Roomu 3:9-26

⁹Awa, enen Yahuudiyankeeɓe, ko honɗun ɓurɗen ɓeya? Hay fus! Ko fii en ɓanginii wonde kala Yahuudiyankeejo e mo wonaa Yahuudiyanke no e nder junuubu,

¹⁰wano windori non: «Feewuɗo alaa, hay e gooto non!

¹¹Hay gooto alaa faamu, hay gooto alaa ɗaɓɓude Alla.

¹²Fow ko huccuɓe Alla, awa kadi ɓe fow ko ɓe ɓoyliiɓe, hay gooto alaa wonɗo waɗude ko moƴƴi, hinaa non hay e gooto!

¹³Kononɗi maɓɓe ɗin ko genaale udditiiɗe, hiɓe huutora ɗenɗe maɓɓe ɗen fii janfagol, tuutaaɗe toni maɓɓe ɗin ko tooke mboddi.

¹⁴Kundule maɓɓe ɗen no heewi kuddi e hahhannde,

¹⁵koyɗe maɓɓe ɗen no hawjani hibbugol ƴiiƴan,

¹⁶yeebaare e tampere no ka ɗate maɓɓe.

¹⁷Ɓe andaali ɗatal ɓuttu ngal,

¹⁸awa kadi kulol Alla alaa e gite maɓɓe.»

¹⁹Hiɗen andi wonde ko Sariya on wi'i kon fow ko wonɓe e ley Sariya on wi'aa, fii no kala hunduko ombiree, e no Alla ɲaawira yimɓe aduna on fow.

²⁰Ko fii hay gooto jogortaake feewuɗo yeeso Alla fii ko o ɗoftii Sariya on kon, ko fii ko immorde e Sariya on junuubu andori.

²¹Kono jooni, Alla feɲɲinii ko honno goɗɗo waawetee jogoreede feewuɗo yeeso Alla e ɓaawo Sariya on, wano Sariya on e annabaaɓe ɓen seeditori non.

²²Alla jogoray yimɓe ɓen feewuɓe sabu ko ɓe gomɗini Iisaa Almasiihu on kon, ɗun ko gomɗinɓe ɓen fow. Ko fii sendondiral alaa:

²³fow waɗii junuubu, ɓe waawataa hewtude mangu Alla ngun.

²⁴Awa ko tippude e dokkal moƴƴuki makko kin ɓe jogoraa feewuɓe rewrude e cottudi wondi e Iisaa Almasiihu on ndin,

²⁵on mo Alla toɗɗii wonugol sadaka fii, rewrude e ƴiiƴan makko ɗan, no gomɗinɓe mo ɓen heɓira yaafuyee junuubaaji. Alla waɗi ɗun fii ɓangingol peewal mun ngal, ko fii o donkinaali ɓee waɗunooɓe junuubi feƴƴunooɗi ɗin fewndo muɲal makko ngal.

²⁶O faalaama ɓanginde peewal makko ngal e oo saa'i fewndiiɗo, ɗun fow ko fii no andiree ko o Feewuɗo, o jogitora on gomɗinɗo Iisaa wa feewuɗo.