Jon 12:14-25

¹⁴Areme Jesu fun buk akaij ijia usuibe bu isoime kuainva ijeg fun fanuf be bu kua maf-donkino kuavo ijefuon azan ijia ajie fine Jerusarem vain. Regavo vuak iji bu ijeg isoi,

¹⁵E mai Zaionko iji E Kin jon iji fu maf-donki uka iviamkor azan ijia ajie fine rokno jab jukno kuain.

¹⁶Regavo e Jesuon vuak faivo iji bu unam kafokafo e iji bu Jesu fak rejo iji bun giain revo buka ba mukoi vierafen. Bu vake ijiason bu Jesu kanava fu guamga Godri kuamga fu una unam sanainma ijia uriga bu ijia vierafen. Bu vierafero vuak gami bu usuibe buk akaij ijia isoime kuainva iji bu fuifuon kuainva ijefuon bu fu abe ijegredainvaro bu ijeg vierafen.

¹⁷E iji bu ni buon ijia ireme gako Jesu fu Rasaras bu unainva ijia kuamga fu una uri keko roka bu gainva ijieb vuak ijin dab kuaime iravain.

¹⁸E fok bu unam sumakin darokin iji fu renma iji fainva ijefuon bu usem unam gafia Jesu biekuai vain.

¹⁹E Ferisis roin bu oknum iji giame kuai, Jam garaiji giaf. E fok buka biom fu ma vierafeknum dab arafiri vak. Regavo noiji no izegrenva ijefuon no bu ijia areme una fu dab arafiri vakno kuain.

²⁰Regavo e Griko roin bu Jerusarem ijia tavan Fasova iro iji bu ikrejo ijia sirimamekuai ruain.

²¹Ijefuon bu usem e Firif ai Besaida Gareri guf ijia ruainma ijin bieme kua, No Jesu gakuai vierafenvano kuain.

²²Bu ijeg kuavga Firif fun va Edru kuame busik bun vake Jesu fino ijia usem e iji bu kuardiainva ijeg fu kuardain.

²³Bu ijeg kuardava Jesu fu una roin kia, Tavan iji God fu Ema buon Farif iji abe fuon izeg fu kege ruainma ijefuon aroime kuaga fu fuon sanainma ijia fikfuon iji fun igijar.

²⁴Regavo vuak igi naka ma kuardiavno faif. Ire ufien sunin besum fu vek an ijia kira sairekma iji fu izeg una madu moik ijia arime una uruvana tavuakma bakin. Regavo ufien iji fu saireme una dabuiko moik ijia arikma ijar fuka uruvana tavuak.

²⁵Regavo erar fu moikigia tavan bog fuon vierafenma iji oijmaknum kegokma rad fu una izeg unam ma karivako iji abekma bakin. Regavo erar fu moikigia tavan bog una e roin vierafeknum oijmiame ifejdiaokma fu rad unam ma fivako iji abek.