San Juan 2:13-25

¹³Judío awaruzpa Pascua pishta kasha taizkane, Jesúsne Jerusalén pɨpulura ɨrɨt.

¹⁴Diospa katsa yalta naptɨkane, usne akkwan awaruza wanmalnara. Mɨnpazha ampu wakarakas, pɨrikukas, utkurukas paininñara. Mamaztuzne misharɨ uzat kit awaruzpa pial maizara, awa wakarakas pɨrikukas utkurukas paina, Diosta mɨlanana.

¹⁵Sun iztawane, Jesúsne ilmu tɨtkasa sat kit wan awaruzakas pɨrikuruzakas, wakararuzakas Dios yalkis pianamal ɨninnara. Usne pial maizmuruzpa pialtakas misharɨkas kiakpɨntara.

¹⁶Utkuru painintuza kaiznara: —¡Akkis sun ukkat kit ɨrain! Ap Taittawa yalkin paininman. Paininmu yal chi.

¹⁷Suasne paiña kanpamtuzne Dios pit pɨnkɨhta para aizpa nɨjkulara: “Na up yalta akkwan pashimtu akwa, awane nawa piantanazi.”

¹⁸Suasne Judío awa ɨninturuzne ussa mɨmaara: —¿Chishma sun kimtus? ¿Dios nua ɨninma, sun kin? Dios nua ɨnintane, wat kal kit aumɨza ancha.

¹⁹Jesúsne sɨnkanara: —An Diospa yal azpiantane, nane kutña payura mamasa sanash.

²⁰Judío awa ɨninturuzne kaizara: —Awane cuarenta y seis añokima Diospa yal saara. ¿Nune an yal kutña payukima sanakish?

²¹Dios yalpa kaizkane, Jesúsne paiña ña antu, Dios paiña ña irɨttas kuhsninshimtu akwa.

²²Katmizna, Jesús irɨttas kakultawane, paiña kanpamtuzne sun payu us kaizta aizpa minñat kit Dios pɨnkɨhtakas us kaizta aizpakas nɨjkulara.

²³Pascua pishta asmin, Jesúsne Jerusalén pɨpulura tuazi. Akkwan awane us iztasparɨt kal kimtu aizpa izat kit ussa nɨjkulara.

²⁴Wan awaruza pian akwa, Jesúsne usparuza nɨjkulnarachi.

²⁵Jesús wan awa minñamtu aizpakas kiamtu aizpakas pian akwa, mɨnminkas ussa kamtanashimtuchi, wan awa ayukta minñamtu aizpa pian akwa. Awaruzne maizpa maizamtu.