाइश्शा, वोदसे बाक्त। ङोंइती मेको रू सोहार आ तौ एफ्रोन आ रू बाक्माक्त। एफ्रोन हित्ती का बाक्माक्त। मेको रू माम्रे आ पूर्ब गे बाक्माक्त। उत्पत्ती २३:१३-२०
10अब्राहाममी मेको रू हित्ती आ मुर रे ग्याप्शो बाक्माक्त। मेकेर ङोंइती आ मीश सारा कली नोले अब्राहाम कली वोदमे बाक्त।
11मिनु अब्राहाम बेक्म नोले परमप्रभुमी इसहाक कली आसीक गेवा बाक्त। मेना इसहाक बेयर-लहाइ-रोइ माइश्शोमी बाक्शो बाक्माक्त। उत्पत्ती १७:१९; उत्पत्ती २४:६२
12सारा आ वाइलीम इजीप्त ङा हागार रे जरमेशो अब्राहाम आ तौ इश्माएल बाक्माक्त। उत्पत्ती २१:१३
13इश्माएल आ तौ सु सु बाक्मा बाक्त देंशा हना, आ ङोंइती जरमेशो तौ नेबायोथ बाक्माक्त। मिनु नोले थिशो आन नें केदार, अदबेल, मिब्साम,
14मिश्मा, दुमा, मस्सा,
15हादाद, तेमा, येतुर, नाफीश नु केदमा बाक्मा बाक्त।
16एको इश्माएल आ तौ आन नें, आन बाक्तीके आन नें बाक्मा बाक्त। मेको नेल्ल आन थर ङा ठेयब मुर बाक्शो बाक्मा बाक्त। उत्पत्ती १७:२०; गन्ती १:४४
17इश्माएल नेल्ल पा सहे का ३७ बर्स ब्रोंइमाक्त। मिनु बेक्शा, आ किकी पिपी नु लमाक्त।
18आ तौपुकी हवीलाह रे इजीप्त लतीक लां शुर सम्म बाक्शो बाक्मा बाक्त। शुर रागी इजीप्त आ ङोंइती अस्सुर गे बाक्ब। इश्माएल चहिं आ लोक्ब नेल्ल आन दातेमी बाक्माक्त। उत्पत्ती १६:१२
19इसहाक अब्राहाम आ तौ बाक्माक्त।
20इसहाक ४० बर्स दुम्मेनु, रेबेका चाक्गा बाक्त। रेबेका चहिं अरामी पदान-अराममी बाक्ब बेथुएल आ तमी, लाबान आ समी बाक्माक्त।
21मिनु इसहाकमी परमप्रभु यावे कली आ मीश आ पर्बम पुना बाक्त। मारदे हना आल मथीब बाक्माक्त। परमप्रभु यावेमी आ पुंइशो गेवा बाक्त। मिनु रेबेकामी कोव़ज कुरा बाक्त।
22मिनु आल निक्शी आ कोव़जम राम्शी पाम्से बाक्त। मिनु रेबेकामी “मुल ओदेंशो दुम्ती हना, मार दुम ङा? दोपा ब्रोंइनुङा ङा?” दे मिम्ता बाक्त। मिनु परमप्रभु यावे कली “मार दुम्नुङा?” दे हिल्लो पवा बाक्त।
23मिनु परमप्रभु यावेमी मेको कली “इ कोव़जम जात निक्शी ङा मुर बाक्नीसी। मेको जात निक्शी फ्राचा पुंइसीनीस। का अर्को क्येङा बोल्यो बाक्ब। ङोंइती जरमेशो चहिं कान्छा आ गेय पाइब दुम्ब” दे शेंदा बाक्त। उत्पत्ती २७:२९; मलाकी १:२; रोमी ९:१०-१२
24मिनु रेबेकामी आल थिमेनु, जौंले बाक्सा बाक्त।
25मिनु ङोंइती ङा आ रांम वा फेक्शो खोदेंशो पा लल चां पाइश्शो वोंइश आल का थिमाक्त। मिनु मेको कली एसाव नें वोदा बाक्त।
26मिनु नोले आ लोक्बमी आ लोक्ब आ गेंग्रे ग्याइश्शा ग्रूमाक्त। मोपतीके आ नें याकूब वोदा बाक्त। रेबेका आल थिची ना इसहाक ६० बर्स दुम्शो बाक्माक्त। होसे १२:४
27मिनु मेको तौ निक्शी कोल्सानु, एसाव जोक्ब सिखारी दुम्माक्त। नेल्ल नाक्त ब्वाकीम बाक्चा दाक्ता बाक्त। याकूब चहिं ताम्बुम बाक्ब नु रू ङा गेय पा, सिक्सी पा बाक्ब दुम्माक्त।
28इसहाकम एसाव कली दाक्ता बाक्त। मारदे हना आ चाक्शो सिखार ब्ववा बाक्त। रेबेकामी चहिं याकूब कली दाक्ता बाक्त।
29मिनु काबु याकूबमी खोले क्येवानु, एसाव ब्वाकी रे शोव़लु बेक्शा जाक्माक्त।
30मिनु एसावमी याकूब कली “इ क्येशो लल दाल खोले इच्का गेयी। गो शोव़लु बेक्ती” देंमाक्त। मोपतीके एसाव कली एदोम माइश्शो याइनी नें वोइश्शो बाक्माक्त।
31मिनु याकूबमी “मुलाक्ती ङोंइती जरमेशो तौ इ आसीक आं कली गेयी” देंमाक्त।
32मिनु एसावमी “मुल गो बेक्चता ङोंइती जरमेशो तौ आ तचा ङा आसीकम मार दुम्बा ङा?” देंमाक्त।
33मिनु याकूबमी “गो मुलाक्ती गेतन, दे कसम जावो” दे मदा बाक्त। मिनु एसावमी याकूब कली “ङोंइती जरमेशो तौ आं आसीक इ केन दुम्ल” दे कसम जवा बाक्त। उत्पत्ती २७:३६; हिब्रू १२:१६
34मिनु नोले याकूबमी एसाव कली शोब्ले नु दाल खोले ख्रेत्ता बाक्त। मिनु मेको जशा तूशा बोक्शा लमाक्त। मोपा एसावमी “ङोंइती जरमेशो तौ आ ततीक आसीक ममाल्नुङ” दे प्रोना बाक्त।
