عِسِرَيِلَ مَنفّيٍ ٢ 18:18-36

¹⁸عٍ نَشَ مَنفّ شِلِ مّننِ. شِلِكِيَ شَ دِ عٍلِيَكِمِ، مَنفّ شَ بَنشِ شُنيِ، مَنفّ شَ سّبّلِتِ سٍبٍنَ، نُن عَسَقِ شَ دِ يٌوَ، نَشَن قِندِشِ مَنفّ شَ كّيدِ رَفَتّ رَ، نٍيٍ نَشَ مِنِ عَسِرِيَكَيٍ رَلَندٍ.

¹⁹عَسِرِيَ مَنفّ رَ سِمَ سِنفٍ نَشَ يِ مَسٍنيِ تِ عٍ بّ، «وٌ عَ قَلَ شٍسٍكِيَ بّ، عَسِرِيَ مَنفّ شُنفبٍ يِ نَن مَسٍنشِ، ‹عِ شَشِلِ تِشِ مُنسٍ رَ؟

²⁰عِ وْيّن قُقَقُ نَن تُن قَلَشِ! عِ حْشْ عَ مَ عَ عِ بَرَ قّيرّ نُن سّنبّ سْتْ ﭑ فٍرٍقٍ رَ؟ عِ لَشِ ندٍ رَ، نَشَن عَ نِيَمَ عِ شَ ﭑ مَتَندِ؟

²¹عِ عِ شَ لَنلَنتٍيَ سَشِ مِسِرَكَيٍ نَن مَ قَ؟ عٍ لُشِ عَلْ وُرِ ثٌنثٌي نَشَن فِرَ مَ، عَ قَ عِ سْشْ عِ كِلْنمَ عَ رَ تّمُي نَشّ. مِسِرَ مَنفّ قِرَوُنَ نَ نَ كِ نّ مِشِ بِرِن بّ، نَشٍيٍ عٍ شَشِلِ تِشِ عَ رَ.

²²تّمُندٍ وٌ ﭑ يَابِمَ نّ، «مُشُ شَشِلِ تِشِ مُشُ مَرِفِ عَلَتَلَ نَن نَ.» كْنْ ﭑ شَ عَ قَلَ وٌ بّ شٍسٍكِيَ بَرَ فّ سّرّشّبَدٍيٍ كَنَدٍ فٍيَيٍ قَرِ، عَ قَ عَ قَلَ يُدَيَكَيٍ نُن دَرِ سَلَمُكَيٍ بّ، «وٌ عَلَتَلَ بَتُ دَرِ سَلَمُ شَ سّرّشّبَدٍ فبَنسَن نّ.»›»

²³«شَ عِ سَ نْمَ سٌي رَفِ وُلُ قِرِن سْتْدٍ عِ شَ حَمَ يَ مَ، ﭑ مَرِفِ عَسِرِيَ مَنفّ سٌي قِمَ نّ عِ مَ، عٍ نَشٍيٍ رَفِمَ.

²⁴هَلِ عِ عِ شَشِلِ تِ مِسِرَكَيٍ رَ، سٌي رَفِيٍ نُن فِسٍيٍ شَ قٍ رَ، عِ سّنبّ شُرُن ﭑ مَ مَنفّ شَ مِشِ شُرِ دِ ندٍ نْقٍ رَ.

²⁵بَقٍ نَ رَ، وٌ مَرِفِ عَلَتَلَ شَ مُ وَشِ ﭑ شَ بٍ فٍرٍ؟ عَلَتَلَ نَن عَ قَلَشِ ﭑ بّ، ‹سِفَ، عِ نَ بْشِ كَنَ.›»

²⁶شِلِكِيَ شَ دِ عٍلِيَكِمِ، سٍبٍنَ، نُن يٌوَ نَشَ عَ قَلَ عَسِرِيَ مَنفّ رَ سِمَ بّ، «يَندِ، عِ شَ وْيّن مُشُ بّ عَرَ مِ شُي رَ، مُشُ تَن عِ شَ كٌنيِيٍ نَ شُي قَهَامُمَ. عِ نَشَ وْيّن مُشُ بّ يُدَ شُي رَ حَمَ يَ شْرِ نَشَن نَ تّتّ قَرِ.»

