Suuki 7

1

2

3

4

5

6

7

8

¹«Sulamika, i xa gbilen, i xa gbilen, alako muxu xa i mato.» Xɛmɛ xa masenyi ginɛe bɛ «Munfe ra wo Sulamika matoma a fare boronfe ki naxɛ ɲama ya ma?»

²«Mangɛ xa di, i sanyi tofan sankiri kui. I tagi bilinyi rayabu alɔ xunmase mixi naxan yailanxi.

³I furi digilin, a rafexi fe fanyi ra, i tagi luxi alɔ mɛngi malanxi, a rabilinxi sansi fuge tofanyie ra.

⁴I xiɲɛ firinyi luxi alɔ xeli xa gulie.

⁵I kɔnyi filinxi, a luxi alɔ yire makantaxi itexi, naxan yailanxi sili ɲinyi ra. I yae luxi alɔ ye ragatadee Xɛsibɔn, Bati Rabimi naadɛ sɛɛti ma. I ɲɔɛ luxi alɔ Liban xa yire makantaxi, naxan ya rafindixi Damasi ma.

⁶I xunyi luxi alɔ Karemele geya, i xunsɛxɛ luxi alɔ dugi gbeeli. Mangɛ mu nɔma a ya bade naxan na.

⁷N xanuntenyi, i tofan, n xanuntenyi fanyi, i rafan n ma.

⁸I kuya alɔ tugi bili, i xiɲɛ misaalixi naxan bogie ra.

⁹N bara a fala n yɛtɛ bɛ, ‹N xa te na tugi kɔn na, n xa na bogi suxu.› I xiɲɛ misaalixi wɛni bili bogi nan na, i dɛ xiri ɲɔxun alɔ mangoe,

¹⁰i dɛ rafan n ma dangife wɛni ra.» Ginɛ xa masenyi xɛmɛ bɛ «Iyo, a maniyaxi wɛni nan na, naxan findixi n xanuntenyi gbe ra, won firin naxan minma.

¹¹N bara findi n xanuntenyi gbe ra, a xɔli na n tan nan ma.

¹²N xanuntenyi, won xa mini daaxa, won xa kɔɛ radangi taa xunxurie kui.

¹³Won kurunma nɛ sigafe ra wɛni bogi bili matode, won xa a to xa e fugaxi, won xa a mato xa mangoe fan fuge bara mini. Mɛnni n n ma xanunteya masenma nɛ i bɛ.

¹⁴Xanunteya ɲɔxun alɔ sansi bogi. N na fe fanyi fori nun a nɛɛnɛ ragataxi i tan nan bɛ.»