SALMOS 18:2-42

²Le', X̱ana' Dios, nako' ka to yej gan zoa' choch, na' nako' ka to yo'o ẕen gan yo'o chawa'a. Nako' Benne' weslá chia', na' Dios chia'. Le' ẕzoa chocho' neda', na' wx̱én ḻaža'a Le'. Žape chi'o neda', na' žesló' neda', na' ẕkache' chawo'o neda'.

³Ẕnnia': X̱anžo Dios žaḻa' wká'n ẕenžo-ne'. Beslé' neda' ḻo na'gak benne' ka' ẕžá'agake' neda'.

⁴Wzóa' ḻo da' zede che yeḻa' got, na' gok da' ẕinnj ka to yegw nis da' bcheben neda'.

⁵Gota' ẕož chia' choa'a ḻo yi' gabíl dan' wzóa' ḻo da' zede che yeḻa' got.

⁶Ḻo da' ẕžia yin' benách ka' bḻiža' X̱ana' Dios na' bcháḻjḻenkza' Dios chia'. Ḻe' benle' chi'a gan zoe' latje la'y chie', na' bze nage' da' bchaḻja' ḻawe'.

⁷Naž wẕó' yežlyó nga. Wẕízegak ya'a ka' gže'. Wẕízeḻe'egaken dan' bže'e Ḻe'.

⁸Bžoj žen che yi' ḻo ẕine'e, na' bžoj yi' ḻo žoe'e da' bzeyen da' zej že' ḻawe', na' yi' na' bẕenen bzio' yi' ka'.

⁹Bsaljwe' ya'abá, na' betje', na' wzóa da' choḻ ẕan ni'e.

¹⁰Wdíe' ḻo be', ne ži'e to da' nzin' kerubín. Ka' gaze wdíe' ḻo be' bdone'.

¹¹Gokwe' da' choḻ, dan' bkachen' Ḻe', dan' naken bejw gasj da' yožen nis.

¹²Ḻo da' žákti'teḻe'e chie' bžojgak bejw gasj ka'. Bžojgak wzió' yi', na' yej nis.

¹³Ẕan ya'abá wnné wzió' che chi'i X̱anžo Dios, na' benle chi'i Dios ẕente ládjwgak wzió' yi' ka', na' yej nisen'.

¹⁴Bsie' yag ntóche'do' chie' ka', na' besḻase' benne' ka' bi ẕḻé'egekle' neda' chawe'. Bsane' yes wzió' ka', na' bžia yi'e benne' ka'.

¹⁵Naž bḻa' ḻawgak da' ka' zej že' gže' ẕan nisdo', na' bḻa' ḻaw x̱ni'a yežlyó dan' žen' ẕan nisdon'. Bdiḻo' benne' ka' ẕžá'agake' neda', X̱ana' Dios, na' ḻo yeḻa' ẕža'a chio' bsejo' x̱nézgake'.

¹⁶Betj Dios ḻo da' sibe, na' bex̱we' neda', na' ḻen ne'e waḻe bebeje' neda' ḻo da' zede da' goken ka nis zil.

¹⁷Beslé' neda' ḻo na'gak benne' waḻe ka', benne' bi ẕḻé'egekle' neda' chawe', na' ḻo na'gak benne' ka' ẕží'igake' chia' neda', benne' ka' zej nakže' waḻe ka neda'.

¹⁸Bdíḻ-ḻengake' neda' katen' wzóa' ḻo da' zedḻe'e, san X̱ana' Dios gókḻene' neda'.

¹⁹Bebeje' neda' gan wyoá'a, na' bzoe' neda' to latje ẕen. Beslé' neda' dan' wyáz ḻaže'e neda'.

²⁰X̱anžo Dios bebi'e chia' dan' bena' da' naken chawe', na' ka nakkze da' chawen' bebi'e chia',

²¹dan' žona' ka žsedle X̱ana' neda', na' bi wléj yichja' Dios chia'.

²²Žona' ka nak da' bchi'le' žo'o, na' bi bsana' diža' ka' da' bdix̱jwe'.

²³Goka' ḻi ḻaže' ḻawe' Ḻe', na' wdape chi'i kwina' nich bi gona' da' ẕinnj.

²⁴Bebí'i X̱anžo Dios chia' ka nak da' chawe' da' bena', ka nakkze da' chawen' dan' bena' ḻawe' Ḻe'.

²⁵Žeyache' ḻáže'lo' no benne' žeyache' ḻáže'le' lježe', na' nako' ḻi ḻaže' ḻen bennen' nake' ḻi ḻaže'.

²⁶Ẕcháḻjḻeno' benne' chawen' da' naken dot chawe', na' gako' snia ḻen benne' wen da' ẕinnj.

²⁷Yesló' benne' chawen' ḻo da' wžía yin' benách ka', san wzex̱jo' benne' ka' ẕka'n ẕen kwíngake'.

²⁸Le' wzaljo' yi' chia'. Le', X̱ana' Dios, wza'ni'o chia' gan zoa' ḻo da' choḻ.

²⁹Yeḻa' wak chio' wžía yin' benne' zanḻe'e, benne' ka' žjake' ḻo wdiḻe. Cha' Le', Dios, sóaḻeno' neda', wak wchinnja' ze'e ka' žape chí'igaken yež ka'.

³⁰Da' ka' žon Dios zej naken ḻi ḻaže', na' x̱tiže'e naken dot da' li. Žape chi'e yógo'te benne' ka' žx̱en ḻáže'gake' Ḻe'.

³¹Toze X̱anžon' nake' Dios. Toze Dios chežo nake' Benne' žape chi'e žo'o.

³²Dios nake' Bennen' žone' neda' benne' waḻe, na' Benne' žeyone' ḻi ḻaže' da' žona' neda'.

³³Žone' ni'a ka zej nak ni'a bžina' yix̱e' na' ẕzoa choche' neda' ḻaw Ya'a Sión chie'.

³⁴Žsedle' neda' nich gak cha'a ḻo wdiḻe, na' nich gak wlewa' da' žsi yag ntóche'do' ka', dan' naken ya bronse.

³⁵Ḻo yeḻa' žeslá chio' wdape chi'o neda', na' ḻen no'o ḻi ža gókḻeno' neda'. Ḻo yeḻa' ži'i ḻaže' chio' bka'n chawo'o neda'.

³⁶Ben chawo'o nez gan tia', na' bi kwila' ḻo nezen'.

³⁷Bsejwa' x̱nezgak benne' ka' ẕžá'agake' neda', na' bena' ga bẕónnjgake', na' bi beyá'a liža' ga bžinte beta' benne' ka'.

³⁸Bena' benne' ka' we', na' bi gok yeyásgake'. Bejbíx̱gake' ẕan ni'a.

³⁹Ben chocho' neda' nich gok cha'a ḻo wdiḻen'. Bzex̱jo' benne' ka' ẕžá'agake' neda' ẕan ni'a.

⁴⁰Beno' bẕonnjgak ḻawa' neda' benne' waḻe ka', na' bžia yi'a benne' ka' bi ẕḻé'egekle' neda' chawe'.

⁴¹Wnnábgekle' no benne' gákḻene' ḻégake' san bi wzóa no benne'. Wnnábgekle' X̱anžo Dios, san bi wzé nage' chégake'.

⁴²Bžia yi'a benne' ka', na' gókgake' ka bix̱te yo dan' ẕzen ḻo be'. Bleja' ḻégake' ka ẕleja' gona' ḻo nez ka'.