Yɛbəc 16:11-32

¹¹Kɔ səyɛfɛ Torowas kɔ səyekti abɛla kɔ səntɛfərnɛ kəkɔ ka Samotiras, dɔckɔsɔk kɔ səmbɛrɛ Neyapoli.

¹²Kɔ səyɛfɛ dəndo, kɔ səŋkɔ Filipi, dare dɔpɔŋ da atɔf ŋa Masedon dɔlɔma ndɛ aka Rom alarəm ŋanandɛ mɔ. Kɔ sənacepərɛnɛ mataka mɔlɔma dare dadɔkɔ.

¹³Dɔsɔk da kəŋesəm kɔ səwur dare dəkusu kəŋgbɔkɔ kəsək, nde sənacɛm-cɛmnɛ kəfo nkɛ səntam kətola Kanu mɔ. Kɔ səndɛ kəlok-lokər aran aŋɛ ŋanaloŋkanɛ di mɔ.

¹⁴Wəran wəlɔma ɛnayi ŋa dacɔ pac-we kɔ Ludy, pəc-caməs cəloto ca karɛ. Pakom kɔ dare da Tiyatir. Wəyek-yekəs Kanu ɛnayi. Pəc-cəŋkəl su, kɔ Wəbɛ eŋgbiti kɔ abəkəc, ntɛ tɔŋsɔŋɛ kɔ kəc-ne bel-bel moloku mmɛ Pol oŋc-loku mɔ.

¹⁵Ntɛ anagbət kɔ dəromun teta Kanu mɔ, Ludy kɔ aka kəlɔ kɔn disrɛ mɔ, k’ewe su kəyi nde ndɔrɔn mataka mɔlɔma, pəc-tola: «Kɔ nəŋcɛm-cɛmnɛ fɔ ilaŋ Wəbɛ bel-bel-ɛ, nəder nnɔ nderem, nəyi nnɔ kɔ səna.» K’ɛlɛtsɛnɛ su kəyi di.

¹⁶Dɔsɔk dɔlɔma səc-kɔ dəkətola Kanu da aSuyif, kɔ wəyecəra wəcar wəlɔma ender pəbəp su, pəyɔ ŋɔŋk nŋɛ ŋɔŋsɔŋɛ kɔ kəloku ntɛ tender mɔ. Wəyecəra nwɛ ɔŋc-sɔtɔnɛ ti abɛ ɔn pəsam pɛlarəm teta kəloku kɔn mes mmɛ mender mɔ.

¹⁷Kɔ wəyecəra nwɛ ɛŋcɛpsɛ su darəŋ Pol kɔ səna, pəc-kulɛ-kulɛ: «Afum akaŋɛ acar a Kanu nkɛ kəyi dareŋc mɔ ŋɔ! Dɔpɔ da kəyac dɔ ŋayi kəmentər un!»

¹⁸Ntɛ wəyecəra ɔyɔ mes mamɔkɔ mata mɛlarəm mɔ, kɔ tɔlɔləs Pol dis. K’ɛŋkafəlɛ, k’oloku ŋɔŋk: «Tewe ta Yesu Krist ilok’ əm, məwur wəyecəra wəkawɛ dəris!» Gbəŋcana babɔkɔ kɔ ŋɔŋk ŋaŋɔkɔ ŋowur kɔ dəris.

¹⁹Ntɛ abɛ ɔn ŋanəŋk fɔ tɔsɔtɔnɛ taŋan pəsam tɔsɔlər ŋa mɔ, kɔ ŋasumpər Pol kɔ Silas, kɔ ŋaŋkekərɛ ŋa nde abaŋka ŋa dare dacɔ abɛ a dare fɔr kiriŋ.

²⁰Kɔ ŋaŋkɔ ŋamentər ŋa aboc kiti, ŋac-loku: «Afum akaŋɛ pəyama-yama pɔ ŋayi kəbɛrsɛnɛ dare dosu. ASuyif ŋɔ ŋayɔnɛ,

²¹aŋɛ ŋayi kəcam mɔyɔ maŋan mmɛ pəmar fɛ su kəwosɛ kəyɔ ka mi, səna aŋɛ səyɔnɛ aka Rom mɔ.»

²²Kɔ kənay ka afum ŋayɛfɛ kɔ ŋaŋcəmɛ ŋa dəbəkəc. Kɔ aboc kiti a dare dadɔkɔ ŋawurɛ ŋa yamos, k’asutɛ ŋa cəŋgban-gban.

²³Ntɛ alip kəsut ŋa pəlarəm mɔ, kɔ ŋambɛr ŋa dəbili, kɔ abɛ ŋaloku wəbum bili a pəkɛmərnɛ ŋa bel-bel.

²⁴Ntɛ wəbum bili ene moloku mamɔkɔ mɔ, k’ɛmbɛr ŋa nde bili mbɛ ŋantɔtam kəwur mɔ, k’oŋkotərɛnɛ ŋa wəcək məmboŋk ma tɔk.

²⁵Cɛk-cɛk cəndebəp, Pol kɔ Silas ŋac-tola Kanu, ŋac-leŋəs meleŋ mokor-korɛ Kanu, kɔ ayi dəbili ŋaŋne sim səŋan.

²⁶Gbəŋcana babɔkɔ kɔ antɔf ŋeyikcɛ pəpɔŋ, kɔ tɔsɔŋɛ kəlɔ ka bili tantɔf kəcekəlɛ. Kɔ cumba fəp cəŋgbitɛ, kɔ gbekce fəp yoŋkoŋɛ.

²⁷Kɔ wəbum bili entimɛ, k’ɛnəŋk ntɛ cumba ca bili cəŋgbitɛ mɔ, k’owurɛ dakma dɔn pəc-kɔ kədifnɛ, bawo ɛnacɛm-cɛmnɛ a afum aŋɛ ambɛr dəbili mɔ ŋayɛksɛ.

²⁸Kɔ Pol oŋkulɛ-kulɛ pəpɔŋ: «Ta məyɔnɛ pəlɛc, səyi nnɔ fəp fosu!»

²⁹Kɔ wəbum bili ewe nɛŋc, k’ɛmbɛrɛ katəna-katəna, k’ɔŋkɔ pətɛmpɛnɛ fɔr ya Pol kɔ Silas kiriŋ, pəc-yikcɛ kənesɛ disrɛ.

³⁰K’owurɛnɛ ŋa nde doru k’eyif ŋa: «Abɛ, cəke cɔ pəmar iyɔ ntɛ tendeyac im mɔ-ɛ?»

³¹Pol kɔ Silas ŋaloku kɔ: «Məlaŋ Wəbɛ Yesu, andekɔ-yac əm, məna kɔ aka kəlɔ kam disrɛ fəp.»

³²Kɔ ŋaloku kɔ toloku ta Wəbɛ, kɔ afum akɔ ŋanayi nde kəlɔ kɔn mɔ fəp.