YOHAAN 2:13-25

¹³Dhali Mompe’kup̱anyolos gi ’Kwani Yahuuda/ dishki’d mo dhala Yesus yaki’d ka gagamis e Pa Urushaliim mo be.

¹⁴Dhali e gu’b gi mondheleladhelel mo tani a’di gamki uni gwansan kun ’kokin mo mmoyola morbip̱ mo dhali ḵa’bal mo dhali gurko/ mo, dhali uni kun ta imanwan emena guurush mo eya ṯu’c buni mo be.

¹⁵Dhali a’di ki ṯo’d guluca ’ci’d mo dhali a’di ki ur uni ’baar ka pije/ mo ki ḵa’bal ilu/ mo dhali ka morbip̱i lu/ mo ’peni gu’b gi mondheleladhelel mo, dhali a’di ki wol emena guurush ’pera ’cesh mo dhali a’di ki kuma tharabeesam buni ’twa/a ’cesh mo.

¹⁶Dhali a’di ki ṯor uni gwansan gwo mo, uni gun yolki gurko/ mo ki: ’Doyi to gwansan mo. Um mini ’koki mii gu’b ma Babam pem me’d gu’b gi moyol mo.

¹⁷Imanciḵ a’di gwo kakina gwo e mo jin ’kwarkunu mo jin o gwo mo ki: Anyor gom gu’b pini mo tani a’di miga/ shwa mo be.

¹⁸Dhali yan’ko’d ’Kwani Yahuuda/ ki o a’di gwo mo ki: Jamas mii gi wakatinta imina /e imii mo mmoṯor am mmomiina /e to gwansan mo.

¹⁹Yesus ki thoḵ uni gwo mo ki: ’Koshi gu’b gi mondheleladhelel yansan mo dhali ka cim kwara mo tani aha/ mina ’de’k a’di imis mo be.

²⁰Dhali ’Kwani Yahuuda/ ki o a’di gwo mo ki: Gu’b gi mondheleladhelel yansan a’di bu’thki yil issu/ i’ce’dka pe’de/ ap̱o/ mmonyaŋ a’di mo dhali /e mini ’de’k a’di imis ka cim kwara mmanakan?

²¹Hili a’di oki gwo mo gom gu’b gi mondheleladhelel jin ta buŋgwar is piti mo be.

²²Dhali wakan ki a’di cuyunu mis mo ’peni mowu mo tani imanciḵ a’di gwo kana gwo e mo jin okina a’di wakansan mo dhali uni gamki Gwo jin ’kwarkunu is mo dhali gwo jin okin ma Yesus mo be.

²³Dhali ki a’di diki’d e Pa Urushaliim ka cim gi Mompe’kup̱anyolos jin yuḵuwa yuḵ mo tani ’kwani ka ris gamki gwo is e gway piti mo mmomishkina uni jamas miim piti kun miikina a’di mo.

²⁴Hila Yesus ki is piti diki’d naskina/ mmowo’d uni mo

²⁵haali/ a’di mishki’da ris ’kwani ’baar mo dhali midi mii diki ta gi jan ṯal ’deŋ kamu/ mmoṯor a’di gwo ap̱o/ ’kwani mo haali/ a’di ki is piti mishki to kun ’kon e bwaŋ ’kwani mo be.