YOWAANA 12:14-25

¹⁴Yeesu wut cumbur, war ko; ndaxte Mbind mi nee na:

¹⁵«Buleen ragal, waa Siyoŋ. Gis ngeen, seen buur a ngi ñëw, war mbaam mu ndaw.»

¹⁶Yooyu yépp, taalibe ya xamuñu woon ca saa sa lu muy tekki; waaye gannaaw bi ndamu Yeesu feeñee, ñu fàttaliku ne, Mbind mi yégle woon na loolu ci moom, te amal nañu ko.

¹⁷Ña nekkoon ak Yeesu ñépp, bi muy wooyee Lasaar mu génn ca bàmmeel ba te mu dekkal ko, demoon nañu, nettali la ñu gis.

¹⁸Looloo tax mbooloo ma teeru ko, ndaxte yégoon nañu firnde jooju.

¹⁹Farisen yi nag di waxante naan: «Gis ngeen, manuleen ci dara; ñépp a ngi koy topp!»

²⁰Ca mbooloo ma, amoon na ca ay Gereg yu bokk ca ña ñëwoon Yerusalem ngir jaamu Yàlla diirub màggal ga.

²¹Ñëw nañu ci Filib, mi dëkk Betsayda ci diiwaanu Galile, ne ko: «Sang bi, danoo bëggoona gis Yeesu.»

²²Filib dem wax ko Andare; ñu ànd, waxi ko Yeesu.

²³Mu ne leen: «Waxtu wi ñu wara feeñale ndamu Doomu nit ki jot na.

²⁴Ci dëgg-dëgg maa ngi leen koy wax, fi ak peppu dugub ji wadd ci suuf jaarul ci dee, du mana weesu li mu doon: pepp doŋŋ. Waaye bu deeyee, dina jur pepp yu bare.

²⁵Ku bëgg bakkanam dina ko ñàkk, waaye ku ko bañ ci àddina sii, dina ko denc ngir dund gu dul jeex gi.