Jon 2:13-25

¹³Tɨndi maa Juda walɨnja nɨmbana pasova walɨnja pesto ngway tolondɨ. Tɨga lɨga wan pesto vɨvat Jisas Jerusalemat yindɨ.

¹⁴Ngepma wokelaa God kat kwunatɨnja ngay wuleindɨ. Wuleilaa yilɨnja vak vɨndɨ. God kat kwinjeya bulmakau sip sip namiyo wenga kalɨndi maa vɨndɨ. Romna sanya klalaa Judana sanya ndi kat kwilɨndi, vɨndɨ.

¹⁵Vɨlaa mat yaaw kwutaa ndi kat viyandeya nda klalaa sangindɨ. Ndi kat viyaga kɨklindɨ. Dinyangu, bulmakau, sip sip ndi kat aywaa savulɨndɨ maa wogwendi. Sanya kwilɨga nɨmbana njamba kwutaa kaselɨtndɨ.

¹⁶Namiyo kat wenga klalɨja nɨmba kat wandɨ. Wan nda kwutaa kali ngwula. Kan ngay wuna nyaekna ngaya. Stua ana ndɨ wenga klangweya waa wandɨ Jisas.

¹⁷Wupma yindɨ mala vɨlaa ndɨna mbaapmamba la nɨmba tamba la nyan pɨlɨwukna vak kat yelavɨtndi. Godna ngay kwunapmak nɨma jɨvwa kwukiyowun. Waa pɨlɨwutndɨ tamba la nyan.

¹⁸Wupma yilɨndɨ maa Juda ndɨ kat yalaa wandi. Kanda wandɨ maa wupma yilɨgamɨn. Wupma yilɨma kwondu nɨn kat sɨmogwi mɨlɨ waa wandi.

¹⁹Wandɨ maa Jisas ndi kat wandɨ. Wovuna nguk kat vɨsɨmogwigiyowun. Kan ngay sulɨngwuk maa nandinya kuvut kwukiyowun waa wandɨ.

²⁰Wandɨ maa Juda ndɨ kat njɨka wandi. Nɨn naambi ndumi vɨli kiyeli sɨla vɨli wan Godna ngayna njɨvwa kwutɨnɨn. Mɨn anda vapmba nandinya kuvut kan ngayna njɨvwa kwukiyamɨn waa ndɨ kat njɨka walɨndi.

²¹Wan God kat kwutnja ngay kat ana wandɨ. Ndɨ ndɨna mbangɨ kat pagwuga wandɨ.

²²Wan ndɨna mbaapmamba la nɨmba wan tak pagwuga wanda nyaangɨk kat kiyalaa nandinya kuvut tɨga laatndɨ maa wan vak kat yelavɨtndi. Wan nyaangɨk kat yelavɨtaa wandi. Wan tamba la God waa nyaangɨt pɨlɨwuta nɨmba ana woseka waa pɨlɨwutndi. Jisas nɨn kat mbutɨnda nyaangɨt ndɨ woseka waa ana mbutɨndɨ. Wan nyaangɨt tamba aywaa kak kiyandɨ, vɨnɨn waa wandi.

²³Jisas pasova walɨnja pestona nandinya Jerusalemba lɨga ndɨna kwondu vɨsɨmogwiga nɨma sakwat nɨma njɨvwa kwutɨndɨ. Kwutɨnda vak kat vɨlaa nɨma sakwat nɨmba ndɨ njambwi nyana waa yelavɨtɨndi.

²⁴Yetɨlɨnda ndɨna vak aywaa ana vɨsɨmogwilɨndɨ. Vɨsɨmogwiweyan apma vat ana yelavɨka lɨgiyandi waa yelavɨtndɨ. Ngi kat tɨga nat samat vat mɨna sɨmogwindɨ ndi kat.

²⁵Ndinyanguna maawupmba la vak kat nat nyan kat ana wagalalɨndɨ. Ndɨ ndinyanguna maawupmba la vak kat aywaa vɨga lɨndɨ.