Psalm 74:2-22

²Kom kotin kupura sapwilim omui momodisou, me kom kotin pwaindar mas o, o me komui dorelar, pwen wiala sapwilim omui, kotin kupura dol Sion, wasa me kom kotikot ia.

³Kom koti dong wasa me liseliping ansau warai; imwintiti me kawelar meakaros nan im saraui.

⁴Me palian komui, kin weriwer nan tanpas omui o pwilikidi arail dikedik en ani mal akan lole.

⁵Irail pwaradar dueta ir, me wia palapal nan wel.

⁶Re kin kawela did kaselel akan ki sile laud o tikitik.

⁷Irail karongala tanpas omui; irail kasaminela o tiakedi wasa me mar omui kotikot ia.

⁸Irail kin inda nan mongiong arail: Na, kitail pan kawela! Irail karongalar wasan kaudok karos nan sap o.

⁹Solar manaman akai sansal ong kitail, o solar saukop amen mia, o sota amen re atail me pan asa imwilan mepukat.

¹⁰O Maing Kot, arai da me morsued o pan lalaue, o imwintiti o pan mamaleki mar omui?

¹¹Da me komui kotiki wei sang lim omui? Kotikida pali maun omui o kaimwisokala.

¹²Pwe Kot ai Nanmarki sang mas o. I me sauas pan meakaros, me kin wiaui nin sappa.

¹³Kom kotin kamueit pasanger madau ki omui manaman, o kom kotin kawelar mongan drake nan pil.

¹⁴Kom kotin kawelar mongan walros, ap kotiki ong aramas nan sap tan, pwen kangala.

¹⁵Komui kotin kapwaredar parer o pilap akan, o pilap kalaimun akan me kom kotin kangalangaladi.

¹⁶Ran o pong me sapwilim omui; komui kotin wiadar saunipong o katipin.

¹⁷Komui wiadar irair en sap akan; komui me kin wia ansaun karakar o kapou.

¹⁸Kom kotin kupura mepukat: Imwintiti o lalaue komui Maing, o aramas pweipwei kan mamaleki mar omui.

¹⁹Kom der kotiki ong man laualo ngen en sapwilim omui muroi, o kom der likidmaliela pwin en sapwilim omui luet akan.

²⁰Kom kotin tamanda inau o, pwe sap olar wasa karos o im akan pual pasanger.

²¹Re der kotin mueid ong me luet o, en namenok purela, me samama o luet akan en kapinga mar omui.

²²Maing Kot, kom kotida o kotin kaimwisokala sapwilim omui dodok; kom kotin tamanda kankaurur, me kin wiaui ong komui sang ren me pweipwei kan.