Buka Linge 89:1-13

¹Na maskil nina Ethan tana kemana Ezra Lord, inau ku lingea haia nimua na dolo te mua soko, mu ku ladavaghinia haia ghua nimua na utuni.

²Nimua na dolo ke kabu kasila, ma nimua na vetena ke, sopou ngasi vaghaa na parako.

³Ighoe a Lord, to bosa, “Inau tu baubahu kolua David, a nigua tinoni ni lutu tu vilia, mu papari vania te vaghaa eni,

⁴‘Na lei vinavahuhumu kara vunaghi haba haia tua, ma kara tabe ngasilia na malei sopoumu haia tua.’”

⁵Lord, gaira i kokou tara nighi togotogo, na lei totobo uto to gonighi.

⁶Lord, e taho siki sakai kokou te vaghagho ighoe, e taho ghua hei tadira na lei tarunga vetena ke kaekagemu.

⁷Ta didira vaukolu rana tabu tara talumavagho igaa, gaira udolu tara nigho kikinima ghua.

⁸Lord, God, puku ni maana, taho tua hei ke sule vaghagho ighoe vamua to utuni tana lei totobo soko.

⁹Ighoe to vunaghina na tahi, mana bona te tughuru mai ga na maraghata, to bosa vania na tahi ge beata.

¹⁰Ighoe to lagavulea Rahab, mo havukaghinira ghamua na kana nia na limamu.

¹¹Na maramana i kokou a nimua, mana maramana i ani pari ghua a nimua, ighoe to gonia na maramana talighu mana lei totobo soko ilokana.

¹²Ighoe to gonia i ulu mi boko, na ghotu i Tabor, mana ghotu i Hermon toro holohabaa na ahamu.

¹³Ighoe to loghoa na maana sule ngangata, e sule ngangata na lagamu!