Solomon 7

1

2

3

4

5

6

7

8

¹He vahi he dungganen, utew iyan mekempet is menge paa nu he zuen duen menge sandalyas. Meupiya is kegkepurma te menge vuvun nu. Henduen be heini te menge elahas he mibeelan te utew metau he mememaal.

²Is pused nu iring te tasa he layun din duen taǥù he metaam he vinu. Is hawak nu iring te vinagkes he trigu he neliǥuy te menge liryu.

³Is menge susu nu henduen be te sereping he nati te kuleping.

⁴Is lieg nu iring te turi he iyan inhiman duen is menge ungal te ilipanti. Is menge mata nu iring ketingew te pemeziǥuey ziyà te Heshbon, he ziyà te gemawan te Bat Rabim. Is izung nu iring kekempet te turi ziyà te Lebanon he nekesinaru ziyà te Damascus.

⁵Is ulu nu iring is kekempet din te kekempet te Buntud he Carmel. Is bulvul nu iring te utew mahalen he manggad. Utew nesuati te hadì is kempet kayi.

⁶Utew ka mezagwey is pelanggè ku; utew ka mekewiwili.

⁷Is tindeg nu iring te tindeg te kayu he palma, ne is menge susu nu henduen be te menge rupung te veǥas kayi.

⁸Migkaǥi a te, “Ebpemenahik a ziyà te palma ne egewezan ku is menge veǥas kayi.” Etuwey, is menge susu nu henduen be te menge pungpung te paras ne is kehemut te gehinawa nu henduen be te kehemut te mensanas.

⁹Is menge hazek nu iring is keemis din te kinemeupiyahan he vinu. Bahi Heini he vinu ednaneynaney edtudà diyà te menge vivig wey ngipen te minahal ku.

¹⁰Gaked a te minahal ku ne iyan e zà ibulunga zin.

¹¹Hendini ka, pelanggè ku, edhendiyè ki te vevesukà, ne ziyà ki edlipezeng te zuen duen menge vulak he hina.

¹²Edsayu ki ed-enew ne ed-ahaan ta ke neneringsing en wey ke nemekar en is menge kevukad te menge paras. Ed-ahaan te zaan ke nengevukad en is pumigranata. Ne zutun ibpeǥezam ku kenikew is kebmahal ku.

¹³Egkahazek ta is kehemut te pinemula he mandragura, ne ziyà te uvey te gemawan ta ne zutun is langun he meupiya he menge prutas, is daan wey is beǥu. Su inteǥana ku heini kenikew, pelanggè ku.