Yabura 127:1-5

¹Biyaasilae xa bɛɛti nde Sulemani naxan ba Xa Alatala xa mu banxi ti, a timae walima nɛ fufafu. Xa Alatala xa mu taa makantama, a kantamae walima nɛ fufafu.

²Wo kelima subaxɛ ma, wo walima han kɔɛ ra baloe sɔtɔfe ra. Na kui wo walima tun. Kɔnɔ Ala a xanuntenyie man kima e sa tɛmui.

³Die findima nɛ kɛ ra mixi bɛ Alatala naxan kima, fe fanyi sare nan e ra, naxee kelima a tan ma.

⁴Die naxee sɔtɔxi fonike tɛmui, nee tide luma nɛ alɔ sɔɔrie xa xalie.

⁵Barakɛ na mixi bɛ naxan xa xali sase rafexi. A yaxuie mu nɔma a rayaagide ɲama ya i.