waRoma 3:9-26

⁹Kinani tena? Itakuwa ofwe Mayahudi tiwa bora pakulu koliko wengine? Anta! Tibainisha futi kuwa wanu piya, Mayahudi pamoja na Sawari-Mayahudi, wamilikiwa na dambi.

¹⁰Mandiko Matakatifu akwamba: “Aapo munu kamilifu, anta mmoja.

¹¹Aapo anta munu mmoja wakwereriwa sana. Aapo munu antaja Mwenyezimungu.

¹²Piya wanu wanloza minyongo, waridanganya awafãi kinu. Aapo atenda meema, aapo anta mmoja.

¹³Paulo pawo pawa kamba kaburi ra kuwa wanzu. Kwa malulimi awo walongopa. Mivumbu yawo ílawa sumu ya nyoka wakofya.

¹⁴Viwejala pakanywa pawo lana na usowezi wa kuwawa.

¹⁵Maulu awo akwenenda upesi kusuja damu.

¹⁶Menenzi awo auwaribifu na ausikini.

¹⁷Awejiwa njira ya usalama.

¹⁸Mmaso mwawo awamopa Mwenyezimungu anta aba.”

¹⁹Sambi, tukwijiwa kuwa piya vyaisema shariya wakwambiriwa ware wenendera shariya ipate kanywa zawo zinyamare, na piya wanu mulumwengu‑mu wajuzi kunjibu Mwenyezimungu.

²⁰Kamana kwa vitendo vya shariya aapo munu anta mmoja aja kwakikishiwa mbere ya Mwenyezimungu. Kamana shariya ndi intenza munu kwijiwa kuwa kanawo madambi.

²¹Fala sambi, ukamilifu wa Mwenyezimungu ubainisha namuna nyengine sairi ya kufulata shariya (ingawa shariya pamoja na mandiko a minabii vilavya ushahidi kuhusu ukamilifu‑wo).

²²Ukamilifu wa Mwenyezimungu uwa julu ya kauli ya Insa Almasihi, kwa piya wenye kumwamini. Kati ya wanu akupo kusiyana,

²³konta wanu piya wakola dambi na uwapunguka utukufu wa Mwenyezimungu.

²⁴Wanu piya wakikishiwa kwa rehema yake bila maripo, julu ya komboriwa na Insa Almasihi.

²⁵Mwenyezimungu wantondore kuwa awe kafara yakupatanisa julu ya damu yake ka ware wenye kuntumaini, iwa ipate olote ukamilifu wake. Mida, kwa sababu ya imani yake, iye akitowa kuhukumu madambi a munu akorire.

²⁶Epa sambi, Mwenyezimungu kantondola Insa kuwa kafara yakupatanisa ipate wakati‑wu olote ukamilifu wake, kuwa iye ndi mwenyé shariya na wakumwakikisha ire antumaini Insa.