Womusu 74:2-22

²A bɛsɛ wunɛn tɔmbu yɑɑyo, bɛsɛ be ɑ yɑkiɑ sɑɑ yellun di. A bɛsɛn bwese kɛri yɑɑyo yi yi kuɑ wunɛɡii. A Siɔnin ɡuu te yɑɑyo tèn mi wunɛn wɑ̃ɑ yerɑ rɑɑ wɑ̃ɑ.

³A doo ɑ wɑ nɡe mɛ yɑm mi, n bɑnsu kuɑ mɑm mɑm. Yibɛrɛbɑ bɑ ɡɑ̃ɑnu kpuro sɑnkɑ sɑ̃ɑ yee te sɔɔ.

⁴Wunɛn yibɛrɛbɑ bɑ kukurɑ sɑ̃ɑ yeru mi nɡe ɡbee sinɑnsu mɑ bɑ ben ɡidi bɔrɑ ɡirɑ mi.

⁵Bɑ sɑ̃ɑre nɡe dɑ̃ɑ buro be bɑ ɡbɑ̃ɑ yiiyɑmɔ dɑ̃ɑ sɔ̃ɔwɔ.

⁶Mɑ bɑ sɑ̃ɑ yee ten burɑ yɑ̃nu kpuro kɔsukɑ kɑ ɡbɛ̃ɛ kɑ mɑtɑlɑkɑ.

⁷Bɑ wunɛn sɑ̃ɑ yee te dɔ̃ɔ mɛni. Bɑ tu disi doke te, te tɑ wunɛn yĩsiru sɔɔwɑ.

⁸Mɑ bɑ ɡerumɔ ben ɡɔ̃ruɔ bɑ mɔ̀, su bu nɔni sɔ̃ kɑ dɑm. Mɑ bɑ bɛsɛn sɑ̃ɑ yenu kpuro dɔ̃ɔ mɛni tem mɛ sɔɔ.

⁹Yinni, sɑ ǹ mɑɑ yĩreru ɡɑru wɑɑmɔ te tɑ sun sɔ̃ɔsimɔ mɑ ɑ wɑ̃ɑ bɛsɛn suunu sɔɔ. Wunɛn sɔmɔbu bɑ ǹ mɑɑ wɑ̃ɑ. Bɛsɛn ɡoo kun mɑɑ yɛ̃ sere sɑɑ yerɑ̀ kɑɑ n sun deri mɛ.

¹⁰Sere sɑɑ yerɑ̀ kɑɑ n mɑrɑ yibɛrɛ u n nun nɔɔ kuurimɔ. Sere sɑɑ yerɑ̀ kɑɑ n nɔɔ mɑɑri yibɛrɛ u n wunɛn yĩsiru kɑm mɛɛrɑ.

¹¹Mbɑn sɔ̃nɑ ɑ wunɛn nɔmu kuruɑ. A ɡu dɛmiɔ kpɑ ɑ bu kɑm koosiɑ.

¹²Gusunɔ, sɑɑ yellun di wunɑ ɑ sɑ̃ɑ nɛn sunɔ. Wunɑ ɑ sun fɑɑbɑ kuɑ nɔn dɑbinu.

¹³Wunɑ ɑ nim wɔ̃ku burɑnɑ kɑ wunɛn dɑm mɑ ɑ yɛɛ ɡɔbi wiru kɔsukɑ.

¹⁴Wunɑ ɑ kɑrɑku wiru kɔrɑ, mɑ ɑ derɑ be bɑ wɑ̃ɑ mi ɡɑ̃ɑnu ku rɑ kpi bɑ ɡu temɑ.

¹⁵A derɑ bwiɑ kɑ dɑɑrɑ yɑrɑ, mɑ ɑ dɑɑnu ɡberɑsiɑ ni nu ku rɑ nim kpe.

¹⁶Wunɑ ɑ wɔ̃kuru kɑ sɔ̃ɔ sɔɔ kuɑ. Wunɑ ɑ yɑm bururɑm kɑ sɔ̃ɔ kuɑ.

¹⁷Mɑ ɑ tem nɔɔ burɑ yenu kuɑ. Mɑ ɑ yɑm susuru kɑ purɑn sɑɑbɑ yi.

¹⁸Yinni Gusunɔ, ɑ yɑɑyo mɑ yibɛrɛ u nun yɛ̃ɛmɔ. Bwese te tɑ ǹ bwisi mɔ, tɑ wunɛn yĩsiru ɡɛmɑ.

¹⁹A ku wunɛn tɔn be ɑ kĩ mi ɡbeeku yɛɛ deriɑ. A ku bu duɑri be, be bɑ sɑ̃ɑ wɔnwɔndobu.

²⁰A wunɛn ɑrukɑwɑni yɑɑyo. Domi dɑm diobu bɑ yibɑ bɑ kukuɑ mi bɑ ǹ bu wɑsi tem mɛ sɔɔ.

²¹A ku de wi bɑ dɑm dɔre u sekuru wɑ. A de wɔnwɔndo kɑ sɑ̃ɑro bu nun siɑrɑ.

²²Yinni Gusunɔ, ɑ seewo ɑ kɑ tii yinɑ. A yɑɑyo wɔmɑ ye ɡɑri bɑkɑsu rɑ n nun mɔ̀.