ROMUDENƆ 3:9-26

⁹Tↄ̀! Ókↄ̃nↄ Yudanↄ ó sã̀nan yá? Lɛnlo fá! Zaakũ ma Yudanↄ kũ buri pãndenↄ bòbo ń dàn ń pínki kↄ̀, ń pínki bi durunna zↄ̀nↄmɛ.

¹⁰Ò kɛ̃̀ Luda yãn ò pì: Gbɛ̃ke manaro, bee mɛ̀n do.

¹¹Laakaride ke kunlo, Luda ki wɛtɛri ke kunlo.

¹²Ò sã̀sã ń pínki ò gↄ̃̀ dↄ̀rↄↄ sari, yãmanakɛri ke kunlo, bee mɛ̀n do.

¹³Ń kòto de lán mira wɛ̃naa bàmɛ. Òdi lɛ́nna kɛńnɛ, ń lɛ́gbɛ bi pitiko sɛwɛmɛ,

¹⁴yã ĩni kũ gbɛ̃kanaao ń lɛ́ pà.

¹⁵Ò wãna kũ gbɛ̃dɛnaao,

¹⁶òdi suńyĩ kũ kisirao kũ wɛ́tãmmao,

¹⁷ò aafia zɛ́ dↄ̃ro,

¹⁸ń wɛ́ dìgↄ̃ Luda wé'i vĩro.

¹⁹Ó dↄ̃ kũ Luda doka pínki de gbɛ̃ kũ ò na doka pì ↄĩnↄ pↄ́ ũmɛ, de gbɛ̃ sĩnda pínki lɛ́ gↄ̃ nakↄ̃ana, andunia gbɛ̃ sĩnda pínki gↄ̃ taaride ũ Luda kĩnaa.

²⁰Zaakũ gbɛ̃ke ni bo mana Luda kĩnaa doka pì kũna yãiro. Luda doka mɛ́ àdi tó ò durunna dↄ̃.

²¹Deran Luda dì tó yã bo kũńwo nna nà bò gupuraa sà, lákũ a yã kɛ̃na Musa doka kũ annabinↄ takadanↄ gũn nà. Adi kɛ a doka kũna yãnlo.

²²Luda dì tó yã bo kũńwo nna Yesu Kirisi náanikɛna yãimɛ. Gbɛ̃ kũ àtɛni a náani kɛ sĩnda pínki pↄ́mɛ. Gbɛ̃ke bona adoro,

²³zaakũ baadi durunna kɛ̀, ò kĩ̀a Luda gakurii.

²⁴Luda dì tó yã bo kũńwo nna gba ũ a gbɛ̃kɛ yãi kũ Kirisi Yesu kũ à ń bó gbãnao.

²⁵Àkũmɛ Luda kpà durunna kútɛkɛbↄ ũ gbɛ̃ kũ òtɛni a aru náani kɛnↄnɛ, de à mↄ́ baadi pínkinɛ kũ adì yã kɛ a zɛ́aamɛ. À mɛna yã, adi durunna zĩnↄ yã daro,

²⁶akũ à mↄ̀ńnɛ tera kũ adì yã kɛ a zɛ́a. Deran Luda dì yã kɛ a zɛ́a nàn gwe, akũsↄ̃ àdi tó yã bo kũ Yesu náanikɛrinↄo nna.