Psalm 18:2-42

²LEUM GOD El eot ku luk, El nien wikla luk. God luk El mwe loeyuk luk, Ke nga muta yorol nga moul. El lisringyu oana sie mwe loeyuk; El loangeyu tuh nga in moul.

³Nga pang nu sin LEUM GOD, Ac El moliyula liki mwet lokoalok luk. Kaksakin LEUM GOD!

⁴Mwe fosrnga lun misa apinyula, Ac noa lun kunausten toki nu fuk.

⁵Mwe fosrnga lun misa rauniyula, Ac mwe kwasrip lun kulyuk sruokyuwi.

⁶In ongoiya luk, nga pang nu sin LEUM GOD; Nga pang nu sin God luk Elan kasreyu. In Tempul lal El lohng pusrek, Ac El porongo pusren tung in kwafe luk.

⁷Na faclu rarrar ac usrusryak; Pwelung lun eol uh mukuikui ac kusrusrsrusr, Mweyen God El kasrkusrak.

⁸Kulasr fofosryak liki infwacl. Sie e in kunausten ac mulut fol sikyak liki oalul.

⁹El ikaselik yen engyeng uh ac oatui Wi sie pukunyeng lohsr ye nial.

¹⁰El sohksok mui fin sie cherub, Ac eng uh okulla arulana mui, oana sohk lun sie won.

¹¹El nokmulla ke lohsr; Pukunyeng matoltol, su sesesla ke kof, raunella.

¹²Af yohk kosra ac e firir Tuku liki sarom uh ye mutal Ac kunauselik pukunyeng lohsr matoltol uh.

¹³Na pusren LEUM GOD ngirla oana pusren pulahl inkusrao me, Ac pusren El su Fulatlana lohngyuk.

¹⁴El pusrukla pisr natul, ac akfahsryelik mwet lokoalok lal; Ke sarmelik lun sarom, El oru elos kaingelik.

¹⁵Kapin meoa uh wanginla ma oan fac, Ac pwelung in faclu ikakelik, Ke kom mulat nu sin mwet lokoalok lom, O LEUM GOD, Ac ngirla nu selos ke kom kasrkusrak.

¹⁶LEUM GOD El saplakme lucngi ac sruokyuwi; El amakinyuyak liki inkof loal.

¹⁷El moliyula liki mwet lokoalok kulana luk Ac lukelos nukewa su srungayu — Elos arulana kula nu sik.

¹⁸Ke nga muta in ongoiya, elos lainyu, Tusruktu LEUM GOD El loangeyula.

¹⁹El eisyula liki mwe fosrnga; El moliyula mweyen El insewowo sik.

²⁰LEUM GOD El ase lacnen orekma suwohs luk; El akinsewowoyeyu mweyen wangin mwetik.

²¹Nga akos na ma sap lun LEUM GOD; Nga tiana forla liki God luk.

²²Nga karinganang ma sap lal nukewa; Nga tia seakos ma El sapkin.

²³El etu lah wangin ma sutuu luk, Ac lah nga sifacna taranyu tuh nga in tia oru ma koluk.

²⁴Ke ma inge El ase lacnen orekma suwohs luk; Mweyen El etu lah wangin mwetik.

²⁵O LEUM GOD, kom oaru nu selos su oaru nu sum; Kom arulana wo nu selos su moul suwohs.

²⁶Kom nasnas nu selos su nasnas, A kom kwaselos su koluk.

²⁷Kom molelos su inse pusisel, Ac kom akpusiselyalos su inse fulat.

²⁸O LEUM GOD, kom ase kalem nu sik; Kom sisla lohsr likiyu.

²⁹Kom ase ku luk in lain mwet lokoalok luk, Ac akkeyeyu in fanyak ac sasla pot ku lalos.

³⁰God se inge — ma nukewa El oru arulana suwohs! Kas lal uh arulana fal in lulalfongiyuk! El oana sie mwe loeyuk Nu selos nukewa su suk molela sel.

³¹LEUM GOD El mukena God; El mukena mwe molela nu sesr.

³²El pa God su oru tuh nga in ku, El oru inkanek luk in misla ac wo.

³³El oru falkuk in okak oana falken kosro deer; El karinginyu ke nga fahsr fineol.

³⁴El akpahyeyu nu ke mweun, Tuh nga in ku in orekmakin mwe pisr kulana.

³⁵O LEUM GOD, kom karinginyu ac moliyu, Ac ku lom sruokyuwi in misla. Kasru lom akmwetyeyu.

³⁶Kom karinginyu tuh in tia sruhu nga, Ac nga soenna ikori.

³⁷Nga ukwe mwet lokoalok luk ac sruokolosi; Nga tia tui nwe ke na nga kunauselosla.

³⁸Nga srunglulosi ac elos tia ku in tuyak; Elos kutangyukla ac oan alapla ye mutuk.

³⁹Kom ase ku luk in mweun, Ac se kutangla nu sik fin mwet lokoalok luk.

⁴⁰Kom oru tuh mwet lokoalok luk in kaing likiyu; Nga kunauselosla su srungayu.

⁴¹Elos tung ac siyuk kasru, a wangin mwet molelosla; Elos pang nu sin LEUM GOD, a El tiana topuk.

⁴²Nga itungulosi, ac elos ekla oana kutkut Su eng uh okla. Nga fotongolosi oana fohk furarrar inkanek uh.