Ŋicwofuŋ II 18:18-36

¹⁸Ehuc ŋicwofuŋte mupie ŋic micne ʒiŋuc jaŋe fisimbiŋ: Ŋicwofuŋ ficte micne sâko Eliakim, Hilikiare ŋokâ hâcne, â qâqâreŋ ŋic Sebena erâ Asafare ŋokâ Joa micne sâko‐jeŋic hâcne.

¹⁹Eme Rabasakezi ʒiŋuc jazawec: “Hisikia âzâcneniŋ, ŋicwofuŋ sâko, Asiria ŋicwofuŋ hâcne, e ʒiŋuc mukac: ‘Ʒi wemo wiaczi dapeŋ egareha roweckehuc juekic?

²⁰Go manatec dâŋ sawazi ʒikare mamana â tâpiri bâfuaocmu ekac me? Go morao roweckehuc no râpecnumeŋ?

²¹Ojai, go kâcbiŋ gunu herickekicne keci, Aigita hâcne, erao roweckekomec; eme gunu ira roweckeeŋgopieŋ jaŋe mejeŋic âke mârâŋkeekac i. Eme Aigita ŋicwofuŋ Farao e ŋic sasawa erao roweckeeŋgopieŋ jaŋe iŋuc hâcne ejareekac.

²²Go ʒiŋuc mecne nazacmu, “Nâŋe Wofuŋ Anutu‐nâŋec erao roweckeeŋgopeneŋ.” Hâc, eme weniŋuc? Hisikia e furu mâreŋ â Wofuŋ taha babacnere alata wiac ŋerawec i bârâriehuc Juda â Jerusalem ŋic ʒiŋuc jazawec, “Ŋoŋe Jerusalem haeo alata kecʒirec maŋfuŋko sawa dapehuc numunʒepieŋ,” Wofuŋ Anutu ere mukomec me?

²³Ajoc, bomboŋ‐nane, Asiria ŋicwofuŋ hâcne, ehec fuŋne babataniŋ gie banic me! Eme honenaŋ: No becâsic 2 tauseŋ garepemu, goki ine becâsicko rara ŋic irec sâc jaha sâcne bâfuac‐jopacmu me weniŋuc?

²⁴I eipiehuc ine wemocko bomboŋ‐nanere kiŋaŋŋic wawahane jaŋeraonec momori micne mocjaha mac sâcne jâpetec risieocmu? Eme go iŋucnezi ine keretac â ŋic becâsicko rarare Aigita jaŋerao ʒâŋe fihuc juekic!

²⁵Me weniŋuc? No Wofuŋzi mi mana‐nareha mâreŋ ʒi râsi ecnehuc ima qapemurâ wefupo me? Aricne, Wofuŋ e ʒiŋuc nazawec: Go ferâ mâreŋ keci râsi ecnehuc ima qazemec.’”

²⁶Eme Hilikiare ŋokâ Eliakim â Sebena â Joa jaŋe Rabasake ʒiŋuc âzâcnembiŋ: “Kiŋaŋŋicfâcge nâŋe Aramaio dâŋko dâŋ nâzâzemec, nâŋe dâŋ i sâcne manaŋgopeneŋ; ŋic ŋokac qânâsacko ŋeŋgopieŋ jaŋere maio nâŋehec Hebiraio dâŋko muc manac mi ezemec.”

²⁷Rabasakezi ine muwec: “Hâc, dâŋ bajukopac i bomboŋ‐nanezi ŋoŋe â bomboŋ‐ŋeŋic ŋoŋe sawa ŋazapemurâ sorecnuwec me? Aricne, e ŋic qânâsacko ŋeŋgopieŋ â ŋoŋehec mâmâc ho fâzi‐ŋeŋic nâniŋte mukicne jaŋerao mâmâc mupemurâ sorecnuwec.”

²⁸Rabasakezi iŋuc murâ ra mai domahuc Hebiraio dâŋko hahaŋne bahuc ʒiŋuc muwec: “Ŋicwofuŋ sâko, Asiria ŋicwofuŋ hâcne, ere dâŋ mananiŋ!

²⁹Eki ʒiŋuc mukac: ‘Ŋoŋe Hisikia manacnepie mi eatuc‐ŋopazejec, e nore meonec batarac‐ŋopaocte tâpiri mi focnekac.

³⁰Erâ ʒiŋuc muhuc Wofuŋtao roweckeniŋte ŋazame mi mananʒepieŋ wâc: Wofuŋ e jâmbomac batarac‐nâpoocmu, ehuc hae sâko ʒi Asiria ŋicwofuŋte meo feocte mi manaocmu.’

³¹Asiria ŋicwofuŋzi ʒiŋuc mukacte Hisikia dâŋticne mi mananʒepieŋ: ‘Ŋoŋe nohec wama babac erâ haeonec wahanʒepieŋ; iŋuc erâ ŋoŋe sasawa ŋaŋacne waiŋ â nemuja nâhuc junʒepieŋ, erâ opâ i ŋaŋacne nombâŋkonec fiarâ nâhuc junʒepieŋ wâc.

³²Iŋuc ehuc juhapie noni fâ fisirâ mâreŋ mocko jowac‐ŋopa rapemu, mâreŋ i ŋaŋacne mâreŋ iŋucne, ira padi mecne, waiŋ mecne, nânâ mecne, waiŋ gie mecne oliwa jâc mecne â baŋac mâmâc forakac hâcne. Irec ŋoŋe ira mi hâhâmo juraʒihuc junʒepieŋ. Eme Hisikiazi eatuc‐ŋopahuc ʒiŋuc mume mi mananʒepieŋ: Wofuŋzi batarac‐nâpoocmu.

³³Ŋicguru gâcne jaŋere nemuzi mâreŋ‐jeŋic Asiria ŋicwofuŋ ere meonec moc batarambiŋ me?

³⁴Hamati â Arapada hae jahere nemufâc weni? Sefarawaim â Hena erâ Iwa hae jaŋere nemu jaŋe weni? Â Samaria mâreŋte nemufâc jaŋe weni? Jaŋe Samaria nore meonec moc batarambiŋ me?

³⁵Me mâreŋ irec nemu sasawa jaŋeraonec mozi mâreŋ‐ticne nore meonec batarawecte Wofuŋzi Jerusalem hae nore meonec bataraocte muŋgopieŋ?’”

³⁶Jaŋe ine mâc fâsâerâ domahuc dâŋ moc mi bâtikiecnembiŋ, i ŋicwofuŋte dâŋ moc ʒiŋuc fowecte iŋuc embiŋ: “Ŋoŋe dâŋ moc mi bâtikiecnenʒepieŋ.”