Psalm 18:2-42

²Ieowa ai paip, ai kel, ai saundor ai Kot, ai paipalap, me i kin liki, pere pa i, menkamaur pa i o sile pa i!

³I kin ngidingid ong Ieowa, me kaping en ko ong, o i pan dorela sang ai imwintiti kan.

⁴I lodi onger sal en mela kan, o pilap en Pileam akan kamasak ia er.

⁵Sal en wasan mela kol ia dier, o sal en mela kaloe ia dier.

⁶Ni ai masak i likwir ong Ieowa o weriwer ong ai Kot; I ap kotin ereki ngil ai sang nan tanpas a, o ai likwir lel ong karong a kan.

⁷Sappa rerer o mokidedar, o pason en nana kan ititekok o rerer, ni a kotin ongiongidar.

⁸Atiniai koda sang nan silang i, o kisiniai kelail sang nan au a, ap kareda liol.

⁹O a kotikidier nanlang o kotidido, o rotorot impan aluwilu a kan.

¹⁰O a kotikot pon Kerup amen o kotin pirwei, o a kotin dake pa en ang.

¹¹Tanpas a im pwal iei rotorot, o katau laud, o tapok rotorot, kapil pena i.

¹²Lingan me mi mo a, kamueit pasang tapok kan iang akel o liol.

¹³O Ieowa kotin wiadar nansapwe nanlang, o me Lapalapia kotin poronelar kapit i iang akel o liol.

¹⁴A kotin kasik wei sapwilim a kanang en kasik katieu, o kotin kamueit irail pasang. A kotin wiadar liol toto o kamasak irail adar.

¹⁵Al en pil akan ap sansaladar, o pason en sappa weiweidar ki ar ongiong Maing, mon ang en silang omui.

¹⁶A kotikidier lim a sang nan wasa ileile, a kotin kol ia di o kotin api ia dar sang nan pil kalaimun akan.

¹⁷A kotin dore ia la sang ai imwintiti kelail akan, sang ir, me kailong kin ia, ir me i sota itar ong.

¹⁸Irail kaloe ia dier ni ai ran apwal, a Ieowa kotin wialar sauas pa i.

¹⁹O a kotin kalua ia wasan saladok, a kotin kamaio ia da, aki a kotin kupukupura ia.

²⁰Ieowa kin kotin sauasa ia duen ai pung, a kotin katingi ong ia duen makelekel en pa i kan.

²¹Pwe i kin weweid nani al en Ieowa, o i sota kin katiwo ong ai Kot.

²²Pwe a masan akan mi mo i, o i sota pan kase sang ia a kusoned akan.

²³Pwe ngai unsokalar mon silang i o suedeki ai sapung.

²⁴O Ieowa kotin katingi ong ia duen ai pung, o duen makelekel en pa i kan mon silang i.

²⁵Komui me kalangan ong me mau kan, o lelapok ong me lelapok kan,

²⁶O makelekel ren me makelekel akan, o sapung ren me sapung kan.

²⁷Pwe kom kin kotin dorela aramas luet akan, ap kadukiedi mas en me aklapalap akan.

²⁸Pwe kom kin kotin kamaraini ai lamp, Ieowa ai Kot kin kamaraini ai rotorot.

²⁹Pwe ni ai iang komui i kak kaloedi karis en saunpei kan, o ni ai iang ai Kot, i kak luswei pon kel takai.

³⁰Al en Kot me unsokala; masan en Ieowa me makelekel. I pere pan karos, me liki i.

³¹Pwe ia amen Kot impan Ieowa, de ia paip eu impan atail Kot?

³²Iei Kot, me kotin aude kin ia manaman, o kaunsokala al ai.

³³A kin kotin wiai ong nä i kan dueta nä en tia, o kotin kasapwil ia dang wasa ileile.

³⁴A kotin padaki ong pa i kan tiak en mauin o, pwen kak ong kaonopada kasik katieu mata.

³⁵Kom kotiki ong ia pere pan maur omui, o lim omui pali maun kamana ia da, o omui opampap me kasapwil ia da.

³⁶Kom kotin kaonopadar al, me i pan weweid ia, pwe nä i kan ender krisedi.

³⁷I pan tang wong ai imwintiti kan o kono irail edi, o i sota pan puredo, lao karos lodier.

³⁸I pan kamor irail pasang, re sota pan kak palian ia, o re pan pupedi ong pan nä i kan.

³⁹Kom kak kamana kin ia omui manaman ong ni pei; Kom kak kasedi ong pan nä i kan karos me palian ia.

⁴⁰Kom kin kotin kaloedi ong ia ai imwintiti kan, pwen kawela, me kailong kin ia.

⁴¹Re kin likelikwir, a sota sauas parail ren Ieowa, a sota kotin sapeng ir.

⁴²I pan suk irail pasang dueta pwel par nan kisiniang; i pan kase ir ala dueta pwel samin sang nani al o.