ዮሓኒሴ 12:14-25

¹⁴ዬሱሴ ሃሬ ናይ ዻካ'' ዴንቃዖ ዒማ'' ቶጌኔ፤ ዬይ ያዺ ማዔሢ፦

¹⁵«ሃና'' ኔኤኒ፥ ፂዮኔ ካታሜሌ፥ ዬሩሳላሜ ዒጊጪፖ፤ ሓይሾ ኔኤኮ ካኣታ''ሢ ሃሬ ናይ ቶጊ ሙካኔ» ጌይንቲ ፃኣፒንቴሢ ኩማንዳጉዲኬ።

¹⁶ዬሱሴኮ ጊንፆ ሃንታዞንሢም ዬይ ባካ ቤርታ ዔርቲባኣሴ፤ ጋዓንቴ ዬሱሴ ቦንቾና ሌካ ጫሪንጮ ዔውቴ ዎዶ''ና ዬይ ባካ ዒዛ ዛሎ'' ፃኣፒንቴሢና ሃሣ ዒዛም ማዺንቴሢ ዔያታ ጶቂሲ ዔሬኔ።

¹⁷ዬሱሴ ዓላዜሬ ዱኡፓፓ ዔኤሊ''፥ ሃይባ''ፓ ዔቂሳማና ዒዛና ዎላ'' ዓኣ ዓሳ ቢያ ዒዚ ዓላዜሬ ሃይባ''ፓ ዔቂሴሢ ማርካዻኔ።

¹⁸ሚርጌ ዓሳ ዬሱሴ ጎይሣ ዔካኒ ኬስኬሢ ዬያ ፆኦሲ ዎልቆና ማዺንቴ ዓኮ ባኮ ዒ ማዼሢ ዋይዜሢሮኬ።

¹⁹ዒማ''ና ፔርሴ ዓሳ፦ «ሃኣዛጉዋቴ፤ ዴራ'' ቢያ ዒዛ ጊንፆ ኬስኬኔ! ኑ ፔቴ'' ባኣዚ''ታዖ ማዻኒ ዳንዳዑዋኣሢ ዒንሢ ዛጋ?» ዎሊ ኮይላ'' ጌዔኔ።

²⁰ዬኖ ቦንቾ ኬሎ''ና ዚጊ ካኣሽኮሮ ዬሩሳላሜ ዓኣዼ ዓሶ ባኣካ'' ፔቴ'' ፔቴ'' ጊሪኬ ዓጪ ዓሲ ዓኣኔ።

²¹ዔያታ ጌሊላይዳ ቤቴሳይዳ ጌይንታ ዓጮ'' ዓሢ ማዔ፥ ፒልጶሴ ኮራ ሙኪ፦ «ጎዳሢዮ! ዬሱሴ ዛጋኒ ኑ ኮዓኔ» ጌዔኔ።

²²ፒልጶሴ ዴንዲ ዒንዲራሴም ኬኤዜኔ፤ ዬካፓ ዒንዲራሴና ፒልጶሴና ዴንዲ ጊንሣ ዬሱሴም ኬኤዜኔ።

²³ዬሱሴ ዔያቶም፦ «ሓይሾ ዓካሪ ዓሲኮ ናዓሢ ቦንቺንታ ዎዳ'' ሄሌ''ኔ፤

²⁴ጎኔ ታ ዒንሢም ጋዓኔ፤ ዓሲ ሃይቂ ዱኡታሢጉዲ ጉምቡሦኮ ፔቴ'' ዓኣፒ ዱኡቂንቲባኣያታቴ ፔኤሮ ሌሊ ማዒ ዓታኔ፤ ጋዓንቴ ዱኡቂንቴያታቴ ሚርጌ ዓኣፒ ዓኣፓኔ።

²⁵ፔኤኮ ናንጎ ፆኦሲፓ ባሼ ናሽካሢ ባይዛንዳኔ፤ ሓያ ዓጮ''ይዳ ፔ ናንጎይዳፓ ባሼ ፆኦሲ ናሽካሢም ጋዓንቴ ናንጊና ናንጊ ጊኢጊ ዓኣኔ።