Juan 12:14-25

¹⁴Iemo Jesús burro baillano afe emódomo ráɨnade, jaiai Cuegáuai daɨna izói; be nɨ́ɨuai:

¹⁵“Sión comɨnɨ omoɨ jacɨ́ruiñeno. Erocai, o Illaɨma búrrodo ráɨicabite.”

¹⁶Nanómona ie llófuegamacɨ aféfuiaɨna cacáñediaɨoɨ. Ie méifodo ebírenafue Moo íemo nitaca mei, ie tɨ́illanomona meine abɨdo cáatallɨruimo, nana afémɨeri Cuegáuaimo uíbicaidiaɨoɨ. Daje izói íemo daɨí fɨnócafuemo uíbicaidiaɨoɨ.

¹⁷Lázaro jino raɨáfomona uáiduaruido aillo comɨnɨ Jesúoɨri ite. Ua Lázaro tɨ́idɨmacɨmona abɨdo cáanana cɨódɨno afe íaɨoɨ cɨónafuena lluájidiaɨoɨ.

¹⁸Ie jira comɨnɨ Jesuna caɨmare baizájidiaɨoɨ, afe cɨ́ofɨnina ie fɨnócafue íaɨoɨ fɨdɨna jira.

¹⁹Jira fariséuaɨ danɨ daɨdíaɨoɨ: —Ja cɨódɨomoɨ, jaca nɨe izói ñénide. Erocai, nana comɨnɨ íedo jáidiaɨoɨ, —daɨdíaɨoɨ.

²⁰Rafue illa dɨno acádoillena Jerusalemo bitɨ́macɨ cɨ́gɨmo dáarie griego ímɨiaɨ ite.

²¹Afémacɨ Felípemo áɨnozidiaɨoɨ. (Felipe Galilea ímɨe; Betsaida jofue ímɨe.) Aɨnozillano íemo izire jɨcánotiaɨoɨ: —O onógamɨe Jesuna cɨóiacadɨcaɨ, —daɨde.

²²Jira Felipe Andrena daɨízaide. Iemo afe íaillɨnoɨ Jesumo lluájide.

²³Ie jira Jesús ie abɨna úrillano daɨde: —Nanoide Iima Jitomo ebírenafuena nitállɨruimo ja dúcɨde.

²⁴Uáfuena ómoɨna dáɨitɨcue, daa güiga raa ido énɨemo ríñenia, tɨ́iñenia, jaca naɨ dáajɨna jóoide; mei íadɨ afejɨ ríllamona tɨ́idena eroide zɨ́cuamona aillo aite.

²⁵Daje izói dáamɨe ie cáaillɨnona dama íeɨena rairuíadɨ, áfena féitaite, mei íadɨ dáamɨe ie cáaillɨnona bie énɨemo jámairuiadɨ, áfena zíiñona cáaillɨnomo éenoite.