ZABURA 89:1-13

¹Ɛzɛra buri Etani lɛ̀ɛ. Dikiri, manigↄ̃ lɛ̀ sí n gbɛ̃kɛ yã musu lakanaa sari, manigↄ̃ n náanikɛna kpàkpa kɛ wɛ̃̀ kũ wɛ̃̀ɛo.

²Mani o kũ n gbɛ̃kɛ lakana vĩro, n náanikɛna zĩni pɛtɛna n bɛa zaa musu.

³N pì: Ma bàka kú kũ gbɛ̃ kũ ma sɛ̀ɛo, ma lɛ́ sɛ̀ ma zↄ̀bleri Daudanɛ.

⁴Mani tó a buri gↄ̃ kí ble gↄrↄ sĩnda pínki, mani a kpata gba gbãna ari a buria.

⁵Musudenↄ dì n daboyãnↄ sáabu kpá, Dikiri, malaikanↄ dì n náanikɛna yã o ń kↄ̃kakaranaa gũn.

⁶Zaakũ gbɛ̃ke kú musu kũ à kà Dikiri ũro, malaika ke ni sí lɛkↄ̃a kãaoro.

⁷Luda vĩna dì malaikanↄ kũ ń kↄ̃kakaranan, à naasi vĩ de gbɛ̃ kũ ò likainↄla.

⁸Dikiri Luda Zĩ̀karide, dí mɛ́ à lɛɛlɛ kũnwoo? Ń gbãna kũ náanio vĩ yã sĩnda pínki gũn.

⁹Ndì gbãna mↄ ísiranɛ, tó à sↄ̃ fùtɛ kũ vĩvĩnaao, ndì a gbãna fↄ̃.

¹⁰N Misilanↄ dúgu zↄ̃̀, ò gↄ̃̀ gɛ̀nↄ ũ, n n zãngurinↄ fã̀kↄ̃a kũ n gã̀sã gbãnao.

¹¹Musu bi n pↄ́mɛ, zĩtɛ dↄ bi n pↄ́mɛ, n andunia kàtɛ kũ pↄ́ kũ ò kú a gũnnↄ pínki.

¹²N gugbãnduru kũ gɛ̀nↄmidↄkio kɛ̀, Tabo kũ Ɛmↄ gbɛ̀nↄ dì ayuwii kɛ kũ n tↄ́o.

¹³N gã̀sã bi gbãna pↄ́mɛ, n ↄ gbãna akũsↄ̃ n ↄpla dↄ musu.