Salomore Gae 7

1

2

3

4

5

6

7

8

¹O naru ŋokac fekicne, no kike tapegere manape boc biaŋkekac. Gozi jahecge i qânâ furi sâko irec sâc, ŋic mamana saric moczi bâfuawec tinac ekac.

²Funʒuŋge i râqâc oorâŋ iŋucne, ira waiŋ opâ wiac âsu biaŋhec bâsifuckekicne ŋehuc juekac, â bururuge i padi sesucne ʒariŋ âsu biaŋzi râreckehuc domakac irec sâc.

³Susu jahecge i noniŋ motecne jajahec jahere sâc, tiki noniŋ motecne funʒuŋ fâri iŋucne hâcne.

⁴Upege i ficsanaŋ elefaŋte ʒuŋezi bakicne irec sâc, â ʒâŋe hândâŋ jahecge i Hesiboŋ haeo Batarabim sacmotâc ŋifecnao opâ riqic ŋekac iŋucne, â sâke tetecge i Lebanoŋte ficʒora Damasko haeopec ŋekac irec sâc.

⁵Qizecge i Karamele tiki iŋucne ferâ ŋekac, â qizec susucge ʒoricne waha domakac i gâgâpâc jâmbâŋ, ehame ŋicwofuŋzi hone rârâqârehuc maŋticne gorao qohotaekac.

⁶O joroc biaŋ‐nane, naru ŋokac hone aŋacne, sahac hawari biaŋge kereŋ bareŋne.

⁷Go fâujâc iŋucne ferâ domakomec, â susu jahecge jahe fâu fârine irec sâc.

⁸No ʒiŋuc mupo: No fâujâc hahaŋko ferâ fârine rohape susu jahecgezi waiŋ ɋiti iŋucne ezepirec, â micâsugezi ine woraŋ ââsu irec sâc ezejec.

⁹Ehame go arec faio dâŋ nazatec manape waiŋ opâ aŋac ʒizine nâkâcnepene quŋquŋke tâmiric biaŋne huekac irec sâc ezejec.

¹⁰No joroc biaŋ‐nanere biŋe, e nore mâretec ecnekac hâcne.

¹¹Joroc biaŋ‐nane, go warec, eme jufu gieo rarâ jâwecjâc fuŋnao guŋ fonac.

¹²Hae fureme ine waiŋ gieo rarâ waiŋ i âpâu‐ticnehec fokac me biac fâuckejec, erâ bojazaŋ wâc âri qakac me mâc fokac i honezeperec. Eme no ira hâcne maŋzi ʒâficgupemu.

¹³O joroc biaŋ‐nane, ira gâgâsere âsu biaŋ biac fuakac, erâ jâchândâŋ aŋacne â nânâne fuŋne fuŋne, raŋɋane â ɋâricne i gore biŋe râe biric efârepo hâcne.