ZABURA 18:2-42 - Luda yã takada kũ Bisã yão

ZABURA 18:2-42

Click on verse(s) to share them!

²Dikirimɛ ma gbɛ̀si ũ kũ ma zɛki gbãnao, ma surabariimɛ. Ma Ludamɛ ma zɛki gbãna ũ, madì nai. Àkũmɛ ma sɛ̃gbako ũ, ma surabari gbãna kũ ma guleio.

³Dikiri kà ò a sáabu kpá. Madì a sísi, àdi ma bo ma ibɛrɛnↄ ↄĩ.

⁴Gó'itɛ vlɛ̃̀ kũmao, ípaka kũ àdi ń kakatɛ tɛni ma ble.

⁵Mira bànↄ lìkamai, ga tankutɛ kpàkpamɛnɛ ma arɛ.

⁶Kũ má kakũnna, ma Dikiri sìsi, ma wiki lɛ̀ ma Ludaa, akũ à ma kòtoo mà zaa a bɛa, ma wiki kà à kĩnaa, à gɛ̃̀ a sãn.

⁷Zĩtɛ lùkaluka à yĩ̀gãyĩgã, kpinↄ dègedege ari ń zĩnin. Ò lùkaluka kũ à pↄ fɛ̃̀ yãi.

⁸Túsukpɛ bò a yĩn, tɛ́ kũ àdi ń kpata bò a lɛ́n, a yↄ̃̀nↄ tɛn tɛ́ kɛ a arɛ.

⁹À musu wɛ̃̀ à kìpa, legũ sìsi a gɛ̀sɛ gbáru.

¹⁰Àtɛn vura dina kɛrubu kpɛ, àtɛn yàa kɛ ĩala.

¹¹À gusira dà a zĩdala, ludambɛ sira kũ̀ a kúkila.

¹²Zaa a gakuri tɛ́kɛnaa gũn legũ tɛn sisi, legũgbɛ tɛn kↄtɛ, legũ tɛn pi pãsĩpãsĩ.

¹³Dikiri pàta zaa musu, Luda Musude kòto dↄ legũpũtãna ũ.

¹⁴À kàa fã̀ ma ibɛrɛnↄa à ń fãkↄ̃a, à tò legũ pìḿma à pɛ̀ḿma.

¹⁵Kũ n pataḿma Dikiri, kũ n pↄ́ bò n yĩn, ísira zĩtɛ bò gupuraa, andunia zĩni gↄ̃̀ katɛna punsi.

¹⁶À ↄ bò zaa musu à ma kũ, à ma bo swada gũn.

¹⁷À ma si ma ibɛrɛ gbãna ↄ̃i kũ ma zãnguri kũ ń gbãna demalanↄ.

¹⁸Ò lɛ̀tɛma ma sunyĩkɛgↄrↄa, ama Dikiri zɛ̀ kũmao.

¹⁹À ma bo à ma gba mɛ̀poroki, à ma sura bà kũ à yemai yãi.

²⁰Dikiri yã kɛ̀mɛnɛ ma nɛ̀sɛmana lɛ́n, à fĩna bòmɛnɛ ma gbãsĩsarikɛna lɛ́n.

²¹Zaakũ má Luda yãditɛnanↄ kũna, mádi yã vãni kɛ ma a Luda tònlo.

²²A dokayãnↄ dìgↄ̃ domɛnɛ arɛ pínki, mádi kpɛ li yã kũ à dìtɛnↄnɛro.

²³Ma kunna taari vĩ Dikirinɛro, má a zĩda kũna durunna sari.

²⁴Dikiri fĩna bòmɛnɛ ma nɛ̀sɛmana lɛ́n, zaakũ à è má kun gbãsĩ sari.

²⁵Náanidemɛ n ũ náanidenↄnɛ, taarisaridemɛ n ũ taarisaridenↄnɛ.

²⁶Ń swáswa gbɛ̃ swáswanↄnɛ, ama ndì kisira li gbɛ̃ dↄ̀rↄsaridenↄi.

²⁷Ndì zĩdabusarinↄ sura ba, ndì zĩdabirinↄ lago.

²⁸Dikiri, ndì ma fitila tɛ́ tó nana, ma Luda, ndì ma gusira litɛ gupura ũ.

²⁹Kũ n gbãnao mani fↄ̃ mà kùsɛ kpá karaa, ma Luda gãi mani fↄ̃ mà vĩ gbĩ̀la.

³⁰Luda díkĩna sↄ̃ a yãkɛna bↄtɛna. Dikiri yã mamberu vĩro, à swáswa. À de sɛ̃gbako ũ gbɛ̃ kũ ò nàinↄnɛ.

³¹Dikiri baasiro, dímɛ Luda ũu? Ó Luda baasiro, dín gbɛ̀si ũu?

³²Luda mɛ́ àdi ma gba gbãna, àkũ mɛ́ àdi zɛ́ poromɛnɛ súsu.

³³Àdi tó ma gbá kãi gↄ̃ nna lán zↄ̃ pↄ́ bà, àdi tó màgↄ̃ táa o guleinↄ musu.

³⁴Àdi zĩ̀kanaa dadamɛnɛ ari ma gã̀sã ni fↄ̃ à mↄ̀gotɛ̃ sá gá.

³⁵Ndì n zĩ̀blesɛ̃gbako kpáma, ń ma kũna n ↄplaa, ndì natɛ ǹ ma tↄ́ bo.

³⁶Ndì ma zɛ́ yàasa kũmɛnɛ de ma gbá sún sataro.

³⁷Ma pɛtɛ ma ibɛrɛnↄi ma ń kũkũ, mádi ɛra ma suro, sé ma gɛ ma ń dɛdɛ.

³⁸Ma ń zↄ̃zↄ̃, odi fↄ̃ ò fùtɛ doro, ò lɛ̀tɛ ò gↄ̃̀ katɛna ma gbá lɛ́i.

³⁹N ma gba gbãna ma zĩ̀i kào, n tò ma ibɛrɛnↄ mìi nàtɛmɛnɛ.

⁴⁰N tò ma zãngurinↄ kpɛ lì, akũ ma a ibɛrɛ pìnↄ kàkatɛ.

⁴¹Ò wiki lɛ̀, gbɛ̃ke dí ń sura baro, ò lɛ́ zù Dikirii, adi weḿmaro.

⁴²Ma ń kɛ́ nɛ́kunɛku lán bùsutiti kũ ĩa sɛ̀tɛ bà, ma táa òḿma lán zɛ́ gũn bↄkↄtↄ bà.