²⁷كْنْ عَسِرِيَ مَنفّ رَ سِمَ نَشَ عٍ يَابِ، «ﭑ مَرِفِ ﭑ شّيشِ يِ مَسٍنيِ قَلَدٍ عِ شَ مَنفّ نُن عِ تَن نَن فبَنسَن بّ؟ ﭑ مُ وْيّنقٍ يِ مِشِيٍ قَن شَ بّ، نَشٍيٍ دْشْشِ تّتّ قَرِ يِ كِ، نَشٍيٍ قَمَ عٍ يّتّ شَ فبِ قُشِ دٌندٍ نُن عٍ يّتّ شْلِ مِندٍ نُن وٌ تَن نَ؟»

²⁸مَنفّ رَ سِمَ نَشَ كٍلِ، عَ عَ قَلَ عَ شُي عِتٍشِ رَ يُدَيَ شُي رَ، عَ نَشّ، «وٌ وٌ تُلِ مَتِ عَسِرِيَ مَنفّ شُنفبٍ شَ مَسٍنيِ رَ،

²⁹‹وٌ نَشَ تِن شٍسٍكِيَ شَ وٌ مَدَشُ، بَرِ مَ عَ مُ قَتَ وٌ رَتَنفَدٍ ﭑ بّلّشّ عِ!

³⁰وٌ نَشَ تِن عَ شَ وٌ مَدَشُ وٌ شَشِلِ تِقٍ عَلَتَلَ رَ، عَ قَلَقٍ رَ، «عَلَتَلَ مُشُ رَكِسِمَ نّ، يِ تَا مُ لُمَ عَسِرِيَكَيٍ شَ مَنفّ سَفٌي.»

³¹وٌ نَشَ وٌ تُلِ مَتِ شٍسٍكِيَ رَ دٍ! عَسِرِيَ مَنفّ يِ نَن قَلَشِ، «شَ وٌ تِن لُدٍ ﭑ مَ يَامَرِ بُن مَ، كَنكَن قَمَ عَ شَ شّي بٌفِسٍيٍ دٌندٍ، كَنكَن عَ شَ كْلْنيِ يٍ مِن،

³²هَن ﭑ سَ قَمَ وٌ شَنِندٍ بْشِ ندٍ مَ تّمُي نَشّ، نَشَن لُشِ عَلْ وٌ شَ بْشِ، مّنفِ نُن وّنِ قَنيِ، تَامِ نُن وّنِ شّيٍ، عٌلِوِ بِلِيٍ نُن كُمِ نَ دّننَشّ. نَ كُي، وٌ بَلٌمَ نّ عَ قَنيِ رَ، وٌ رَتَنفَ قَشّ مَ.» وٌ نَشَ وٌ تُلِ مَتِ شٍسٍكِيَ رَ، نَشَن وَ مَ وٌ مَدَشُقٍ عَ قَلَقٍ رَ، «مَرِفِ عَلَتَلَ وٌن نَكِسِمَ نّ.»

³³سِ فبّتّيٍ شَ عَلَيٍ نْ نّ عٍ شَ مِشِيٍ بَدٍ عَسِرِيَ مَنفّ بّلّشّ عِ؟

³⁴شَمَتَ نُن عَرَثَدِ شَ عَلَيٍ فٌ؟ سٍقَرَوَيِمِ، هٍنَ نُن عِوَ شَ عَلَيٍ فٌ؟ نٍيٍ بَرَ سَمَرِ بَ ﭑ بّلّشّ عِ؟

³⁵حَمَنّيٍ بِرِن شَ عَلَيٍ يَ مَ، عَلَ مُندُن عَ شَ مِشِيٍ رَكِسِشِ ﭑ بّلّشّ عِ؟ عَلَتَلَ تَن نْمَ دَرِ سَلَمُ رَتَنفَدٍ ﭑ مَ؟›»

³⁶حَمَ نَشَ دُندُ، عٍ مُ عَ يَابِ، بَرِ مَ مَنفّ عَ قَلَ نّ، «وٌ نَشَ عَ يَابِ دٍ.»